故里春秋（六）
作者：朱海洪
沪语改写：边秦翌
沪语讲述：徐辉
詹周氏立时三刻就拨捉起来了。法院开庭个辰光，伊对伊自家杀人个事体一眼也勿赖，承认了。搿只案子看上去是比较简单个，杀人偿命，判个死刑或者是无期徒刑么就可以了。
但是，想勿到个事体又出现了。
先讲杀夫案个当天早浪向，邻居贺大麻子突然之间就失踪了。搿个看上去蛮奇怪个，就拿贺大麻子也捉得来审问审问。贺大麻子个真名叫做贺惠贤，捉起来之后伊马上就招口供了：原来伊出于同情，平时辰光常庄借钞票拨勒詹周氏，詹周氏总归是有借无还，同情就慢慢叫变成功了奸情。詹周氏杀脱男人之后，贺大麻子吓得出了一身冷汗，常怕搭自家有得牵连，就逃出去避避风头，实际浪向杀人个事体搭伊是浑身勿搭界个。
挨下来法官又开始想了，迭个詹周氏好像勿大简单、有眼复杂个，葛末再审审伐。呒没想到，搿趟再审，又审出新个事体唻，詹周氏又牵出一个小宁波。小宁波本名叫何宝玉，是大块头个朋友。詹周氏讲搭小宁波有奸情，杀男人是伊动手前两天搭小宁波商量好个。动手搿日天，小宁波趁牢仔大块头睏着个辰光溜到伊拉屋里去，詹周氏递拨勒小宁波一把菜刀，小宁波先朝牢仔大块头个头颈浪用力斩一刀，伊再上去勒脑门高头又补了一刀。
既然是讲得搿能介清爽末，法院快点去拿小宁波捉得来审问。小宁波就算长了一百只嘴巴也呒没办法解释呀，只会得叫冤枉。法官只好再去审詹周氏，没想到伊又翻案了，讲伊是屈打成招再瞎讲八讲个，其实搭小宁波是呒没关系个。乃末法官头也大煞了：迭个詹周氏真个蛮有一套个，编故事编得来像电影一样个。
1945年5月3号庭审判决：詹周氏因杀人判死刑，剥夺公权终身，菜刀一把没收。贺大麻子搭仔小宁波无罪释放。
案子本来可以收场了，呒没想到半路浪又杀出一个程咬金来，平地又起波澜了：迭只案子个内容邪气多，再加上翻过来翻过去，特别个刺激神经，所以交关报纸开始大肆报道酱园弄杀夫案，而且越来越多个人对詹周氏是邪气同情个，甚至有人为伊辩解搭申诉，其中最最有名个就是苏青。
苏青曾经是上海滩浪著名个女作家，伊个代表作《结婚十年》勒当时是邪气畅销个，风头勿亚于张爱玲。伊有得一只缺点，文笔虽然蛮好，但大事体浪蛮糊涂个。伊搭汪伪政府个陈公博关系邪气好，还当过伪政府专员。必过，勒勒酱园弄杀夫案当中，伊敢于为弱势女性抱勿平，专门写文章《为杀人者辩》，里向讲到：詹周氏杀夫是为生活所迫个死里求生，归根结底还是社会问题。
本来勒监牢里等死个詹周氏又起劲了，伊开始上诉，但是最后还是拨高等法院驳回了。
乃末，搿记詹周氏总归要死脱了伐？呒没哦，故事又来了，半路里又出来一个外国程咬金。搿个外国程咬金是个嬷嬷，伊上法庭为詹周氏作证，讲詹周氏肚皮里有小人了。法官拉大眼瞪小眼，只好宣布等到伊拿小人生下来再讲。
呒没想到，几个号头之后抗战就胜利了，大赦天下，詹周氏个死刑改判成无期徒刑。又过脱几年，全国解放，再大赦，詹周氏个无期改成了有期徒刑。最后，詹周氏坐了15年个监牢，出来之后拨送到苏北大丰农场，像奇迹一样活下来了，一直到上世纪九十年代再去世个。真个是：
天作之合，小尼姑重返红尘；
机缘巧合，詹周氏死里逃生。
朗读者
往期回顾：
图：网络 / 编辑：渺渺