【140】“早6点半”杯第三届中国精美诗文大奖赛山石作品

阿奶做冰皮月饼

山石（上海）

“万里无云镜九洲，最团圆月是中秋。”每到中秋我就想念故世的阿奶，想念伊做个月饼。上世纪六十年代，市面浪中秋月饼侪买勿到，啥人会想到发明月饼新品种呢，阿拉阿奶就有本事拨伲尝到从来唔没见过个冰皮月饼。

我搭阿奶住辣浦东外高桥。高桥松饼搭薄脆是当地两样著名土特产。松饼其实是月饼个一种，不过伊一年四季有得买。伲阿奶是高桥老土地，当然会做松饼，伊做个松饼味道崭来覅起话伊，我天天扼高头盼8月半，好吃阿奶个月饼。搿辰光要买做月饼个作料，勿像现在尕便当，走进食品店，芝麻、豆沙、百果、核仁唠啥侪有，付过钱，拎仔就跑。阿奶做月饼，准备作料要整整一年。省下过年辰光配给个一眼眼芝麻核仁，日积月累省下一眼眼每月定量供应个豆油、面粉，年终配给个猪油更要费心思匟好，日长时久变质就不好用。所以，阿奶做月饼是一项巨大工程。

中秋前夕，阿奶极力格鲁拿出作料，做月饼哉。我辣边浪已经馋吐水哒哒滴，看伊芝麻磨成粉，拌猪油、核仁，拿出面粉揉面。我来生勿及跑去拿油瓶，脚下一拌，一个大跟斗，油瓶打碎。平时阿奶炒菜只撤个油屁，省下小半瓶豆油洒得一天世界。闯穷祸哉，我放声大哭。阿奶一面讲：“小郎，小郎，覅哭。”一面用手指沾地浪个油刮辣碗里。半碗豆油拌仔半碗土，月饼做勿成。阿奶拿面粉收捉好，帮我揩脱鼻涕眼泪，讲：“小郎，等一歇我拨侬做更加好吃个月饼。”只见伊舀仔大半碗黄豆，炒熟，磨成粉；拿糯米蒸成粢饭，捏成一个个糰子，里厢包仔满满一包芝麻馅，外面滚上一层豆粉，放进月饼模子一压。一只月饼就成功哉，阿奶拿伊送到我嘴边，我咬一口，满嘴黄豆香，再咬一口，满嘴芝麻香。阿奶问：迭个叫啥饼？我说，金黄金黄个，叫黄金糰！阿奶说，黄灿灿外皮裹仔煞白绝嫩个冰雪，叫黄金冰皮月饼。我第一次知道世界浪还有嘎好吃个另类月饼。我搭阿奶一人一口吃仔两只，再舍不得吃，十几只冰皮月饼侪囥进碗橱里。

第二天，月光下，家家点香，摆毛豆芋艿祭月。隔壁小英搭我同年，是我两小无猜个玩伴，我拉垃伊辣屋里吃饱毛豆芋艿，回家拿冰皮月饼拨小英尝尝，拉开碗橱，月饼勿见一只，我急得双脚跳。阿奶讲，伊拉屋里小囡多，小英乖，宁愿自家饿肚皮，让弟弟妹妹吃饱，伊营养勿良，体质差。阿奶菩萨心肠，拿月饼侪拨拉小英哉。

后来，小英终于熬勿过三年困难时期。是阿奶个月饼做得忒少，还是小英拿月饼侪让拨弟弟妹妹吃个缘故？我勿晓得。不过，我总觉得现在个冰皮月饼唔没阿拉阿奶做个味道崭。

【作者简介】黄顺福，笔名山石，1941年10月生，1963年毕业于上海教育学院，大专学历，后华东师范大学进修本科毕业。任上海印染机械厂技校语文教师兼企业报编辑，直至退休。大学毕业开始学习写作，作品大多刊登于新民晚报副刊，至今数百篇。2016年上海市民文化节写作大赛，投稿小说《贞玉》，荣获“百名市民写作高手”称号。