身影
来源：新民晚报
作者: 吉建富
沪语改写：冯济民
文字修正：丁迪蒙
诵读： 与人为善
写下《身影》迭个标题，我已经想到了伊个含义。按照第6版《现代汉语词典》对“身影”个注解，就是身体个影子。我觉着要进一步引申个闲话，答案并勿是简单来西个。
所谓形影勿离，首先要有“形”；形，就是身体，影，就是身体个影子。而影子个出现、必须要有“光线”，离开迭个前提，是看勿到影子个。假使是日里向，必须勒阳光下头再可以看到身影。假使是阴天末，就呒没“影”可见唻。索性是落雨天呢，反而可以看到路面浪水里向个倒影。不过，水里向个影子还要看风个面色，呒没风，可以看到整个身影；有风个闲话，影子就会得支离破碎个。
夜里向，一个人走勒路浪，皎洁个明月可以拿迭个人个影子投射勒路面浪。假使呒没皓月，明亮个路灯光也好显现出迭个人身影。总而言之，无论是人个身影，还是物个身影，或者动物个身影，侪要通过“光”来呈现个。讲到“光线”，伊照射个方向决定了影子个方向。假使光是从后头照射个，阿拉能够看到前头自家个身影。反之，身影就勒阿拉个身后头了。
读者一定注意到了，我所描述个“身影”，侪是有形个。我觉着，阿拉每个人还有无形个“身影”，搿就是一个人个信誉！虽然看勿见、也摸勿着，却是像影子跟勒一个人个终身。即使迭个人去世了，有形个身影已经勿再存在，但是迭个人信誉——无形个影子却永远存在勒海个！
比方，某人生前信誉极佳，人人侪信任伊，就算伊离开人世已经几十年，假使再拨人提起，还是会得受到大家个称赞个。再比方讲，某人生前是个勿讲信用个人，呒没一桩事体会得兑现自家信誓旦旦个承诺。即使迭个人去世了好多年，假使拨人家提起，大家照样会嗤之以鼻。
人人侪有身影，无论是有形个还是无形个，关键个关键是自家。所谓身正勿怕影子歪：立直了，堂堂正正个做个正直个人！阿拉将无愧于自家个身影。
往期回顾：
图：网络 / 编辑：渺渺