入群赛过孵浑堂 / 四六文摘

沪语朗读：沈玉麟

朗读者

入群赛过孵浑堂

来源：夜光杯

作者：李大伟

改编：郭莉

朗读：沈玉麟

推荐：丁迪蒙

群，是只浑堂，你勒群里，就好像孵勒浑堂里，水有几化浑，侬就有得几化龌龊。

我人生个第一只群，当然勿是微信群：是大学里个宿舍，八个人群居一室，学期结束辰光，只剩勒一把牙刷大家佮用。一个人生仔肝炎末，大家侪拨感染。啥叫江湖兄弟？两肋插刀，根本勿怕两败俱伤；“勿求同年同月同日生，但愿同年同月同日死”。啥叫袍泽兄弟？同生一只毛病——甲肝；同唱一首歌——《朋友》；连绰号也侪是连好仔个——大王、二王、三王、四毛。

迭个辰光个群，赛过是只染缸，缺点互相传染，还是免费个；也凸显了后来个互联网个经济特征：分享。

一只寝室就是一只群，我四年大学个最大成果是：有张文凭；最大个进步是：一只肝曾经发过炎，大概味道应该是有点咸了；最大个特色是：一句言话，好分两爿；最大个本事是：可以戏话连篇。

群，就是黄梅天，到处侪会得发霉个；群，又是只咸菜缸，就算是根铁棒头，也会得舔出三分咸味道。群，也是只川菜镬子，用勿着放啥个辣，烧出来个菜自然就是辣个了。

到了互联网时代，侬可以呒没屋里，但是勿好呒没一只群。现在见面，勿管侬熟悉勿熟悉，投缘勿投缘，首先是来加只微信，然后拉侬入群，简直就像从前辰光个拉壮丁。一只名字可以同时属于交关个群，赛过吃空饷。像死鱼虫沉淀勒下头，永远勿会泛滥；一只只死粉，永远也勿会冒泡，比潜水艇还要沉默。

特别是参加同学会、校友会，总归要拨人家个热情绑架。勒搿种场景里，侬勿吃酒，葛末有眼矜持了；侬勿吃饭，葛末好像是过分了。假使侬勿入群，葛末侬享受个待遇就是：侧目以待。人人侪觉着侬是个怪路子！现在辰光，勿结婚，勿是啥异类，呒没啥怪个。但是侬假使勿入群，简直是难以想象个了。

古代有句言话，叫做：“不知其子，视其父；不知其人，视其友。”现在当然是要改脱了，要搿能讲：“不知其人，观其群、察其文。”

看一个人品位个高低，看伊个群；看群个品位高低，就看伊转发点啥。勒群里向发个内容，可以折射出一个人个品位、趣味搭仔价值观。

每日天发“早安”个，就好像“今朝天气哈哈哈”，呒没言话去寻点言话，居然还有人去呼应，搿个就可以判断搿只群个基本面：群主热情过头、群众闲得发狂。要是侬勒搿只群里向混腔势，就好晓得侬其实是精神空虚、无聊之极。

要是转发个文章，标题总归吓人倒怪个，葛末十之八九是反常识个，看多了，侬也就戆脱了。蹲勒里向辰光长了，人会得越来越像只刺猬，欢喜去寻寻呴势。

要是转发个文章里，句子侪是石骨挺硬个，葛末就是勒瞎掼浪头，只讲论点，勿讲论据；假使再常庄放眼狠话，葛未迭个两种表现就是一票里货色，一只硬币个两面。迭个群就一定是愤青个吐槽池，就是痰盂罐头了。搿种群辰光蹲长了，人会得变得固执：总归觉着社会是黑个，天空是灰个，久而久之，就生出了仇恨，学会了叽唣，满脑子侪是悲观，提前进入“更年期”。

要是转发个文章，侪是眼排比句，十有八九是心灵鸡汤。搿只群，像啥是篇篇文章谈励志，但往住是一群“语言的巨人，行动的矮子”，伊拉是“敏于言而慎于行”。勒搿种群里辰光长了，侬就会得缺乏有所作为个动力。

假使侪是眼养生偏方，勒搿种群里，侬会得消极、疑神疑鬼，一张体检报告里，讲侬有一只小零件自然老化了，从此就杯弓蛇影，惶惶不可终日，整天捏好榔头去寻洋钉，拎勒斧头寻柴爿劈，要寻点事体！勒搿种群里，侬个情绪就一定是风前残烛，弱不禁风。