开学季，采访我的外孙女
开学季，采访我的外孙女
作者：易中天
上海话改写：郭莉
沪语诵读：王浩峰
我个外孙囡今年升初中了。8月31号，伊到学堂去报到。9月1号，开学。今朝一家门吃饭辰光，我顺带便采访了伊。
“变成初中生了，有啥感想伐？”“呒没感想。”“哦！侬勿兴奋个啊？”“没啥兴奋。”“其他同学呢，也呒没啥个感想？”“也呒没呀。”“伊拉也勿兴奋？”“看到同学了，大家侪蛮兴奋个，但是升初中没啥兴奋个。”
问勿下去了。我个采访宣告失败。
当年，我变成中学生个辰光，是邪气兴奋个。因为当时有只规矩，小学生只好用铅笔，到中学生了，就可以用钢笔了。搿歇，我可以使用钢笔了，感觉真个是神抖抖个呀。
钢笔是可以插勒左边胸前头个袋袋里向，表示自家是有文化个。伊歇辰光，有只笑话：插一支钢笔个，是中学生。插两支钢笔个是大学生。葛末，插三支钢笔呢？迭个，一定是个修钢笔个师傅了。
到我个囡儿变成中学生个辰光，伊是勿是兴奋个，我有眼忘记了。但是伊个同学，是邪气拿伊拉自家当桩事体个。记得伊拉初一下半学期刚刚开学，大家勒一道讨论春游活动。几个同学侪勒讲：阿拉一定要好好叫春游，勿好像伊拉小学生，只晓得“吃游”。我听了心里向觉着好笑。自家只读了几日天中学啊，就口口声声“伊拉小学生”了？真是个！
但是啊，现在我个外孙女，伊讲伊一眼也呒没感觉。是勿是所有小升初个学生侪呒没感觉呢，我讲勿出。不过，有感觉有哪能，呒没感觉又哪能呢？
一代人有一代人个生活方式搭仔价值观念，阿拉老一代末，就勿要再自作多情了。对伐？我随口来了首打油诗：
长江后浪推前浪，
前浪何必回头望。
云帆高挂任他行，
收起你的指挥棒。
往期回顾：
图：网络 / 编辑：渺渺
赞 (0)