剖视上海人个尴尬（五）
沪语朗读：高仁
剖视上海人个尴尬（五）
作者：余秋雨
沪语改写：丁迪蒙
朗读：高仁
续写上海新历史，关键在于重塑新个上海人。重塑个含义，是人格结构个调整。对此，请允许我说两句重闲话。
今朝上海人个人格结构，勒老大个成分浪是百余年超浓度繁荣大字动荡个遗留。
勒本世纪前期，上海人大大个见了一番世面，但无可否认，伊个辰光个上海人勒总体浪勿是搿座城市个主宰。上海人长期处于仆从、职员、助手个地位，是外国人搭外地人立勒第一线，承受搿创业个乐趣搭风险。
众多个上海人处于第二线，勒观望，勒比较，勒追随，勒参谋，勒担心，勒庆幸，反覆品尝第二线个乐趣搭风险。
也有少数上海人冲到了第一线，假使成功了，后首来也侪离开了上海。搿种整体角色，即使上海人见闻广远，邪气能适应现代竞争社会，也缺少自主气魄，勿敢让个体生命灿烂展现。
直到今朝，既便是上海人当中个佼佼者，最合适个岗位仍旧是某家跨国大企业个高级职员，成为气吞山河个第一总裁邪气难。上海人个眼光远远超过闯劲，适应力远远超过开创力。有大家风度，却呒没大将风范。有鸟瞰世界个视野，却呒没纵横世界个气概。因此，上海人总归勒期待。伊拉眼界高，来啥也勿能满足伊拉个期待，只好靠发发牢骚来消遣。牢骚也仅止于牢骚，制约伊拉个职员心态。
呒没敢为天下先个勇气，呒没统领全局个强悍，上海人个精明也就搭怯弱相伴随。伊拉勿会高声朗笑，勿会拼死搏击，勿会孤身野旅，勿会背水一战，连白相也白相得邪气勿放松，前顾后盼，拖泥带水。甚至于谈恋爱也少了点浪漫色彩。
上海人个丑陋性，大多由此伸发。失去了人生个浩大走向，智慧也就成了手浪向个一种私人玩物。
文化程度高个，染上沙龙气，只听得机敏个言词滚滚滔滔，寻勿到生命激潮个涌动；文化程度低个，便勿分场合个耍弄机智，每每坠于刻薄搭仔恶谑；再糟糕一点个，则是走向市侩气乃至流氓气，成为街市间让人头痛个渣滓。
上海人个日脚过得并勿顺心，但由于伊拉缺少生命感，也就缺少悲剧性个体验，而缺少悲剧性体验，也就缺少了对崇高搭仔伟大个领受；伊拉号称偏爱滑稽，但也仅止于滑稽而达勿到真正个幽默，因为伊拉勿具备幽默所必须有个大气搭仔超逸。
于是，上海人同时失却了深刻个悲搭深刻个喜，属于生命体验个两大基元对伊拉侪是邪气黯淡个。
即使是受到全国厌弃个伊份自傲气，也只是上海人对于自家生态搭心态个盲目守卫，傲得琐琐碎碎，勿成气派。真正个强者也有一份自傲，但是有恃无恐个精神力量使伊拉变得大方而豁达，勿会只勒生活方式，言谈举止浪自我陶醉，冷眼看别人。
总而言之，上海人个人格尽管勿失精巧，却缺少一个沸沸扬扬个生命热源。于是，搿个城市失去了烫人个力量，失去了浩荡个勃发。
可惜个是，讥刺上海人个锋芒，常常来自一种更加落后个规范：讲上海人崇洋媚外、各行其是、离经叛道；要上海人重归朴拙、重返驯服、重组一统。对此，胸襟中贮满了海风个上海人倒是有点固执，并勿整个皤然大悟。暂时宁肯搿能，勿要匆忙趋附。困惑迷惘一阵子，讲勿定勿久就会立出像模像样个一群。
上海人个人格结构个合理走向，应该是更加自由、更加强健、更加热烈、更加宏伟。伊个依据点是大海、世界、未来。搿种人格结构个群体性体现，勒中国随便阿里座城市也侪没出现过。
如果永远只是一个拥挤个职员市场，永远只是一个新一代华侨个培养地，葛末，勒未来个世界版图浪，搿个城市将黯然隐退。历史，从来勿拨附庸以地位个。
假使大家能够从地理空间浪发现时间意义，葛就勿难理解：失落了上海个中国，也就失落了一个时代。失落了上海个文明，搿是全民族个悲哀。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号