出租车的祖师爷黄包车
沪语朗读：钱瑛
作者：申涛
朗读：钱瑛
今朝要搭各位讲讲出租汽车个祖师爷黄包车。有人讲，出租车还有祖师爷？侬牛皮吹豁边了！葛末我要讲唻，上海开埠以后只有几部达官贵人坐个私人马车搭轿车，搿辰光还呒没出租汽车。到了1874年，有个法国人从日本引进一批东洋车到上海，拿车身统统漆成功黄颜色，也就是大家讲个黄包车。黄包车拉客拉了足足四十九年以后，马路浪总算有了祥生出租汽车。侬勿相信去看看十九世纪个视频，搿辰光个老上海，马路浪侪是黄包车，勿大有小轿个车。侬讲，黄包车阿是出租车的的刮刮个祖师爷啊？
有朋友搭我讲：“黄包车有啥稀奇，阿拉勒勒上海老街坐过个！”我搭伊讲：“喂，朋友，侬弄错了，摆勒上海老街个黄包车是道具，摆摆噱头个，侬坐勒道具浪，一动也勿动，也只好算道具，哪能好算坐过黄包车呢？”
老早坐得起黄包车个大多数侪是有铜钿人家个太太、小姐，坐写字间个洋行大班，还有说书先生搭仔戏子，四马路个妓女。据说，当年有个大老板坐黃包車偏要摆臭架子，伊坐勒车子浪勿开金口，而是用司的克敲车身来指挥车夫朝啥地方拉。敲左边是要朝左拉，敲右边就是要朝右拉，敲踏板呢，就是叫停，揿车铃个意思就是快点快点。拿车夫勿当人，当伊机器。
为啥搿辰光大家介欢喜坐黄包车呢？搿是因为埃个年代一呒没三轮车，两呒没出租车，还有蛮多地方是勿通电车个。黄包车呢，倒是特别灵活，好穿小马路、小弄堂，七转八弯拉到阿里停到阿里，省得客人多走路，告咾客人交关欢迎。再讲黄包车个橡皮轮盘斜气大，坐勒车子浪有点像坐马车，还好顺带便望望野眼。到后首来，黄包车越来越多了，也就大众化了。
小辰光，我勒勒八仙桥附近读书。后首来阿拉搬场了，搿末哪能到学堂去呢？刚巧弄堂里有家大户人家有部私人黄包车个。阿拉娘就搭黄包车夫商量，请伊每日天早浪向拉我到八仙桥去，放学辰光再去接我回来。照现在个讲法，搿个车夫就是钟点工，趁老板勿晓得，出点外快。
每日早浪向，我就等勒自家阳台浪，看见车夫勒下头朝我招手，就奔下去跳到车子浪。车夫是长脚，伊拎起横竿，我朝后头靠背浪一隑，嗨嗨，适意呀，适意！出了弄堂，“长脚”摇两记车铃，三脚两步，眼门前个楼房搭仔行人统统侪像飞一样朝后退。
现在勿少风景区为了方便顾客浏览，也弄了几部黄包车。有一趟我到南京夫子庙去，看到有黄包车来辣兜生意，一种怀旧个念头马上就涌上心头，勿管伊啥价钿唻，豪扫坐上去。啥人晓得车夫拉勒车子慢慢吞吞荡发荡发，一步也勿奔，急得我真想跳下去自家拉仔黄包车穷奔阿腻头、兜一圈过过念头！
讲起来有点滑稽，现在勿少单位搞老上海怀旧活动，黄包车呆板数拿出来摆摆样子当道具。叫个妹妹坐勒车子浪，着件蹩脚个旗袍，手里向捏把折扇，腰肢搿能一扭，二郎腿末一跷，“喀嚓”一记，拍张小照。旁边有朋友搭我讲：“喏，迭个就是老上海个名片，挺括伐？”我只好“嗯，嗯”两声。要是侬问迭个妹妹，坐黄包车是啥个味道啊？包伊两只眼乌子木瞪瞪，一面孔个戆噱噱。
往期回顾：
图：网络 / 编辑：渺渺