如风往事之——讲讲钞票迭桩事体（方言文章）
嗰人勒拉每日呃俗常生活中，衣食住行侪是离覅开“钱”呃，今早仔科技已变得邪气发达，智能手机也畀广泛普及，吾伲身哴向可以覅带一分钱，只要拥有一部智能手机搭网络，就好去扫码支付。
勒拉上嗰世纪九十年代初中期之前，却覅是迭恁样子呃，科技还覅是邪气发达呃，还呒得啥呃智能手机，每家每户拥有私人电话也是邪气少呃，只要是走出嘞屋里厢，身哴向多多少少侪是要带一眼眼“钱”唻以防万一呃，就是生怕勒末生头有需要去使用“钱”呃地方。
勒拉老底子、勒拉通常情况下头唻讲伐，“钞票”迭嗰词眼（汇）就是指“钱”，而且“钞票”迭嗰词眼（汇）主要还是指纸币，畀“纸币”叫做“钞”，最最早呃辰光是勒拉历史哴向金贞元二年发行呃“交钞”，凡是面额100文到700文之间呃侪是畀叫做嘞“小钞”，伊是搭铸币同时使用呃。自从清朝政府发行嘞“大清宝钞”搭“户部官票”以后，两者之间合并起唻叫做嘞“票钞”或“钞票”。从此以后，“钞票”迭嗰词眼（汇）侪畀老百姓泛指为各种面额呃纸币搭银行券。到嘞清朝中后期以后，勒拉俗语当中，“付钱”就畀叫做“会钞”。
笔者是土身土长呃上海人，上海人对于“钱”迭嗰词眼（汇）是有得多种讲法呃。上海人欢喜畀“钱”叫做“铜钿”，伊呃上海方言閒话读音注音为：【dondie】,“钿”迭嗰词眼（汇）原本呃意思就是指：邪气珍贵呃金银珠宝首饰，然而，到嘞吴语方言体系当中，就畀泛指为金属制成呃、各种面值呃货币。上海人勒拉购买各种么事（商品）呃辰光，经常性会得开口去讲迭恁一句閒话：“迭样么事要几钿啊？！”或者讲：“迭样么事（商品）到底需要多少铜钿啊？！”还或者讲：“迭样么事（商品），杀根价到底是几钿吾好拿嘞跑啊？！”勒拉吾伲国家古代呃辰光，对于绝大多数呃普通老百姓唻讲，恁够得到一大笔钱，覅管迭笔钱，是银子（票），还是铜钱，侪是邪气覅大容易呃一桩事体，对大多数呃普通老百姓唻讲伐，伊拉只好呆勒拉屋里厢数数小面额呃铜钱，到嘞迭嗰辰光，“铜钿”迭嗰词眼（汇）就应运而生嘞，虽然“铜钿”伊原唻呃含义搭意思就是指“铜制呃钱币”，到嘞吴语方言閒话体系当中，尤其是上海人，覅管是各种面值呃“纸币钱”，还是其他材质呃钱，侪是畀叫做嘞“铜钿”，“铜钿”就等同于各式各样呃钱。“铜钿”迭嗰词眼（汇）是交关老派呃，到嘞今早仔，只有上嘞年纪、至少岁数勒拉七八十岁呃老爷叔搭老阿奶们侪会得去讲讲，恐怕今早仔呃年轻人，勿单单是覅会得去讲，还覅一定会晓得迭嗰词眼（汇）。
勒拉老底子，自从发明嘞“铜钿”迭嗰词眼（汇）以后，上海人还欢喜畀“铜钿”后头去添加“银子”迭嗰词眼（汇），就演变成为嘞“铜钿银子”，还因为自从有嘞“铜钿银子”迭嗰词眼（汇）以后，还去发明嘞三句俗语閒话唻，迭嗰三句俗语閒话分别就是：“铜钿银子关心境”、“铜钿银子性命交关”、“铜钿银子压煞人”。据说，勿单单是上海人会得去讲俗语“铜钿银子关心境”迭句閒话呃，勒拉江苏苏州地区呃人，也同样是会得去讲迭句俗语閒话呃，迭句閒话就是从苏州流传到上海滩哴向呃。迭嗰三句閒话所要表达呃意思搭含义，按照今早仔呃讲法是有得两种唻，第一是讲：某嗰人或某嗰家庭有得交关多呃铜钿；第尼是讲：铜钿覅是万恁呃，呒得铜钿却是万万覅恁呃。
