朋友的圈 / 四六文摘

讲述：邵小芬

朋友的圈

作者：孔曦

文章来源：新民晚报

沪语改写：丁曙立

沪语讲述：邵小芬

推荐：丁迪蒙

自从有了微信朋友圈，交关人一记头就有了明星一样个感觉。今朝光顾阿里家饭店，吃仔阿里眼菜水告点心，或者是老同学开心聚会、姊妹淘穿衣搭配，“九宫格”一张张晒出来，得到交关点赞，成就感高涨。

搿些年，凡是认得一个人，“加只微信”几乎变仔一种礼貌。一场饭局下来，朋友又多仔好几个。常庄，对牢仔通讯录里向一串个微信名，有老多人一眼也想勿起来是啥辰光、啥地方、因为啥事体加勒海个。

有个人一日天要发几十条朋友圈，害得朋友侪讲吃勿消；有个人欢喜常庄变名字调头像，害得朋友认勿出咾寻勿着；更加多个人，欢喜设置“三天可见”，神神秘秘。

几年朋友圈看下来，我倒也有勿少心得。朋友圈个内容，大致浪可以分四类。

第一类是清清爽爽个工作或者赚外快。譬方讲代购啊、微商啊、做新媒体个、卖保险个、卖旅游产品个、卖培训课程个、兜移民生意个……第二类是各种晒。晒才艺，晒小囡，晒孝心，晒奇遇，晒有铜钿有辰光……还有囥勒滤镜美貌搭仔拼单奢侈品背后个历史悠久个职业；第三类是各种评论。指点江山、激扬文字，评热点时事搭电影、电视，大多数是转发个；第四类是大家侪头痛个各种拉票。

本质浪，朋友圈就像别墅个花园、公寓个客厅、公司个前台、店家个橱窗，只有光鲜搭仔亮丽。“灶披间”个平常、“卧室”个凌乱、“仓库”个拥挤，是见勿得人个。

最受欢迎个朋友圈，是自家嘲嘲自家。比方煎碎脱个鱼、烧焦个红烧肉，点赞搭评论最多。对人家个小洋相幸灾乐祸，既可以心情愉快，又勿会得觉着自家是坏人。

有一抢，对伊眼留勒海看个朋友圈，总归觉着有必要去点只赞，否则，好像显得勿重视人家。长此以往，点赞，竟然变仔一种负担了，要耗费交关辰光搭精神，一直到我读到迭能一句闲话——“一切需要刻意维护个关系，侪是勿牢靠个，侪是终将要消亡个。”好像是一盆冷水浇勒身浪。

是个呀，生命有限，光阴宝贵，做啥一定要面面俱到，去维持搿种呒没啥大意思个朋友？看朋友圈，就好比勒小区里向散步，看邻舍门前个花园，以放松心情为目的，又勿是中学老师搭小学老师个家访。空下来个辰光看看朋友个动态，觉着有意思个，点只赞；假使呒没辰光、呒没心情，勿看勿评勿点也呒没啥。真正个朋友，是拿起手机就好打电话个；是急难辰光可以直接要求帮忙个，勿会得看重点勿点赞。

前一抢，我发仔一条朋友圈——“近来瞎忙，呒没空看朋友个圈，有事体，请微信。勿再一个个通知了。”附了三只作揖个表情包。几日天勿发勿看，也勿点赞，前后左右蛮太平嘛。

线浪个朋友，含金量有多少，心里有数。忙忙碌碌个当代人，最好早眼看清爽朋友圈个真相，勿要再戆嗒嗒个，拨迭个圈圈进去。