小辰光过年

沪语朗读：渺渺

作者、朗读者

小辰光过年

渺渺

小辰光我伲屋里家境勿哪能宽裕,生活条件比较清苦。我爷娘是纺织厂电工,在欸个年代伊拉一辈嗰人为了养家活口会经常加班加点嗰工作,记得爸爸姆妈常庄将零碎生活带到屋里,我与阿姐也曾经拆过矽钢片绕过线圈。平常嗰日脚是过得非常节俭,一到过年姆妈再会到布店里措点料作帮我伲三姊妹裁做新衣裳,再有比较丰盛嗰小菜吃。平常屋里是阿奶烧菜，一到过年就是爸爸掌勺，还将平常舍勿得用嗰一套餐具拿出来装盆,伊烧嗰菜味道也是老好嗰。

过年了，屋里嗰八仙桌上会有八冷盆，冷盘吃了差不多了，再会开始上热炒，会有十热炒二点心。冷盆基本上是四喜烤麸、糖醋小排、白切肚子、白斩鸡、爆鱼、酱鸭、松花皮蛋、海蜇头；热炒会根据情况有所变化，会有桂花肉、炒时件唠啥，已经记勿大清爽了，不过走油肉、扣三丝、沙锅三鲜汤是必勿可少嗰；点心么八宝饭也是勿会少嗰，还有一道勿是春卷，就是水果银耳羹或者酒酿小圆子。为了准备迭些菜，一家门要忙上好几天，爸爸姆妈也是动足脑筋。

记得屋里有蛮多大大小小嗰缽斗，过年嗰辰光像四喜烤麸、糖醋小排、爆鱼、水笋烧肉、肉圆、鱼圆、蛋饺唠啥侪会盛在里头，客人来了就捞一点，做冷盘嗰装盆，再在菜式上头或者盆子边上放一点香菜作点缀。

我弟弟小辰光最欢喜吃嗰是糖醋小排,假使我伲到强伯伯、杨伯伯、蔡伯伯屋里去做人客，只要有糖醋小排，伊其他菜侪勿要了，一盆糖醋小排侪到伊嗰胃里伊就满足了。

记得小年夜夜里，是一家门最忙嗰辰光，爸爸会起油镬，在油镬里拉蹄髈和五花肉，一阵阵嗰肉香飘过来，引得人馋吐水淂淂滴，接下来拿蹄髈和肉放在盛着冷水嗰缽斗里激着，等肉皮起泡以后再摆佐料红烧。开油镬要拉嗰还有小排骨、鸭子、爆鱼、烤麸唠啥，个一天还要烧其他冷盆菜和放汤嗰辅菜，还要炒香瓜子、长生果，一忙就忙到大年夜了。

姆妈欢喜吃甜食嗰，伊最拿手嗰是八宝饭。先拿糯米蒸熟，在小汤盅里铺一层红丝绿丝蜜枣唠啥嗰十锦果，再放蒸熟嗰糯米饭，再在饭当中放一些阿奶退沙猪油炒嗰赤豆沙，最后再加点糯米饭，迭能还没做好，还要拿一碗碗嗰八宝饭用蒸格蒸熟。吃嗰辰光，一碗八宝饭还要蒸一蒸，趁热倒覆在盆子里，浇一点熟猪油端上八仙桌。

记得我读小学三年级以后每年过年吃嗰蛋饺侪是我搨嗰，阿奶拿材料准备好，我一只手拿一只长铁勺放在煤气上，另外一只手用双筷子搛块带肉膘嗰肉皮在勺里搨一记，再拿调羹舀点蛋糊放进去成为蛋皮，放点肉糨，再拿蛋皮盖上去。刚刚开始嗰第一只火候老是控制勿好，蛋皮总归是蛮厚嗰而且有点焦，做到后来卖相就比较好了。

当年屋里有一只老大嗰蒸格，一格可以放8寸盆3只，爸爸总归拿阿奶做嗰肉圆鱼圆、姆妈做嗰八宝饭，还有我搨嗰蛋饺放到蒸格里向蒸。

记得我伲屋里还要焋糕嗰，拿糯米和大米按一定比例舂粉，粉嗰颗粒勿能忒细，要用有规格嗰筛子筛过，再拌些赤豆蜜枣，然后放到大蒸格里蒸熟。焋好嗰糕切成一大块送给亲朋好友，也是希望生活高高兴兴节节高嗰意思。后来舂粉嗰地方没了，糕也就勿焋了。

孃孃最拿手嗰是做甜酒酿，伊做嗰甜酒酿总归是吃口正正好好，阿姐呢会用细沙炒花生瓜子。

我爸爸还会买点高升和一百响，在年三十与年初五嗰二天放。欸些辰光嗰炮仗是可以拿在手里放嗰，我与姐姐手里拿了大炮仗伸到窗门外头，爸爸用香烟点烊引信，一歇歇就在手里响一记，升到天上响一记；一串小炮仗我爸爸抱了弟弟，拿根斡叉头伊叉到窗门外头放。

小辰光一个过年，我伲屋里就是迭能全家总动员。

过去，一年365天，凡是工作嗰大人一礼拜就只有礼拜天休息，一年只有春节、元旦、五一、十一会放几天假，一年嗰休息天一塌刮子52天，即使生活迭能艰辛，大人也没觉着过年嗰忙碌是个负担，还是老盼望过年嗰。欸些辰光，勿管大人小人，勿管富人穷人，过年侪会感觉是最最幸福嗰。

精彩回放：
新年，你好
过年
一语成谶，开年的上海没有太阳
辰光，请侬慢一眼走
巴结
“万宝全书”烟纸店
甜酸苦辣说年货
有一种思念，勿联系，勿打扰
择校勿亚于择偶（三）
择校勿亚于择偶（二）
择校勿亚于择偶（一）
雪花的快乐

图片来自渺渺

小编欢迎朋友们投稿，邮箱：[e-mail]，可以是文章配上音频的方式，不过音频一定是用上海言话读嗰。