“冬至”吃冬酿酒了 / 四六文摘

沪语朗读：张华

“冬至”吃冬酿酒了

作者：张如君

朗读：张华

改写：郭莉

推荐：丁迪蒙

“冬至”节气到了。

我个出生地是苏州。记得我小辰光，就是上世纪三、四十年代，古城苏州勒勒“冬至”前几日，街头巷尾会得出现一道特有个风景线：无论酒店，还是街边巷口个小杂货店，只看见大人小囡侪手拿空瓶，去拷酒吃。“冬至”节气个苏州人，勿关男女老少，个个吃酒，迭个酒并勿是啥高梁白酒或者绍兴加饭，伊个名字叫“冬酿酒”。冬酿酒用一种特别个酿造方法，区别于一般个果酒甜酒。度数勿高，酒香扑鼻，另有一种滋味，所以老老小小侪欢喜。

吃“冬酿酒”是民间习俗，一年四季只有冬至日前头七天有得卖。冬至辰光家家户户祭祖过节，菜水也比平常辰光丰盛：白笃咸肉百叶结、红烧河鲫鱼萝卜、咸菜发芽豆、黄豆芽油豆腐咾啥，搿眼侪是地地道道个苏式家常菜，冬酿酒当然也是必不可少个。顶顶有特色个过酒小菜，是长生果肉搭仔香豆腐干。花生米跟香豆腐干一道吃，赛过吃火腿。其中还有一段轶事：据讲清朝金圣叹勒刑场浪向，对牢前来送行祭奠个儿子耳朵边头轻轻交代，勿是讲啥要紧事体，倒是对儿子讲，长生果肉搭豆腐干一道吃，比火腿还要鲜。金圣叹拿杀头置于度外，临死还勒勒传授饮食调味！迭桩事体当然是呒没办法考证个，但是一直流传到如今。

我小辰光，“冬至”夜是顶顶开心个一夜。有鱼有肉，还有冬酿酒，再讲小囡冬至吃酒，是长辈特批个。我当然尽兴畅饮。冬酿酒度数并勿高，不过吃多了还是要醉酒个。我五岁搿年，冬酿酒吃得稀里糊涂，下楼辰光脚呒没踏稳，一只跟斗滚到扶梯下。亏得冬天身浪棉衣着了厚，只是擦伤眼表皮，呒啥大事体，长辈拿我抱到床浪，我是昏冬冬一觉睏到大天亮。

小辰光总归盼望过冬至。我从四、五岁懂事体开始吃冬酿酒，吃到了八十岁，足足有七十几年酒龄，算得上是只“老酒鬼”了。回想童年过冬至个情景，真是另有一种乐趣。上了年纪，容易怀旧啊！

后来到了上海工作，每逢冬至，忙里偷闲，年年要到苏州买冬酿酒，从来也呒没脱脱过。但是现在情况搭以前勿同了，苏州城里只有宫巷元大昌酒店供应冬酿酒。去年我乘早车到苏州，寒风瑟瑟中，元大昌门口排队买酒个队伍足足有一、二百个人，大多是中老年。有人问我啥地方来，我讲是上海专程来买冬酿酒个，来回火车、打的，毛估估车旅费要一二百块，就是为了买几斤十几块洋钿个老酒。我迭能回答，排勒后头个一位老先生听到了，伊骂起“太平山门”来了：“真是吃饱了……”。我排了几个钟头个队，买好冬酿酒，勒勒回程路浪，心里想想，自家是勿是真个像迭个先生所讲，吃饱了呒没事体做，乘仔个火车来买冬酿酒。勿是，勿是！老先生啊，侬是长年定居苏州，呒没游子勒外地工作个感觉。我是长年离开生我养我个家乡，总归觉着家乡山山水水，一草一木，侪有一种特别亲切个感觉。勒勒饮食方面，无论糕点酒菜，样样侪顶对胃口。就是搿块土地，养育了我。就像歌词里唱个，啥人勿讲家乡好。

现在我生活安定，七老八十，还是蛮健康，老年生活幸福啊！今年冬至元大昌酒店门前，长长个队伍里，一定还是有我勒勒嗨个。只要健康情况允许，明年我还要到苏州来买冬酿酒。我一定要年年来，买酒买到九十岁。