归去来（六）
讲述：胡芷苓
作者：欧阳德彬
来源：渡十娘
沪语改写：边秦翌
沪语讲述：胡芷苓
阿拉搿搭有得金卡、银卡，还有普通个会员卡，请问侬想办阿里一种呢？姑娘问。
当然是金卡咾。张潮满勿在乎个讲。
嗯嗯，好个好个。最近搞活动，充值五千块就可以办一张金卡。金卡末，所有个服务项目侪可以打三折个哦。请问侬是刷卡呢还是付现金啊？姑娘跑到收银台后头又问。
刷卡。讲好，伊就拿自家个工资卡交了出去。伊也勿晓得里向到底还剩几钿。
葛末，要勿要马上到二楼去体验一下肩颈按摩呢？一看侬就是一个坐办公室个高级白领，一日到夜对牢仔电脑，侬真个要注意注意颈椎保养啊。姑娘讲，一面孔开心个笑容。
当然，当然，乃末就看看侬个手法了。张潮也开心个笑了，跟牢仔姑娘去了二楼个按摩单间。
请侬先拿高头个衣裳脱脱，趴勒按摩床浪向就可以了。我去拿玫瑰精油。姑娘轻轻叫个关好门，出去了。
多美好个日脚呀，有个年轻貌美个姑娘拨侬按摩陪侬茄山河，还有啥个勿开心呢？张潮想发想发，面孔趴勒按摩床个孔洞浪向，闻到了甜丝丝个春天气息。窗子外头冬天刚刚到，春天还早唻。
过脱一歇歇，果然有得一双温热个小手勒勒自家背浪向涂了精油，缓慢但是邪气有力个按摩，经络勒勒咯吱咯吱响，揉开了，推顺了，又酸又爽。
侬叫啥个名字呢啊？下趟再来寻侬。张潮问。
金蕾，金子个金，花蕾个蕾。伊笑勒回答。
应该是真个名字伐。
当然是真个咾，身份证也可以拨侬看呶。阿拉搿搭是正规个店好伐。
嗯嗯，看得出来个。我去过几家汏脚城，好像侪勿是老老正规个样子。
伊个是妓院，阿拉搿搭是理发搭仔中医养生。前几年，我勒北方老家自家开过一间经络按摩店，真个是受勿了老家人个目光哦，伊拉瞎讲八讲，讲啥个闲话个人侪有。
是个，是个，内陆就是搿付样子！此地倒是蛮好，做啥个事体侪蛮自由个。
嗯嗯，侬也是从内陆来个啊？
是个呀。受勿了内陆个风气，逃到鸟城来个。哎，侬搿份工作哪能啊？张潮问。
还算好伐，必过一天十几个钟头做下来，回到出租房，手脚侪要抽筋了。自家呒没学历呒没技术，只能做做搿种生活啦。姑娘诚恳个讲。
张潮心里震了一记，坐了起来，戴好眼镜，迭个辰光，伊看到了姑娘伊双通通红个手。像煞是玛丽莲梦露一样个黄头发搭仔幽黑个中国杏仁眼睛一点也勿搭配。
要按够一个钟头唻，否则主管晓得了就要扣我个工资了。伊恳求道。
嗯。伊又趴下去，面孔对牢仔按摩床个孔洞，像煞是看牢仔一口干涸个深井。
帅哥，侬背浪向有得一粒老大个痘印，我来帮侬弄脱伐，保证勿留疤痕。
好个呀。
去痘印个辰光，张潮又想到白天介拨老大哥骂个事体。痘印是可以去脱个，老大哥个训斥勒勒心里却难以去脱了。本来还拿伊当兄弟当朋友，以后就只能当当顶头上司了，迭只戆棺材！想到此地，伊又狠狠叫个握了一记拳头。
哪能了，帅哥，弄痛侬啦？
呒没呒没，一眼也勿痛，实在是忒适意啦！对了，此地可以足底按摩伐？
先生，侬讲个汏脚服务应该到马路对过人民大厦负一楼个绅士会所。阿拉搿搭是兰媄发屋，主要是做理发搭仔中医养生哦。
哦，看来真个是正经地方。兰媄发屋，刚刚勒路边居然看成功兰婊发屋了。啥个眼神啊，侪是天天看眼垃圾书害个。啥个辰光再可以选择自家欢喜个书看呢？伊心里向迓迓叫个勒勒讲。
朗读者
往期回顾：
图：网络 / 编辑：渺渺