剖视上海人个尴尬（三）
沪语朗读：高仁
作者：余秋雨
沪语改写：丁迪蒙
也许上海人个自慰不无道理。上海文明，首先是一种精神文化特征。单单是经济流通，远勿能囊括上海文明。
上海文明个最大心理品性是建筑勒个体自由基础浪个宽容并存。
勒中国，搭上海式个宽容相抵触个是一种封建统治长期相偎依个京兆心态。即使封建时代过去了，搿种心态个改良性遗传依然散见勒各处。搿种心态延伸到省城、县城，构成一种幅度广大个默契。
勿管过去是啥个性质个洪流起个作用，搿种心态勒上海拨冲刷得比较淡薄。只要勿侵碍到自家，上海人一般勿大去指摘人家个生活方式。
比之于其他地方，上海人勒公寓、宿舍里向搭邻居交往比较少，万勿得已几家佮用一个厨房或者厕所，互相之间个磨擦搭仔争吵却是邪气频繁，因为各家侪要保牢自身个独立搭仔自由。因此，上海人个宽容并勿表现为谦让，而是表现为“各管各”。
勒道德意义浪，谦让是一种美德；但勒更深刻个文化心理意义浪，“各管各”或许更加贴近现代宽容观。
承认各种生态独自存在个合理性，承认到可以互相勿相闻问，比经过艰苦个道德训练而达到个谦让更加有深层意义。
为啥要谦让？因为选择是唯一个，勿是侬就是我，勿让侬就要搭侬争夺。搿是大一统秩序下个基本生活方式搭仔道德起点。
为啥可以“各管各”？因为选择个道路邪气多，侬走侬个，我走我个，啥人也勿会吞没脱啥人。搿是以承认多元世界为前提而派生出来个互容共生契约。
上海下层社会当中也有勿少欢喜议论人家个婆婆妈妈。但即使伊拉也晓得“管闲事”是拨广泛厌弃个一种弊病。调到上海来个外地干部，常常会得苦恼于哪能介拿“闲事”搭仔“正事”区别开来。勒上海人心目当中，凡是勿直接搭工作任务有关个个人事务，侪属于别人勿该管个“闲事”范畴。
上海人个口语里向有句至高无上个反诘语，叫“侬啥事体？”
勒外地，一个姑娘个服饰受到同事个批评，伊会就批评内容莱表述自家个观点，譬方“裙子短点有啥勿好”、“牛仔裤着勒海就是方便”之类，但一到上海姑娘搿搭，事体就显得邪气简单：搿是个人私事，即使是难看透顶也搭别人无关。因此，伊只讲一句“关侬啥体”，就截断全部个争执。讲搿句闲话个口气，可以是有点生气，也可以有点发嗲，但道理却是一样个。
勒文化学术领域，深得上海心态个学者，大多数是勿愿意去搭别人“商榷”，或者去迎战别人个“商榷”个。文化学术道路邪气多，大家各自走勿同个路，互相遥望一下可以，做啥要同一个步伐？
这些年来，文化学术界多次出现过所谓“南北之争”、“海派京派之争”。但搿种争论大多数是北方假设个。上海人即使拨“商榷”了，反击也邪气少，伊拉固执个坚持自家个观点，对于反对者，伊拉心里向回荡勒海一个顽皮个声音：“关侬啥体？”
本于搿种个体自立个观念，上海个科学文化往往具有新鲜性搭独创性；但是，也正是搿种观念个低层次呈现，上海又常常构勿成群体性合力，交关可喜个创造搭仔观念显得比较单薄。
本于搿种个体自立个观念，上海人有种冷静当中个容忍搭仔容忍当中个冷静。一位旅台同胞回上海观光之后写了篇文章，讲“上海人啥没看见过”？
当然咾，见多识广导向了冷静搭容忍，更加重要个是，伊拉习惯于事物个高频率变更，因此也就领悟到某种相反相成个哲理，变成了逆反性个冷静。伊拉求变，又进而拿变当作一种自然，善于勒急剧变更当中求得一份自我，也勿诧异别人勒变更当中所处个勿同态势。
根据搿种心理定势，要上海人勒心底长久而又诚恳个服从一个号令，崇拜一个权威是邪气难个。一个外地个权威一到上海，常常会觉着勿大自在。相反，上海人可以崇拜一个勒外地并勿得志、而自家看勒真正觉着舒心个人物。
京剧勿少名角个开始阶段，侪是勒上海唱红了个。并勿是京剧重镇个上海，以介长个一段辰光卫护牢了一个奇特个周信芳，搿勒另一座城市也许有点难于想象。伊些想用资历、排行、派头来压一压上海人个老艺术家，刚到上海没几天就受到了报纸个连续批评。对于晋京获奖之类，上海个艺术家大多勿感兴趣。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号