妻子个秘密
诵读：曹凯
作者：周云海
沪语改写：冯济民
诵读：曹凯
朋友搭我讲伊妻子个一件往事，我一直默默个记勒心里。
朋友讲：当时,伊妻子睏勒医院病床浪，已经是吃勿落啥个物事了，上苍留拨妻子个辰光勿多了，伊个生命体征随时会得停下来。医生已经尽力，却也是无奈。心悲，我觉着天要塌了。
下半日，痛得睏勒病床浪个妻子，突然讲想吃椰芸月饼。离中秋节还有一个号头，还早唻，再讲，妻子向来勿欢喜吃月饼个。是哪能个啦？但我呒没问，更加勿会违背妻子个要求。我晓得，商家个月饼营销计划总归是超前个，月饼老里八早就铺天盖地个出现勒商场个货架浪了。于是，我马上去拿月饼买来了。
妻子显出老开心个样子。
我拿床背摇高，拿妻子个身体扶正，掰开一小块月饼，喂到妻子个嘴巴里。病痛折磨好像消失了，妻子慢慢叫个嚼嘴巴里个椰芸月饼，露出久违个笑容。吃了小半块，伊讲勿吃了，让我拿剩下来个吃脱。伊一直晓得我欢喜吃月饼。甜甜个椰芸馅吃到嘴巴里，拨舌头搅拌之后有得沙沙个感觉，满嘴巴个椰奶清香，真是好享受呀。
妻子是搿能个爱我。
伊要远去了，再也勿好陪伴我、爱护我了！呆呆叫个看牢仔妻子邪气消瘦个、呒没肉质感个面孔，我难以开心个享受迭个人间美食，我，吃勿落呀。
妻子虽然是勒拨病痛折磨，但思维仍旧清晰个。伊晓得自家剩下来个辰光勿多了，讲，要告诉我一个秘密。我当是是有关钞票之类个事体。不过，勿是个。
妻子讲：其实伊也欢喜吃月饼，勿是鲜肉个，而是蛮甜个广式月饼。小辰光吃饭，屋里呒没菜过饭个辰光，伊会得用白砂糖冲开水来泡饭吃；伊还欢喜吃酒酿，屋里自家酿个酒酿、辰光摆长发醺了，伊会得拿发醺个酒酿做水潽鸡蛋吃。还是小姑娘个辰光，每年中秋，屋里向有亲眷朋友送个、或者是自家买个月饼，大多数是伊吃个，阿哥总归让伊，父母呢，更加是品尝一小块、意思意思而已。
后首来结了婚，每年个中秋，阿拉要拨双方个长辈送月饼，以示团圆搭孝心。迭能，阿拉自家反倒呒没啥月饼吃了。现在个中秋节，好像成为了月饼个战场。价廉物美个传统月饼，大部分升级为包装精美个高档礼品，单位买个多，个人问津者少。妻子晓得我欢喜吃月饼，为了拨我搭小囡多吃眼，伊总归讲自家勿欢喜吃月饼。
迭个秘密囥了介许多年，我居然粗心个认为妻子是勿欢喜吃月饼个！
一面听妻子淡淡个讲，一面看牢骨瘦如柴、少有生命气息个妻子，我眼睛里侪是眼泪水。“吧嗒”，“吧嗒”，懊悔个眼泪沿牢仔面孔落到我手浪、月饼浪。为了掩饰自家失控，我豪扫咬了一口月饼，拨眼泪水湿着过个月饼，甜味道里向好像有一丝丝咸味道。我搭妻子讲，椰芸月饼真是好吃。
我已经晓得妻子啥体要吃月饼了。伊晓得自家可能撑勿到中秋节搿日天了。伊要吃月饼，是想念伊心中个美食，更加是为了延续我搭伊个相亲相爱，伊要搭我一道共同享受迭个人间美好个团圆！
往期回顾：
图：网络 / 编辑：渺渺