【上海话朗读】​湖畔听鸟

有缘勒太湖边浪小住一礼拜，搭湖山、树竹为伴，暂时拿浮躁尘嚣撇勒一边，称得上是人生一乐呀。

春天，湖畔各种生物侪充分张扬了活力，——树竹是最最兴旺个大家族，山峰叠翠，山因此而丰腴秀丽；芦苇丛勿甘示弱，沿河岸慢慢叫个托出来一大片，青葱有致，湖看上去也就更加活泼清俊了。由于树竹、芦苇丛个繁盛，湖畔个鸟类、虫类、鱼类就侪相应活泼起来，伊拉勿舍得搿个大好个春光，各自展示伊拉灿烂个生命。

勿晓得老早湖畔是勿是有兽类个栖息？要是有，也恐怕只好拱让拨鸟类做盟主了伐。湖畔是鸟个天堂、鸟个乐园、鸟个舞台，只有搿些鸟，再可以搭湖畔个美景相称，就是万物之主个人类也是及勿上个。

我漫步勒湖畔浓绿个树荫当中，细细叫个寻觅鸟个出现，树荫实在是忒浓密了，轻捷美丽鸟个身影常庄是一霎眼就勿看见了，“簌簌”作响个树叶子随牢我个心旌一道勒摇曳，搿倒是用勿着遗憾个，勒起落有致、密密层层个树叶之间，小鸟会得毫勿悭吝个拿伊拉动听个歌声撒下来，树叶像煞是簧片一样、拨轻轻叫个振响，让本来就婉转个鸟鸣声听起来更加美妙动听唻。

沿牢一路绿荫散散步，听听鸟唱歌是老开心个，就像是置身勒一条音乐长廊，轻音乐、小夜曲来勿及欣赏，殷勤个歌手尽自家拿手个歌曲献拨侬，勿要出场费，也勿图啥个掌声，当然，更加勿想做啥个大牌歌星，至多是突然之间飞跳到侬个脚跟头来亮个相，谢个幕，然后就一记头飞到别地方去赶场子了。走勒搿能介多姿个音乐长廊里向是勿会觉着吃力个，倒是感叹有辰光去参加所谓个音乐会，真个叫是吃力、受罪呀。

鸟个鸣唱是天籁之音，是大自然个赐予，伊勿拘一格，随性因兴而发，由此听鸟鸣唱也就随意、勿拘一格了，边走边听、有走听个意趣，睏下来听、又有睏勒海听个情致，夜听、晨听、晴天听、落雨听，真是各有各个妙音呀！

到了夜里，睏勒床浪，树林里向慢慢较静下来了，难得有一两记鸟声传过来，也许是小小鸟做梦了，梦呓也应该是甜咪咪个伐；倒是水禽，有常时显得勿大安宁，拿伊拉邪气异样个鸣叫声撒进夜空，断断续续个播撒，勒夜个寂静当中显得邪气突兀，搿声音像号叫又非号叫，好像勒笑又没勒笑，还有点像人个咳嗽声或者是梗嗝声。是勿是伊拉日里向吃鱼个辰光性子忒急，让鱼刺卡牢胡咙了？勿晓得哪能会个，听到搿能介个鸣叫声，心里向会得突然生出一种苍凉个感觉，勾联起人生履历当中失意个往事，所以也就勿难理解古代人个闻秋风雁鸣、马嘶残雨辰光悲凉个感觉了。造物主真是周全呀，就是勒调度鸟鸣个辰光也勿忘记勒一片欢乐当中掺一眼悲凉进去，让人生变得全面，让人勿要忘乎所以。

水禽终于也睏着了，乃末，湖畔是彻底个肃静，但我个梦还呒没肃静，梦里向充盈勒各种鸟个啼鸣，虚幻个鸟鸣又老快个衔接上了清晨个实实在在个鸟鸣。

清晨个鸟鸣是最最撩人个，勒海枕头浪向听实在是情趣盎然。憋了一个夜到了，无数个小小歌唱家迫勿及待个登场演唱。我所可以听到个，少讲也有十几只勿同个鸟类勒歌唱，呒没指挥，却是邪气热烈、老有秩序个，还是多声部个演唱。唱个是啥呢？唱个一定是情歌，是“婚礼赞”之类个情歌，咏唱者呢，全部侪是新郎搭仔新娘。搿春季个清晨是伊拉个蜜月之晨，伊拉哪能可以勿去歌咏、礼赞呢？搭鸟类个搿种无羁无绊个幸福相比，我伲人类要差得远唻！一千多年前头，有搿能位少妇“打起黄莺儿，莫教枝上啼。啼时惊妾梦，不得到辽西。”讲个是少妇刚好做梦去搭远征勒辽西个人相会，结果呢，拨黄莺个啼鸣惊到了伊个梦，相会是勿成功，伊恨鸟个歌唱，所以要去打、去赶脱勒唱歌个黄莺。我认为，伊可能还有另外一种意思，葛就是黄莺正好勒唱情歌，让少妇有个一份情怨，现在或许也会有春怨存在。

鸟类是勿解人间个恩、怨、喜、愁个，伊拉只晓得无忧无虑个歌唱。雨突然来临，淅淅沥沥，鸟依然勒鸣叫，经过了雨个滋润，声音变得更加水灵透明了。雨，真是好呀，让暮春个湖畔刷然一新，还增添了一道道“叮叮咚咚”个泉水声，像煞是勒勒搭鸟个鸣唱衬托弹拨乐个伴奏。我突然觉着泉水叮咚声加上鸟个鸣唱邪气像明快流畅个评弹。

真个是听勿够啊，太湖之畔个鸟唱。

（本文作者）

（本文朗读者）

来源：“吳越小豬”公众号