当中国由半封建半殖民地跨入到近（现）代化社会呃全过程当中，同样是各种面值呃硬币，起先是发明嘞“铜钿”迭嗰词眼（汇），到后唻又去发明嘞“洋钿”迭嗰词眼（汇），迭两嗰词眼（汇），勿单单是具有嘞历史方面呃意义，而且还充满嘞时代方面呃气息，真可谓是两者兼而有之。勒拉上海滩哴向呃历史，当时光迭部列车驶入到嘞民国时期以后，凡是从外国引进到中国唻呃各种么事，上海人侪是欢喜勒拉各种么事呃前头去添加一嗰“洋”字，比方讲：勒拉老底子，落雨天撑呃伞，侪是畀叫做嘞“油纸伞”，自从由外国引进到上海滩哴向、新式轻便呃、落雨天撑呃伞，就叫做嘞“洋伞”；喫香烟烧饭所要去使用呃新式火柴叫做嘞“洋火”；勒拉老底子呃中国人是呒得啥呃电灯呃，到嘞夜到头，照明所使用呃油，畀上海人叫做嘞“洋油”；凡是种种，真可以讲是举不胜举，要是再去举例呃閒话，还恁寻到交关多。勒拉上海方言閒话当中，覅管是啥呃词眼（汇），只要勒拉词眼（汇）呃前头添加嘞一嗰“洋”字，眼扳数迭样么事侪是从外国引进唻呃。
“洋钿”迭嗰词眼（汇）也是覅好去例外呃，也同样是迭恁样子呃！就勒拉晚清民国时期，伴随着西方列强唻到嘞中国搭上海滩哴向以后，有得大批量呃外国“银元”流入到嘞中国搭上海滩哴向。顺大便要去讲清爽呃一桩事体就是——货币“银元”是由外国人率先发明出唻呃，“银元”起源于15世纪呃欧洲，到嘞中国以后，就畀中国老百姓俗称为“洋钿”搭“大洋”，迭嗰是对“银铸币”呃通称。然而，上海人最最欢喜叫“洋钿”迭嗰词眼（汇）嘞，还因为“洋钿”侪是由银子（元素）去铸造而成呃，所以上海人邪气欢喜勒拉“洋钿”呃前头，去添加一嗰“银”字，叫做“银洋钿”。因为笔者爱好收藏各种钱币呃缘故，还特特惠惠去查阅嘞覅少银币方面呃史料。根据历史资料显示，到嘞晚清宣统二年呃辰光，即：公元1910年，调查统计以后得出唻呃结论，就勒拉迭嗰一年里向，所流通呃各种中外银元，大约摸就有得十一亿枚之多，而且勒拉迭嗰当中，尤其是以“墨西哥鹰洋”唻得居多，“墨西哥鹰洋”就要去占据到全中国三分之一呃份额。
到嘞民国时期呃辰光，中国也去建立嘞银本位呃货币制度，银元就成为嘞最最主要呃流通货币之一，凡是由外国流通到中国唻呃、由银子铸造而成呃、各式各样呃银币，侪是畀上海老百姓叫做嘞“银洋钿”。实际哴向，到嘞晚清时期，也同样是去铸造嘞银币，最最早铸造银币呃辰光是勒拉“清光绪”时期，伊呃名称叫做嘞“光绪元宝”，到嘞民国以后，还铸造过以“袁世凯”搭“孙中山”为头像呃“银币”，为嘞表示搭外国银币是有所区别呃，凡是银币上头有得“袁世凯”搭“孙中山”为头像呃各种银币，分别就畀中国老百姓叫做嘞“袁大头”搭“孙大头”，老百姓就覅去使用“银洋钿”迭嗰词眼（汇）嘞。
自从发明嘞“洋钿”搭“银洋钿”迭两嗰词眼（汇）以后，辰光一长久而久之，勒拉老底子，至少辰光么要勒拉上嗰世纪九十年代初中期前头，勒拉上海人呃每日俗常生活当中，对于钞票呃数量单位唻讲，虽然钞票上头印有多少多少元，但畀过，从唻覅大欢喜去使用“元”迭嗰词眼（汇）呃，而是欢喜去使用“块”迭嗰词眼（汇），迭嗰还覅算数哦，勒拉“块”呃后头还要去添加“洋钿”迭嗰词眼（汇），覅管是去商店里向买卖各类么事（商品），还是去小菜场里向买卖各类小菜，勒拉询问价钿呃辰光，眼扳数是要去讨价还价呃，还会得去问问，迭样么事（商品）到底要几块洋钿啊？！迭条鲈鱼到底要支付几块洋钿好卖嘞畀吾啊？！还比方去讲：“一块洋钿”、“五块洋钿”，就算是讲嘞“角”搭“分”呃辰光，也眼扳数要去添加“洋钿”迭嗰词眼（汇）呃，五分洋钿一把葱，一角洋钿三块老姜……如果去讲几元一件或几元一斤呃閒话，营业员眼扳数要勒拉背后头去讲迭恁一句閒话呃，曰：“刚刚唻买么事呃人，真呃是一嗰标标准准呃洋盘，有一眼阿乡兮兮（滴答）呃，大概伊今早仔是刚刚从十六铺码头上头唻呃！”……
