那些年浦东个称谓
沪语朗读：余晖
朗读者
作者、朗读：余晖
还记得伊个辰光，挂勒海我伲嘴巴浪个称呼吗伐？曾经个浦东闲话是搿能个鲜活，如今，已经变得少有耳闻了……
作为一个要事体个浦东人，就细数几个越来越听大弗到个称谓。
大老倌是排行老大个男人个称呼，伊是常庄要摆闲话个人，是对有责任搭仔敢担当男人个尊称，一道出去吃饭，硬顶板伊买单，搿个是最生动个体现。
讨大娘子曾经是浦东人过去个风俗，是浦东人对新妇谦、恭、俭、让个期盼，大娘子往往一定是任劳任怨、孝敬长辈、相夫教子个好女人。
过房爷、过房娘，搿两个称呼，现在叫个人少了，过去呢，为了小囡好养活，勒拉浦东认过房亲是普遍个风俗，再普通也不过了，现在确实是少了，但是却是更加洋气了，侪认起了干爹，而更加让我想勿通个，是干爹从褒义词沦落到贬义词了，必过，至少过房爷、过房娘搿两个词义，还没从褒义到贬义吧！我也愿意听到搿个称呼。
勒拉高桥地区称呼老师叫先生个，保留至今，搿个是古镇人对有知识人士个骨子里向个崇拜，体现了高桥古镇深厚个文化底蕴。
漫步古镇老街，一边欣赏民国时期徽派建筑。搿种青砖黛瓦个江南院落，搭仔高高在上个马头墙；一边留恋一幢幢中西合璧个精致小洋房，我伲个脚步会得勿由自主个，慢慢叫个放慢了许交关。还可以偶然听到老人直接相互称呼先生个余音，好像是穿越勒拉民国时代，当时个江南风情就勒眼门前，搿种味道就是老上海个味道，叫我伲觉得邪气个嗲，邪气个适意呀。
高桥爷叔曾经是上海滩浪向个显赫一族，曾经是侠义个代名词，曾经是高桥没人敢欺凌个招牌，必过，勒拉今朝是没啥人敬畏搿个称呼个了。
刚刚听讲，高桥镇浪向有一支＂高桥爷叔＂志愿者服务队，我邪气激动搭惊喜，好像高桥爷叔开始变得更加富人情味了，温情起来了。
或许，搿个就是时代个烙印，时代个产物伐！
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号