喜欢暮春 / 四六文摘

沪语朗读：晨音

朗读者

喜欢暮春

作者：张建中

来源：解放日报2019.6.13.

上海话改写：郭莉

诵读：晨音

推荐：丁迪蒙

我一向欢喜江南个早春，尤其欢喜江南早春个潇潇雨丝。清朝人凌芝泉有迭能两句诗：“春烟黯淡春云驶，二月江南雨声里。”江南个二月，雨落得有点调皮，有点想哪能落就哪能落，雨水里带了浓浓个春寒，冷飕飕，瀴笃笃，歇勿歇就来惹惹侬。但是，伊也毕竟是湿润个、婉约个、熨帖个，一丝丝个寒意里向蕴含了浓浓个绿意，就像唐诗宋词里向明丽又调皮个女人，“闭门不见郎，手摩郎玉坠”，风情万种。阴雨过脱，就是蓬勃温暖、充满希望个春天！所以，早春，是我一直邪气欢喜个。

但是，勒勒我心灵深处个天平浪，好像还是暮春个分量，要重得多。

暮春，可能应该是一个带眼伤感个季节，林黛玉《葬花词》就是一首最典型个，抒发“闺中女儿惜春暮，愁绪满怀无释处”个长诗，我顶欢喜里向个两句，就是“杜鹃无语正黄昏，荷锄归去掩重门”。因为迭个场面，正是最典型个暮春场景。不过，我小辰光，一眼呒没伤春意识，偏生就是欢喜暮春时节，迭个大概是因为我伊个辰光人还小，还呒没、也勿可能有伤春意识，只是觉着迭个一段辰光，人个感觉有眼特别，天气勿冷勿热，“习习谷风，以阴以雨”，实在适意。

现在回想起来，从欸歇辰光，一直到我迭个一辈子，我欢喜个，侪勿是搿种阳光朗照个暮春，而是江南特有个、宁静、明朗个多云天气里个暮春。勒勒搿种暮春辰光，植物个绿颜色，勿是早春辰光个稚嫩柔弱，倒是变得厚重、成熟，但是伊又呒没夏天个老辣、无情。一切侪邪气醇厚，一切侪好像拨包裹勒、浸润勒厚厚个水汽，空气中也时常弥漫勒似有似无个、淡淡叫个清香，就像人个灵魂搭仔心情，既勿张扬，也勿忧伤，就搿能沉稳，搿能通透，理解了搿种从春到夏个过渡阶段，更重要个，是享受了迭个辰光个宽厚搭博大。

伊个辰光，我经常去个，就是绍兴公园搭复兴公园，只要勒勒迭个里向，从暮春个树木旁边经过，就有一阵阵馥郁芬芳个香气传过来，尽管已经过脱了“芳气袭人知昼暖”个阳春时节，但意思还是差勿多个，再讲伊好像要比“芳气袭人知昼暖”更加含蓄，更加厚重，当然也就更加绵长。暮春当然会让有种人觉着伤感，譬如林黛玉，但至少我勿会搿能，至少我还是觉着，暮春带拨人个安慰，要远远多于伊带拨阿拉个伤感。

清朝也有人写：“十里秦淮春无缝”。我最欣赏个就是“春无缝”三个字。要是讲早春、仲春、阳春侪是正勒勒积聚春个力量，葛末暮春就有“春无缝”个意味了，就有“重帘不卷留香久”个意思了。

侬是勿是还记得，一片刚刚割过个草地，发出个搿种浓烈个清香？迭个恐怕就是暮春个气息。有一位叫爱维尔夫人个法国作家，就曾经写过：“难道还有比刚割过个暮春个草地更好个天堂吗？”

迭个意思就是讲:“天堂”个气息，勒勒暮春时节，特别滋润个向四面八方飘散开来。

所以，我就更有理由，欢喜暮春时节了。

朗读者简介

陈全娣（晨音）国家一级播音员、国家级普通话测试员、朗诵考级考官、辅导员。