理发的记忆 / 四六文摘

沪语朗读：姜继平

朗读者

理发的记忆

作者：陈永生（加拿大）

沪语改写：丁迪蒙

诵读：姜继平

理发，搿个勒上海个俗语里向对男女有勿同个称谓，男个叫“剃头”，女个叫“剪头发”，当然咾，后者要复杂眼，还有“做头发”“烫头发”个叫法。

上海对从事理发职业人个称谓是比较客气个，称之为“理发师”“剃头师傅”。相比之下，同样是服务性行业，其它有交关就呒没迭个“待遇”了，譬如“木匠”“铜匠”“铅皮匠”“泥水匠”咾啥，有个呢，甚至还要勒前头加上“小”，譬方“小皮匠”“小炉匠”咾啥，还有干脆勒后头加“个”，如“箍桶个”“补碗个”“修套鞋个”“修棕绷个”咾啥。

小辰光个上海，有邪气多剃头摊头，除脱剃头工具，全部家当就是一只面盆架子，一只櫈子，日出摆摊，日落收摊。虽然讲比较简单，服务项目倒是蛮齐全，剪头发、汏头、刮胡子、修面、挖耳朵咾啥。

等到我上幼儿园了，勒路浪发现还有室内个剃头，也就是理发店。伊在打浦桥西侧肇嘉浜路浪，门朝南。透过玻璃，可以看到里向个一切，几只特殊个椅子，铁个，固定勒地面浪，可以升降、可以转动，每只椅子个对墙浪侪有一面大镜子。更加奇怪个是，店个门口外墙浪还有一只竖勒海个灯箱，到了夜里向会得亮个，红、白、蓝三种颜色勒里向勿停个转动。

当然，直到懂事以后再晓得理发店门口头个灯箱个故事。

法国大革命时期，一个革命党个领袖拨追捕，伊一记头躲到了路边个一家理发店，逃过一劫。革命胜利以后，伊送了面红、白、蓝三色个国旗，挂勒店门口。辰光长了，为了避免风吹雨打，就做了只透明个箱体，拿旗旗帜摆了里向。后首来，几经改良，就成为了今朝搿个样子，成为了理发店个标志。

我第一趟进理发店是我屋里搬到裕德路后了。伊家店开勒裕德路浪，对牢我个弄堂口，大概有十几个平方，四只理发椅。理发师清一色是女个，伊拉原来侪是家庭妇女，58年大跃进拿伊拉“解放”出来，推到社会浪。女人理发，一开始人家是勿接受，按照老法讲，男人个头邪气重要，让陌生女人摸，会得带来晦气，上海闲话叫“触霉头”。

伊个辰光个上海，有正规个理发店，伊拉属于市商业二局，是理发行业个主体。上海各个地方侪有，勿少还是以前留下来个名牌大店，南京西路、石门路口个“南京”，淮海中路、复兴路口个“紫萝兰”，四川北路浪向个“人民”等等。

到了“文革”，搿眼高档理发店就受到了冲击，罪名是“旧社会个残渣余孽”“资产阶级个生话方式”。原来个店名像“白玫瑰”“紫萝兰”侪拨改成“人民”“大众”“红旗”咾啥，价钿也下来了，转为向“工农兵”开放。当然咾，原来个伊眼发型也拨扫进了垃圾堆，像“长波浪”“飞机头”“奶油大包头”“清水三七开”咾啥，侪勿好做了。

76年以后，走街穿巷个流动剃头师傅仍旧勒海。伊拉属于无证经营，所以是偷偷摸摸、鬼鬼触触个。胳络竹里夹个人造革个小包，里向只有推夹、剪刀、木梳以及围布，价钿便宜，只要1角。

伊个年代，年轻人邪气空，因此也有人自学理发，为大家义务劳动，当然，是最简单个一种，只不过“刨头”。

改革开放以后，上海有交关行业出现了个体户，剃头也是。伊拉有营业执照，有固定个地址，由于街面房子忒贵，也有人拿店开勒弄堂或者小区里向，当然，一般侪是底楼。

辰光过得真快，一眨眼出国已近三十年了，其中回国探亲蛮多趟，也总归免勿了要剃头，发现变化邪气大。

原先公有制的理发店已经勿多了，取而代之个侪是私人美发店。伊眼勒弄堂里、家门口个剃头师傅也勿大看见了。

时代勒前进，社会勒发展，生活也勒提高，剃头当然也是搿能个。