上海爷叔“买汏烧” / 四六文摘

沪语朗读：石铮铮

朗读者

上海爷叔“买汏烧”

原创：夜光杯

作者：张林凤

改编：丁迪蒙

朗读：石铮铮

上海爷叔个买汏烧可以称得上是沪上个一景，也是经营好家庭个重要部分。

退休勿久个李君有点心烦。以前伊是单位里向团队协奏曲个指挥，现在呢，勒屋里向操持锅碗瓢盆，但是，就是搿能，太太却还是常庄抱怨：油多了、盐少了、汤勿够鲜。李君勿免要发牢骚：“我勒单位里向可以一锤定音，勒朋友当中也可以是一呼百应个，凭啥勒屋里买汏烧还要受到指责？”但是抱怨归抱怨，第二天照旧。

对此，王君邪气有同感。王君呢，舞文弄墨伊是邪气热衷，但是啊，每天一到下半天三点钟，即使是文思像泉涌也要马上停牢，因为，伊要用美味个夜餐去迎候妻子、囡儿回屋里。有眼阿姨就笑了：“上海爷叔勿是侪是搿能介个嘛！”

上海爷叔对买汏烧是安之若素，迭个可以称得上是上海个一道独特个风景。早年从外码头来个人，实在是觉着勿可思议。于是，就有了“围裙丈夫，小家败气”、“男做女工，越做越穷”之类个讲法；或者呢，索性根据谐音称伊拉为“马大嫂”。

勒司空见惯个过程中，大家慢慢叫悟到了：其实，上海爷叔个买汏烧，展示个是和睦家风、绅士风范搭仔海派文化。古代勿也有“治大国若烹小鲜”搿能个哲理嘛？“莫道昆明池水浅，观鱼胜过富春江”。爷叔一旦从买汏烧当中悟出生活个真谛，高品质个人生立意就脱颖而出了。

勿可否认，上海爷叔美好个遐想一定是：太太上得了厅堂，下得了厨房，但勿争个事实却是，勒关键时刻，往往上厅堂个是太太，下厨房个却是爷叔。

文艺人士刘君，平常辰光演出繁忙，老少有得空闲下厨房。有一次，亲朋好友十几个人光临，伊用待客最高个礼仪——亲自下厨房招待大家。前一日天下半天，伊就到菜场、超市里去采购，回到屋里再拣、汏、剖开来、切好，一直忙到了下半夜。第二天，刘君变魔术一样拿一道一道美味端到台子浪，还有“刘氏”独门绝技个套锅蒸鸡。宾客侪称赞伊拿舞台创作转化成了灶台创意。

以前，我住虹口周家嘴路个公房，五楼七户人家个上海爷叔，每日天争相展示自家个买汏烧功力。当年，搿眼爷叔还侪辣上班个，但每日天落班搭仔休息日脚，总归有几个围好围裙，利用烧饭个间隙，到长长个过道浪向聊两句。聊得最多个是就是烹调技艺，互相勉励，争做先进家庭“马大搜”丈夫，欢声笑语伴勒饭菜香荡漾乐楼道浪。

勒单位里担任生产科长个沈爷叔，有一本“买菜经”，鲜活个虾要廿多块一斤，选“撑脚虾”就好便宜四五块，买回来马上汏清爽烧，味道是差勿多个；经常到德国考察个董爷叔是鼓风机专家，伊搭邻居演示勒德国拿白煠蛋摆勒蛋托里向个吃法，既好吃、又有情调，当时，市场浪向蛋托买勿着，从德国带回来个蛋托就常庄勒邻里之间周转；我个先生是机械设计工程师，伊拿用“绿豆火”焖熟红烧肉个技艺传授拨其他个爷叔；难得回屋里个刘爷叔是国际海员，伊教会大家船浪用葱油清蒸鳊鱼个烹调大法。还有几位爷叔烹饪技艺浪向手艺差眼，但勒子女个教育、艺术欣赏浪向个指导，也让邻舍隔壁受益匪浅。

采访过一位企业家，伊让每一位高管持有股份，但是有约定：啥人离婚了就要收回股份。伊讲：一个男人，假使连家庭也经营勿好，又哪能经营得好团队呢？我引用伊个外延：上海爷叔个买汏烧就是经营好家庭个重要部分。