“重新做人”三境
作者：彭瑞高
沪语改写：周红缨
讲述：王崢
退休之后可以“重新做人”，迭个是我退休多年以后再晓得个；后首来还晓得，迭个“重新做人”居然还有得三层境界。
第一境，“春风得意马蹄疾，一日看尽长安花”。
退休之后最大个好处，就是拥有了大量个辰光。搿就意味着要做自家欢喜个事体，辰光浪向勿会再有任何障碍。以前老清早眼睛一睁开，啥个想法侪呒没，只顾出门赶路，到单位去上班。现在勿对了，侬隔夜头里可以盘算好明朝个行程，未来个一礼拜、一个号头也可以放心去安排；即使呒没计划个人，要随时尽兴也勿难，好比侬一觉睏到天亮，突然介心血来潮，想到外地去兜兜，只要出门乘车子去就是了。做侬欢喜个事体，勿拘小节，乘兴而为，搿是最最开心唻。欢喜旅游个去走全国、看世界，欢喜美食个三天一次小聚、五天一顿大餐，欢喜蹲勒屋里个养养猫喂喂狗、侍侍花弄弄草……搿眼事体看上去是俗了点，但一旦退休，宿愿皆了，“重新做人”感觉邪气好。
第二境，“白头且作童生看，青灯不为金榜照”。
进入迭一境，靠个是激发潜力重返青春，搿能个志气让人称道。搿眼老年人勿但坚持进修，还要考级拿证，勿凡个实力一一彰显，比方：钢琴要弹到某一级，烹饪要学到某一级，英语要考到某一级；搞创作个，要加入某一级作协；练书法个，要加入某一级书协；打乒乓个，要打到某一级运动员……搿眼台阶个晋升勿是讲讲白相相个，而是要一本正经通过评审个，苦练之外，还要具备“悟性”搭“童子功”，进入迭一境，实在勿是桩容易个事体。
第三境，“百二秦关终属楚，三千越甲可吞吴”。
搿个境最难进。因为入境个人要改变个，勿是自家个兴趣、能力，而是本性。“江山易改，禀性难移”，人到了老年还要改变性格，谈何容易。但搿些老年人就是敢挑战自家，立志要活出个新我来。有个朋友，以前当老师，性格暴躁，体罚学生受过处分；退休之后又欢喜吃点老酒，打伤过老婆。伊老后悔个，三年前拿有得半柜子个收藏勒海酒侪敲脱了，下定决心重新做人，转变得邪气坚定。还有个朋友，工作辰光整过勿少人，退休之后呒没人理睬伊，伊后悔得勿得了，反省了好几年，形容枯槁，假使生活再拨伊一趟机会，伊一定要洗心革面，做厚道人。
以上三境，难度递增，而愉悦程度递减。第一境以“开心”为目的，一眼也呒没难度个；进入第二境就相当勿容易了；而最高个第三境，老了还要脱胎换骨，好比移江山，搿是最难、也最令人钦佩个，称得上“真正个重新做人”。假使攻第三境个人真个能够战胜自家、展现新我，葛末埃个两行铁血诗句，就是伊拉内心挣扎个真实写照，也将是命运赠送拨伊拉个最美个颂歌。
往期回顾：
图：网络 / 编辑：渺渺