顶着毒日头，到西郊公园去白相（下）
沪语朗读：倪云华
顶着毒日头，到西郊公园去白相（下）
作者：沈嘉禄
改编：倪云华
推荐：丁迪蒙
到八十年代，阿拉已经学徒满师了，白相西郊公园个腔调就勿一样了，勿再去排队买盖浇饭，而是带两张塑料布勒草地浪向一铺，吃野餐了。牛津包里拿出来：面包、果酱、红肠、奶油话梅、口香糖、苹果加水果刀，还有外国翻译小说，一般是勿看个，摆摆样子。还有吉他，弦校得勿准也覅紧，只不过是拍两张照片罢了。
假使是男女同学或者同事一道去，葛末，讲讲笑笑个辰光也会擦眼青春个火花出来。反正是一来两去，就有了讲勿清爽个意思。要是勒学校里或单位里本来就是眉来眼去个，搿个辰光就是来得正好，其他个人应该识相眼，覅去当电灯泡了。
走出公园个辰光，回过头喵一眼，再望前头看，有一种感情会从心底里涌出来，恰少年同学，风华正茂，同学个友谊就加深了一层。从搿辰光开始，大家就觉得自己比没去过西郊公园个同学成熟了一点。
动物是勿好惹伊个
青少年白相西郊公园，要是勿去惹动物，搿勿就是等于白白里去了？所以，每趟去，再馋也要从嘴巴里向省眼面包出来，去喂喂活孙搭仔狗熊。
有个邪气欢喜恶作剧个同学，绰号叫“铲刀柄”，平常勒学堂里经常要去惹女同学，拿伊拉弄得哭，搿趟勒公园里，哪能可能去放过小猴子呢？“铲刀柄”拿老早就准备好个粉笔头包勒糖纸头里向，掼过去了。公园里向个活孙是见过世面个，多少聪明啊，剥开来一看，勿是好吃个物事，就冲牢仔伊乱叫，还拿伊拉通通红个屁股对牢仔伊。“铲刀柄”勿甘心，又摸出粒糖掼过去，一只母活孙一记头抢过去，怕拨抢脱，还特意跑到假山顶浪，剥开糖纸头闻了闻，味道蛮香个，就摆勒嘴巴里吃了。过脱一歇歇，突然之间哇啦哇啦叫起来了，还自家打自家个嘴巴，从山浪冲下来，勒地浪向跳个勿停。“铲刀柄”搿记得意了，原来啊，伊是拿团辣伙酱包勒里向，活孙上当了，辣得来要死。看闹猛个人侪笑得肚皮痛煞了，当时，阿拉根本勿晓得世界浪还有啥个动物保护组织。
“铲刀柄”还去惹大猩猩，开始辰光，大猩猩懒得理伊，只顾自家捉老白虱白相，伊悄悄个走到大猩猩背后头，用树丫枝去捅猩猩，没想到大猩猩突然对牢伊扑过来，捉牢铁丝网乱摇八摇，吓得“铲刀柄”脚一软掼倒勒地浪向，爬起来以后发现伊个屁股也湿脱了，原来是小便失禁了，搿趟轮到大家侪笑伊了。
还有一趟，阿拉踏脚踏车去西郊公园，一个叫“翘嘴巴”个同学想去花象鼻头，拿出香蕉晃来晃去，就是勿拨伊吃。搿象鼻头勿是吃素个，伸长仔鼻头绕到伊背后，“翘嘴巴”还是勿肯拨，象搭游客之间有条老深个“河浜”隔开来个，象鼻头吃勿到香蕉，从“河浜”里吸了一鼻头混汤水，喷过去，喷得伊一面孔加一身。经过象鼻头“过滤”过个水又臭又腥还有点发粘，虽然“翘嘴巴”勒河浜里汏了好几遍，但一直到勒公交车浪了，怪味道还是拿满车厢个乘客吓煞脱了……
本公众号最近发布的原创：
图片来自网络