再谈上海人称谓密码（下） / 四六文摘

沪语朗读：徐佑琮

再谈上海人称谓密码（下）

作者：李大伟

改编：郭莉

朗读：徐佑琮

推荐：丁迪蒙

倘使要叫“先生”，葛末侬一定就是陌生人了，关系一定隔得老远老远，远到了天涯海角。上海人就是搿能，待侬一客气，实际浪就生分了，就是有距离了，就有戒心了，就只好讲讲客气言话，乃末“一拳来，一脚去”——客来客气：“今朝天气”？“哈哈哈......”！上海人叫迭个是“假客气”，既然是假字当头，自然也就呒没啥真言话了。譬如早浪向见面，“吃了伐”？没吃过，但是也要讲：“吃过了”。假使实话实讲：“还呒没吃”，就叫“勿客气”了，是逼牢对方请侬，让问言话个人下勿来台阶。勒勒计划经济时代，就像电影里一句台词，叫“地主屋里向也没啥余粮个呀”。彼此还没亲密到佮着一条裤子个程度，就勿大可能请侬到屋里去吃饭。实话实讲，就是勿会嘎山湖，勿会聊天，一开口就拿人家噎死脱了，上海言话叫：将军！所以要客来客气，没吃过讲“吃过了”，搿是假言话，假言话就是客气闲话，客气就是假客气，就是会嘎山湖会聊天，搿就是文明人必须犯个“美丽的错误”。看来，礼貌搭仔虚伪是一只硬币个两个面，相辅相成个。

倘使是老朋友，早浪向勒勒路浪碰着，拍拍肩胛：“走，陪我吃早茶去”，搿等于命令，绝对勿会问：“吃了伐”？要是一副问言话个腔调，对方就会板了面孔讲：“兄弟，侬到底让我吃，还是勿吃？”朋友之间讲客气言话，侪是瞎讲。上海人有句口头语：“瞎讲有啥讲头啦”！讲真言话，就是勿客气，勿客气再是真客气。人家一听，就晓得搿是一对宝货，侬就是真个吃过了也要陪伊去，否则就勿拨面子了。所以要舍命陪君子，减肥计划只好报废。特别是夜里向准备睏了，来了手机讲“请侬吃夜宵”！搿勿是等于叫侬吃发酵粉增肥么！乃末呶，搿是绝对个老朋友。

到了新世纪，上海人个见面称呼又变脱了：是拿侬个小名加尊称。譬如我曾经个学生，看见我叫我“大伟老师”。直呼老师个名字，勒勒古代是大不敬，但是现在搿能是亲切平等，还暗示了侬迭个老师从来勿摆“老魁”个。尊称是敬重，亲情有了，感觉也有了。小名加尊称呢，是新世纪上海人个见面招呼语，侬可以从中判断：伊一定是上海人家个。上海人家就是爷娘也是上海户籍个上海人，迭个也是上海人个称呼密码。

现在个上海，是中国化个上海，欧美化个上海。上海变化忒大了。上海人个尊称也发生裂变了，也分叉了。现在见面称呼侪是：老板。就连得象牙塔里个研究生，也称自家个博导：老板！因为伊手里捏牢侬个课题经费，赛过老板一样，是紧掐牢侬个生命线——生活费个。老板看见当官个，就像翻译官看见皇军，低头哈腰，一眼呒没做人个准则。所以现在上海滩个酒水浪向，流行个见面尊称就是：领导。不过迭个是上海人个腔调伐？哪能跟北方人一式一样了，拨人家同化了，衙门化了。

听到称呼是尊称人家“领导”，侬就可以断定：对方勿是真正个上海人，或者伊正勒非上海人个圈子里聚会，否则是勿可能有搿种介刮三个叫法个。上海人有自家个场面浪向个规矩，但是等级观念勿强个，“领导”两个字，一般是哪能也叫勿出口个。因为对迭个词陌生，所以邪气勿顺口。侬记牢，凡是叫“领导”顺口个，伊拉绝对侪勿是上海人。