故里春秋（十四）
作者：朱海洪
沪语改写：边秦翌
沪语讲述：曹慧娟
新昌路是一条市井风情街，一排生个店家一个一个挨勒海，像煞是五线谱高头个音符一样。
“承兴里”弄堂口朝南方向是“广泰”烟纸店、老虎灶熟水店、“新昌”文具店，“广泰”对过，“新昌路第一小学”到“三德里”之间是一排小吃店个摊头；“承兴里”朝北方向挨下来有“勤裕”南货店、“承兴”烟纸店、“华安”理发店、石灰店、裁缝店、“大东”酱油店、“承兴”服务站搭仔青岛路转弯角子个一家南货果品店。马路对过个“厚德里”、“懋益里”边浪有香烟、老酒、水果咾啥个杂货店，再过去就是山海关路小菜场了。解放之前搿搭还有一家當铺，墙壁浪曾经有过大大个“當”字，读到迭个“當”，像煞是一声历史个回音。
新昌路表面看上去狭小繁杂勿起眼，实际浪里向是藏龙卧虎，有勿勿少少个精英名士，排了第一名个要数居住勒“懋益里”个邓散木。
邓散木，是现代书法家、篆刻家。伊个书法雄浑拙朴，真、行、草、篆、隶，五种字体侪精通。一开始，邓散木拜李肃之为师，后首来有幸得到赵泥古、萧退庵个亲自指导，艺事大进。伊个行书、草书，有得二王、张旭、怀素个特点，再参考明末清初王觉斯、黄道周两大家，又从封泥、古陶文、砖文里向吸取营养，形成了自家章法多变、雄奇朴茂个风格。从二十年代开始，伊个书法、篆刻就名扬海内。勒勒1931年到1949年之间，伊勒勒江南连开12趟展览，获得“江南祭酒”之美誉，而且还搭齐白石齐名，人称“北齐南邓”。
邓散木，迭个人邪气清高孤傲，年轻个辰光因为崇拜孙中山而参加了国民党，伊也参加过辛亥革命；后首来勿满时政，佯狂避世，自称“粪翁”：“非敢求惊人，聊以托孤愤”，因为伊个行为邪气怪异，拨人家称之为“怪杰”。
勒勒生活当中，邓散木勿看电影勿听戏，只欢喜吃老酒，而且酒量吓煞人。有一趟告人家打赌，一记头吭了整整一坛黄酒，足足有得五斤哦，旁边看个人侪呆脱了。伊常庄欢喜请朋友吃老酒，借了老酒发牢骚、骂人。1935年，邓散木搭徐悲鸿勒勒南京个一家酒楼吃老酒，两个人一面吃一面骂，拿上上下下侪骂了一遍，旁边听个人侪吓煞脱了，统统跑光了。
邓散木一辈子研究伊个艺术，有一只习惯保持了几十年，伊每天天勿亮就起来了，临池刻印，一直到太阳出来之后再吃早饭。到了晚年，伊一直勒做书法个普及工作，写了好几本关于书法个书，有得《篆刻集》、《书法百问》、《怎样临帖》、《邓散木诗词选》咾啥。解放之后，邓散木拥护新政权，为自家刻了“孺子牛”、“为工农”等印章，表达了为人民服务个新思想。
1955年，邓散木还为毛泽东治了一方印章，迭块石印呈立方体，明黄色，顶部镂空琢双龙，印个边款刻有“1955年8月，敬献毛主席，散木缘时五十有六”字样。迭块印搿歇保存勒勒韶山毛泽东纪念馆里向。
邓散木1898年出生勒上海，长期居住勒“懋益里”，曾经勒里弄做过居委会主任。1955年，邓散木迁居北京， 1963年过世。
常庄听老同学讲起邓散木，可惜一直呒没迭个机缘能够碰着伊。一直到我“上山下乡”个辰光，机缘巧合我看到一本邓散木个《積玉》书法帖，搿是我个皖南山中同事个宝贝，里向个行草书品，潇洒飘逸，赏心悦目。
还有一位沪上名人石筱山搭新昌路也有眼瓜葛。
新昌路浪有得两条弄堂侪叫“三德里”，以南、北来区分。勒勒北“三德里”弄堂口个高头曾经横有一块牌匾：“骨伤科专家石筱山”。我一直以为石筱山就住勒“三德里”，后首来再晓得是伊个徒弟借牢仔师傅个大名勒此地行医。
石筱山是中国医学界最最有名个骨科专家。早年伊勒“上海神州中医专门学堂”读书，后首来跟伊拉爷石晓山从医。1929年搭自家个亲阿弟石幼山一道勒勒连云路开设诊所，创立石氏伤科一大流派，以善治骨折伤痛而闻名于世。1952年伊曾经担任上海公费医疗第五门诊部个特约医生，1956年还兼职过附属龙华医院伤科主任。
勒新昌路浪，我还看到过刚刚出道个梁波罗，伊个辰光伊就住勒“松柏里”。
1961年，电影《51号兵站》上映勿久，有一日，梁波罗勒勒“广泰”烟纸店买香烟，旁边还有一位朋友，伊邪气轻松自然，勒勒搭朋友讲闲话。因为“小老大”初露头角，认得伊个人并勿多，也呒没人围观。年轻个辰光，梁波罗英俊斯文，看上去比当今社会个“小鲜肉”勿晓得要清新脱俗了多少。
名人雅士为小弄堂平添风采，鲜活个人间风情其实还是要挖掘市井乡野。
朗读者
往期回顾：
图：网络 / 编辑：渺渺