我的服装简史
沪语朗读：友好
朗读者
我的服装简史
原创： 徐慧芬
来源：文汇笔会2019.4.21
上海话改写：郭莉
朗讀：友好
推薦：丁迪蒙
我小辰光有一件泡泡纱连衫裙，白底红花，黑线条连起来个枝叶。腰带环过来，就是一只蝴蝶。
搿辰光我六岁，我姆妈自说自话，觉着我已经识得勿少字，可以读书了，就带我去碰碰运道。想勿到开学辰光，校长真个托人带信，讲有个学生转学，空出只位置，乃末我就当了插班生。我姆妈开心煞了，认为就是伊让我着得介漂亮，校长所以记得我个。
后来我进中学了，开始长身体，人長了交关。有一趟，我着了我姆妈个一件深玫红小尖领个收腰衬衫，配了一条黑裙子。到学堂去出黑板报，老师看见我讲，侬個衣裳真好看！我心里蛮适意個。侬要晓得，欸歇辰光提倡艰苦朴素，衣裳要是有得补丁，呒没寒酸相，倒是老“雷锋”个。
草绿色军装流行辰光，姆妈请裁缝用毛蓝布搭我做了一件“青年装”。青年装比军装更加简洁，直领，三只贴袋。伊個辰光也算是邪氣时兴个。我有搿件青年装，人家侪老眼热个。
我呒没去“上山下乡”，留勒屋里待业，葛末就要有眼事体做做。想到反正有缝纫机，所以就买了本裁剪书，自学做起裁缝来。第一趟捧好自家做个裤子送拨姆妈看，姆妈连声讲好好好，自会自便当！七十年代我搭自家做了几件衬衫跟一条百褶裙。别出心裁，用黑白条纹布，裁成滚条，嵌勒白衬衫领头、门襟、袖口、袋口此地。我着勒衬衫，夹了一本当时热门个《哥达纲领批判》，去拍了一张照片，摄影师穷讲我個衬衫漂亮。
淡蓝顏色個“的确凉”面料有点透明，但打了褶就勿透了。百褶裙难弄就是褶多，要候分掐数计算好，布料接缝地方还要囥勒褶里向。呒没电熨斗，只好拿烙铁放勒炉子浪烧，温度高低侪靠自家個感觉。为了一条裙子，我闷头做了一整天。去参加我老师个画展开幕式，我着勒搿条百褶裙，配了同样颜色个衬衫。后来老师画了一幅《蓝衣女子》，伊讲是我拨了伊创作個灵感。
搿已经是七十年代后期了，大家個审美观念静悄悄個起了眼变化，衣裳别致，弄出点花頭經來，也勿觉着是“追求资产阶级生活方式”了。
八十年代初，审美观念也开始跟世界接轨了。先是西装成為了新宠，乃末夹克衫、运动衫、花格子衬衫、蝙蝠衫、棒针衫、牛仔裤、小包裤、喇叭裤、踏脚裤、直筒裤咾啥，是轮番登场呀。
我有一日勒陌生頭看见了.传统個蓝印花布，一记头就深深個爱上了伊。我欢喜伊清清爽爽個青白两色，有一种乡土质朴。我更加欢喜蜡染扎染工艺所呈现出來個天真自然个风格。我买了一段段当艺术品出售个蓝花布，又觅到了云南特色个蓝印土布。用迭个做成功各種式樣個衣裳、裙装，着起来走勒外头，有眼招摇过市感觉，想想自家也算是领风气之先了。
经过八十年代花样百出个服装变革，九十年代服装已经变勿出啥個特别個式样了，大家也勿哪能紧跟某种式样去转了。我呢，人到中年，各個方面侪忙得勿得了，勿再肯花辰光去踏缝纫机了，也舍勿得多花辰光打扮自家，着衣裳也就随便起来，一件工作服整天套勒身浪。有一日，过来一个男生搭我讲，老师，侬搿件工作服，简直像是讨饭个著個！听得我一記頭呆脱了！我嘴巴浪回伊一句：艺术家就是讨饭个！心里勒勒想，小鬼！明朝我拨侬颜色看。
第二天，我头发盘得蠻高个，一双麻编個高跟鞋子，一件黑颜色個缎面拉链夹克衫，露出里向套衫個几何图纹。一条割绒面料個长筒裙，深藏青底色，鲜艳个花样，顯得邪气显眼。搿套行头我自家也觉着忒惊艳了。我存心跑到迭个男生个班级，朝里向张了一记，教室里向一片“嗬——”，我马上转身，估计伊个男生脑筋还来勿及转弯，我勿睬伊就跑开了。
廿一世纪，大家对穿衣着装态度更加放松自由，呒没人要来管侬着成啥样子，大家完全是见怪勿怪了。不过对衣料质地，服饰品牌，好像有了特别个重视搭仔追求。我随便勒勒一家服装公司看见模特身浪個一件衬衫，眼球立马就勿会动了。营业员讲伊是进口面料，价位是我当年小半个号头个收入。我犹豫了半日天，最后还是勿肯放手。现在心里還勒庆幸：当初搿笔钞票出得勿冤枉。
还有旗袍。伊八十年代复出個，作为时装，至今方兴未艾。现在伊既是大小舞台女人走秀个引领，更加成为伊拉出席各类喜庆活动个首选华服，只要侬身材体态差勿多标准就没事体了。五年前頭，我勒一家貌不惊人个鸡毛小店，看到一件丝麻料作個长衫。大气，简洁，宽松。老式大襟，腰带一缚。热天介坐勒电脑前面，身浪着个是伊，只觉着凉爽静气生，文思滚滚来。
岁月不居，人一眼眼老了。选衣裳越来越平淡，舒适得体是第一。有种陈年旧衣裳，因为价值所在，我还是着个。有种虽然处理了，但记忆还是邪气鲜活。
每一件留过侬体温个衣裳，见证过侬一段段生命喜怒哀乐，儕留下了时代变迁個印记，是最值得人记忆个。
往期回顾：
图片来自网络