外婆个烂糊肉丝
沪语朗读：洪瑛
朗读者
外婆个烂糊肉丝
来源：夜光杯
改编：丁迪蒙
朗读：洪瑛
最近，勒报纸浪两次看到赞美大白菜，也就是上海人叫黄芽菜个文章，自然就勾起了我对我外婆烧个烂糊肉丝个美好回忆。
要是拿中国菜也分成阳春白雪搭仔下里巴人，烂糊肉丝就老有可能拨大家归到“下里巴人”一类里去个。不过，我觉着烂糊肉丝对人勿分贵贱、老少，对地方则是勿分东南西北，一律通吃；就凭伊出自家庭个厨房间，倒是也登得上酒店个气势，勒“料理江湖”浪个格调，也就应该是融合了阳春白雪搭仔下里巴人两者个品性特点了。
烂糊肉丝价钿邪气亲民，勒七十年代个工厂食堂里，迭盆菜只要八分洋钿。便宜，也是我外婆欢喜烧搿只菜个主要原因。原料呢，就是黄芽菜搭仔肉丝。黄芽菜是蔬菜里向顶便宜个，还经得起长时间存放。伊总归是素面朝天，白玉一样个菜帮，跟嫩黄个菜叶子搭配起来，与世无争但又楚楚动人，上海人之所以叫伊黄芽菜，真个是有几分怜花惜玉个意思呀。
黄芽菜是随便侬哪能搭配个，不过伊搭配荤菜会得更加好吃，我常庄听外婆讲，黄芽菜欢喜轧大道，只有搭荤菜搭配了，黄芽菜个味道再出得来。
烂糊肉丝里向个肉要选猪猡个腿肉或者里脊肉，是猪肉顶顶鲜嫩个部位。一般来讲，带了点荤腥个菜价钿就要上去眼，但是“肉丝”只不过是“丝”，所以也就贵勿起来了。重点是：烂糊里向个肉只有切成丝，再好看，再显得娇贵，再会得挑动人个味蕾，假使刀工勿到位，搿道菜也就呒没细巧个风韵了。当然咾，为了跟肉丝相得益彰，黄芽菜也要切得根根像白玉细丝一样，勿好忒粗个。
中国菜讲究色香味齐全，其中色是第一位个。不过，烂糊肉丝又勿好浓妆艳抹，用色相去迷人，伊是从容、自信个，只以本色出场，黄白相间，稍微有点点葱绿，视觉浪向是简洁明快、爽心悦目个。要是侬肠胃勿大适意，厌弃了油腻、没啥胃口个辰光，搿道菜清清爽爽个颜色，就会得刺激侬个口食之欲。
烂糊肉丝只用两种食材，有荤有素。肉丝个营养价值大家侪晓得个，黄芽菜呢，百度浪向讲，伊是含有多种营养成分个，还有清热除烦、解渴利尿、通利肠胃个功效，经常吃伊，还可以预防坏血病。
烂糊肉丝烧起来是邪气便当个。当年，我个外婆勒煤球炉浪一面烧，一面让我勒边头看勒海。伊讲，烂糊肉丝搿只菜，主角是黄芽菜，吊鲜头个是肉丝，所以呢，肉丝就要用眼绍兴老酒、盐、生粉拌拌匀，腌脱一歇，让伊入味。炒菜个辰光呢，外婆等铁镬子里向个油有得七、八分热了，就拿肉丝滑进去煸炒，一变颜色断生了就可以捞起来了。乃末再拿黄芽菜丝倒到镬子里去，煸炒到菜出水了，就盖好镬盖，转小火烧，直到菜软熟了，再拿肉丝倒进去，大火翻炒均匀，最后可以加眼味精，再着黏，然后就可以装盆了，外婆最后还勿忘记撒眼葱花。做好迭眼事体以后，外婆就拿嘴巴一努，叫我拿烂糊肉丝端到吃饭台子浪去。
外婆烧个烂糊肉丝用筷子搛起来，黄芽菜丝跟肉丝侪是有样子个，一点也勿烂糊，每一根菜丝、肉丝侪裹勒包浆，送到嘴巴里去是满口个鲜美呀。
我欢喜拿烂糊肉丝倒到饭碗里向，跟饭拌勒一道吃。迭个辰光，烂糊肉丝个本色就充分体现出来了，好像菜个精华侪融化进了饭里向。要是大冷天，外头落雪，放学回到屋里向，捧一碗有烂糊肉丝个饭哗啦哗啦吃下去，立时三刻就觉着浑身热乎乎了。
到我成年工作之后，只要单位食堂里有卖烂糊肉丝，我是板要买个，边吃，边回忆外婆个味道。
时过境迁。小辰光个味道总归是叫人难以忘记个。最近，有趟我弯到一家路边小店里向吃饭，年轻服务员向我推荐咖哩饭，伊讲，现在个年轻人侪欢喜吃个，乃末，我就想体会一把年轻个感觉。不过，吃完迭盆咖喱拌饭，我还是勒想伊只热乎乎个烂糊肉丝淘饭了，可惜呒没一家餐厅，勒烧搿只完全可以做外卖个盒饭。
往期回顾：
图片来自网络