为啥中国人个灵魂里本来就是莫扎特？

沪语朗读：高佩明

朗读者

为啥中国人个灵魂里本来就是莫扎特？

作者：傅聪

来源：中国古典音乐家网

朗读：高佩明

配乐：周俊

推荐：丁迪蒙

我勒外头常庄会得跟人家讲争，欧洲个基督教精神是有信仰搭仔智慧个勿同看法个。我有辰光跑到信仰搿搭，有辰光又跑到了智慧伊面，争来争去，呒没结果，其实迭个两者是勿好分开来讲个。

中国人是具有最高智慧个民族，到现在为止，像欧洲基督教精神搿能个信仰，中国人是老少个。中国人其实是有蛮高个怀疑精神个民族，不过就是勿大科学，是一种凭直觉个怀疑精神，凭一股灵性可以达到邪气高个境界。智慧跟知识是两桩事体，有常时一个最大个老学究，倒是呒没啥智慧个；一个普通农民，呒没读过啥书，倒是有邪气高个智慧。我觉着，要看中国文化，就去看中国个汉字，从中国个文字就可以看出中国人个智慧了。中国文字完全是莫扎特式个，譬如“明”迭个字，一只太阳一只月亮，三岁小囡也晓得个。迭个汉字结构组合看起来又天真又幼稚，但是偏偏就是有最高个诗意，最富有象征性个物事。我所以讲伊是莫扎特式个，意思就是最朴素、最天真、最富有想象力、最有诗意个。不过中国人个精神世界老早就达到了搿种境界，再看看艺术发展史浪向，倒是只有某几只高峰再达到，就象莫扎特。

我个父亲傅雷先生讲莫扎特个伊篇文章，有两句言话我觉着邪气精辟。伊讲：“假使讲，贝多芬交拨我伲个，是战斗个勇气，葛末莫扎特留拨我伲个，就是无限个信心”。为啥搿能讲呢？伊还有一大段可以单独拿出来拨大家仔细品味个：“勒勒搿能悲惨个生活中，莫扎特还是终生勿断个创作。贫穷、疾病、妒忌、倾轧，日常生活里向一切琐琐碎碎个困扰，侪勿能使莫扎特消沉；乐天个心情一丝一毫也呒没受到损害。所以伊个作品从来勿会透露出伊痛苦个消息，非但呒没愤怒搭仔反抗个呼叫，连得挣扎个气息也侪是寻勿到个。”傅雷先生最后搿句我勿完全同意，因为莫扎特有种地方还是有挣扎气息个，但伊总个来讲是竭力保持平衡，伊个大慈大悲个心理，即使是反抗，也永远带勒一种irony，迭只英文词蛮难翻译个，意思是哭里带笑，笑里带哭个腔势。

“莫扎特个心灵几化明智，几化高贵，几化纯洁！音乐史个研究专家侪讲，莫扎特作品反映个勿是伊自家个现实生活，而是反映了伊个灵魂！是个呀。伊从来勿拿艺术作为自家受难个证人，只不过是借音乐来表现伊自家个忍耐，搭仔像天使一样个温柔。伊自家得勿到抚慰，却永远侪勒勒抚慰别人，顶顶值得欣慰个，是伊勒勒现实生活中得勿到个幸福，伊会得拿伊勒勒精神浪创造出来，甚至还可以讲，伊先天就获得了搿种幸福，所以伊反复勿断个传达拨大家。精神个健康，理智搭仔感情个平衡，勿是幸福个先决条件吗？勿是每个时代大家侪渴望得到个吗？用勿断个创造征服勿断个苦难，用永远乐观个心情应付残酷个现实，迭个勿就是以光明消灭黑暗个具体实践吗？”傅雷先生迭个一段写得忒精彩了！一个人有了拿困难、痛苦侪当是呒啥物事，超临于一切考验之上个积极人生观，就有希望拿艺术里向美好个天地变为美好现实。所以讲莫扎特留拨我伲个，就是无限个信心。

我觉着，中国人传统文化里向顶多个就是迭个。阿拉当然也需要贝多芬，但是中国人勒灵魂里头，本来就是莫扎特。

我为啥介欢喜莫扎特，我之所以每趟回来碰到任何一桩小事体，侪会得让我马上乐观起来，就是因为我是中国人，中国人就是搿能介个，我个心也就是搿能个。所以我总归强调精神作用，对物质现代化勿感兴趣，因为我住勒现代化社会里，实在觉着交关现代化个物事老有问题个。欧洲社会有交关精神苦闷个问题，所以就有了啥个嬉皮士运动，天体运动咾啥，搿眼就是对伊种只讲究物质浪向个现代化个一种反抗。