勒拉老底子、勒拉第四套人民币还呒得发明呃前头，钞票最大呃面额为“十元”，从大到小，上海人勒拉讲铜钿金额呃辰光，最后眼扳数要去添加“洋钿”迭嗰词眼（汇）呃，但畀过，也有得例外呃辰光，自从国家发行第四套人民币，票面面值有嘞50元搭100元面额呃人民币以后，上海人每趟仔讲到迭嗰两种人民币面额呃辰光，就再也覅去添加啥呃“洋钿”迭嗰词眼（汇）嘞，有得交关多呃上海人一致去认为，添加嘞以后，读起唻就显得覅大流利嘞，总觉着有眼拗口。
勒拉老底子，辅币呃面额分别就是“角”搭“分”，也就是今早仔所讲呃“零钱”。还因为勒拉老底子，上海人所使用呃零钱，侪是使用硬币唻得交关多，纸币呃零钱是覅大去使用呃，因此讲，上海人对于辅币（零钱）是有得两种讲法呃，第一种叫做嘞“铅道罗”；第尼种叫做嘞“铅角子”，“铅角子”呃上海注音就是为:【Khae Kok Tsy】。第一种讲法是因为：外币零钱（辅币）侪是硬币材质呃，而覅是纸币，“元”呃英文单词叫做“dollar”,所以上海人就采用直接音译法，畀“dollar”翻译成为“道罗”，久而久之辰光一长，中西合璧，就畀辅币“零钱”叫做“铅道罗”。第尼种讲法是因为：“角”讲呃是铜钿呃面值，“子”只畀过是名字后头呃一嗰后缀罢嘞，“角子”原唻呃意思是指以“角”为面值呃硬币，到后末唻就泛指为硬币搭零钱嘞。
凡是交关细心呃朋友，就会得去发觉迭恁一桩邪气有趣、有意思呃事体哦，覅管是啥呃面值呃铜钿，尤其是辅币铜钿，小到一分洋钿，大到一块洋钿，侪覅是采用“铅”元素去制作而成呃。噶末，为啥上海人欢喜勒拉最前头去添加迭嗰“铅”字呢？！就是因为，既覅管是土身土长呃上海人，也覅管是土生土长呃吴越体系人，是有得迭恁一种习惯呃，欢喜畀各式各样呃金属去统称为“铅”。就列举两嗰例子唻加以说明情况伐。比方讲：“铅桶”，实际哴向伊是由“铁”制作而成呃“桶”，“铅丝”，实际哴向伊是由“铁”制作而成呃“铁丝”。
勒拉老底子，上海人只要是讲到嘞铜钿或者钞票呃辰光，眼扳数是要去添加两嗰副词呃，迭两嗰副词就是“麦克麦克”。比方讲：“侬看呀，李家爷叔经过自家呃努力，开嘞一爿烟纸店以后，呒过忒多少辰光，赚嘞交关多呃铜钿，钞票也变得麦克麦克起唻嘞！”……意思就是讲：李家爷叔经过自己呃努力以后，经商获得嘞交关（非常）多呃铜钿（钱）。实际哴向，“麦克”迭嗰词语是英文单词“much”呃上海音译方式，伊是根据英语发音直接音译过唻呃，“much”中文含义搭意思就是指：邪气（非常）多呃。“麦克麦克”今早仔就讲得邪气少嘞，恐怕对年轻一代呃上海人唻讲伐，覅一定会晓得迭嗰词眼（汇）。
伴随着辰光呃流失，慢慢较“麦克麦克”就使用得邪气少嘞，自从“麦克麦克”迭嗰词眼（汇）覅再去使用嘞以后，上海人对于某家人家或者某嗰人，有得交关多呃铜钿（钞票）以后，欢喜用“分挺”、“挺分”搭“立升”迭三嗰词眼（汇）唻替代之。比方讲：“小张今早仔呃分蛮挺呃，袋袋里向侪是人民币，今早仔中哴向喫中饭呃铜钿，想办法就叫伊唻买一嗰单就好嘞！”还比方讲：自从有嘞电冰箱以后，侪会得去使用“立升”迭嗰词眼（汇），就是为嘞表示电冰箱呃尺寸到底是有得多少大小，久而久之辰光一长，聪明呃上海人，就畀“立升”采用拟人化呃手段去比喻人，但凡是有得交关多铜钿（钞票）呃嗰人搭人家，或者讲某些职权位高呃嗰人，侪会用“立升”唻替代，一般是讲人家有经济实力、有能力、有实权，是一嗰中性词眼（汇）。
