粗茶淡饭话养生 / 四六文摘

沪语朗读：徐佑琮

朗读者

粗茶淡饭话养生

作者：郑自华

来源：新民晚报2019-04-19

沪语改写：丁迪蒙

朗读：徐佑琮

我已年过七十，平常辰光勿吃啥补品，也勿大锻炼身体，但是我个各项生理指标侪蛮正常，迭个跟我平常辰光注意饮食养生，是有老大关系个。

《黄帝内经》讲：“人绝水谷七日死。”清朝个李渔勒勒《闲情偶记》里讲：“食之养人，全赖五谷”，可见，五谷是人类得以生存个主要食物。饮食就是最重要个养生。

但是，生活里向勿是每个人侪懂迭个道理。有种人每天只吃两餐，又有种人要吃四餐，就是三餐之外还要吃夜宵。吃夜宵，对身体危害性是邪气大个。侬一定要晓得：多吃半夜饭，少吃年夜饭啊！

我自家个饮食规律是：三顿饭勿“脱班”,勿多吃，勿少吃，平常只吃七分饱，我欢喜保持一点饥饿感。老古话讲，要得小儿安，略带三分饥和寒。小囡搿能，大人也搿能。讲来侬覅勿相信，我吃饭是讲“数量”个。交关年数前，我吃饭就只吃两小碗，勿多勿少，有人问我吃饱了伐，我回答，我只吃两碗。现在我是半小碗米饭，米饭里掺一眼五谷杂粮。

粗茶淡饭是我个一种生活状态，并勿是讲我勒勒过“苦行僧”个生活。早饭，大饼油条是我顶欢喜个，面包馒头我也欢喜，要是有泡饭加乳腐或者咸蛋，葛末顶顶开心了。中浪向，面条里向摆眼辣酱，浇头是隔夜剩菜，对我来讲就是美味佳肴。夜里向三四只菜，荤蔬搭配，价格适中，经常换换花样。李渔《闲情偶记》里讲：“饮食之道，脍不如肉，肉不如蔬，亦以其渐进自然也。”我迭个人勿挑食，欢喜吃个，多吃一眼，勿欢喜吃个，就少吃一眼，为了保证营养均衡。大千世界美食交交关关，各大菜系，特色小吃，数也数勿过来。为此有人发出感慨讲，唯美食不可辜负也。我当然也欢喜美食，但是“不可辜负”勿是讲就要呒没节制。节制是邪气重要个，侬自家一定要有抵制诱惑个自律意识。

我觉着，以下三种情况顶容易放纵自家：一个是吃喜酒。一般讲来婚宴标准侪比较高档，台子浪向摆个侪是名酒。有人会得想，此时不勿吃，更待何时？乃末美食吃到松皮带，老酒吃到晕淘淘；还有一个是吃免费。台子浪摆个是免费提供个碳酸饮料，有人会想勿吃白勿吃。我朋友个儿子，特别欢喜碳酸饮料，每日天要灌好几瓶，结果年纪轻轻就骨质疏松，三十多岁就只好睏勒床浪向，看毛病也要爷老头子背伊下楼；第三个是吃自助餐。有人定规要拿本钿吃回来，所谓饿到扶牢墙壁进来，再吃得扶牢仔墙壁出去。吃了中餐吃西餐，吃了海鲜吃甜食，价钱钿越贵越吃。搿种暴饮暴食对身体伤害是大得勿得了个。

我一直寻开心讲，现代人呒没饿杀个，只有吃杀个。总结我自家个饮食养生经验，我自家写了一副对联：吃多吃少，三顿饭顿顿不落，须有规律；吃好吃坏，各样菜样样侪吃，注意节制。