除忒上头所讲呃，各式各样有关于“钱”呃词眼（汇）以外，实际哴向，勒拉上海呃方言俚语閒话当中，还有得交关多呃词眼（汇）是指“钱”迭嗰词眼（汇）呃，就继续唻举十嗰例子讲下去伐。
第一就是：嗰人所恁拥有支配呃私房小钱畀叫做“小户铜钿”搭“私房（铜）钿”。比方讲：私房铜钿么要囥囥好，要是畀老婆发觉晓得嘞以后，眼扳数要畀伊没收忒呃，到辰光活络铜钿就呒得嘞！
第尼就是：上海人欢喜畀小面额纸币叫“单票”，凡是票面金额低于“十块洋钿”侪畀叫做单票。比方讲：一块洋钿、五块洋钿。
第三就是：勒拉老底子，去商店或者烟纸店买卖各种么事呃辰光，找回唻呃零钱，上海人侪叫做“找头”。比方讲：有人买好嘞么事，对营业员唻讲道：“侬找头找得覅对头哦，还少找吾三角洋钿唻！”
第四就是：勒拉老底子，国家发行第尼、第三套人民币呃辰光，钞票票面金额最最高也只有“十元”，上海人除忒欢喜去讲“十块洋钿”以外，还欢喜去讲“一张分”，“一张分”就是指“十块洋钿”。
第五就是：勒拉交关长呃一段辰光里向，上海人还邪气欢喜去讲“一粒米”迭嗰词眼（汇），伊嗰意思搭含义是指人民币一万块。
第六就是：每嗰号头呃“工资”，上海人欢喜叫做“工钿”。比方讲：老张搭老李两嗰人是要好朋友，有一趟仔两嗰人勒拉一道谈山海经嘎讪胡呃辰光，老张就询问道：“侬伲子每嗰号头工钿好拿几钿，有得多少工钿啊？！”老李讲道：“每嗰号头税后好拿到工钿八千洋钿。”老李也同样向老张去问嘞迭句閒话，老张就接下去讲道：“侬覅要动气哦，侬呃伲子忒吾呃伲子是覅好比呃唻，伊税后好拿到一粒米！”
第七就是：上海人还欢喜畀“零钱”叫做“赖头分”，比方讲：还有得三五天功夫就要到10号嘞，到嘞10号侪是吾发工钿呃辰光，可惜吾袋袋里向基本哴向是空忒嘞，只省挺下唻一眼眼赖头分嘞。
第八就是：上海人邪气欢喜畀“路费”或“手续费”叫做“车马钿”。比方讲：时唻运唻推覅开，今早仔吾呃运道哪恁噶末噶好啦，吾畀股票侪都抛忒嘞，去忒嘞车马钿以后，正正好好赚到一粒米。
第九就是：上海人邪气欢喜畀“赚铜钿”叫做“扒分”。比方讲：有得两嗰要好朋友小王搭小孙勒拉一道谈山海经嘎讪胡，小王讲道：“侬近抢把勒拉啥呃地方高就扒分啦？！”小孙讲道：“吾还是勒拉原唻呃单位做生活，做一休一，休息呃辰光，通过炒股票唻扒分。”
第十就是：上海人畀“资金周转”迭嗰词眼（汇）叫做“调头寸”。比方讲：小孙业余辰光邪气欢喜炒炒股票，最近看中嘞某只股票，手头上头还缺少一眼眼资金，就问要好老朋友小王唻调嗰头寸，电话里向就对小王唻讲道：“侬是晓得吾欢喜炒股票呃，吾伲是要好老朋友嘞，覅好意思啊，今早仔吾要向侬唻调头寸，还缺三五万铜钿，只要侬肯借三五万铜钿，等到赚着铜钿以后，吾伲俩嗰人五五分账！”……
文章写到此地块，已经是接近末尾嘞，笔者还想去讲迭恁一句閒话，实际哴向，勒拉上海滩呃历史哴向，勒拉上海方言閒话发展搭演变呃全过程当中，有得交关多呃上海方言閒话，就是从英文单词直接音译过唻呃，覅是去采用嘞上海閒话呃读音方式，就是去采用嘞其他地方呃读音方式，比方讲“水门汀”、“司的克”搭“斯达特”……“水门汀”就是指“水泥地”；“司的克”就是指“拐杖”；“斯达特”就是指日光灯启动器；凡事种种举不胜举，还恁寻到交关多呃唻……