故里春秋（三）
作者：朱海洪
沪语改写：边秦翌
沪语讲述：洪瑛
推荐：丁迪蒙
大铁门个旁边，原来有座“关帝庙”。庙邪气小，日里向总归是敞开半边门。我常庄跑过去探头探脑，好奇心特别强，对牢仔里向个三尊神像瞄发瞄发：红面孔、绿袍子个大将军，一只手勒撩长胡子，像煞勒勒读书，伊个后头还有两个模子高高大大个人，一只黑面孔，一只白面孔，黑面孔邪气威风，手里向还拿好仔一把老大个刀。后来大人讲拨我听，红面孔、绿袍子个是关公，白面孔个是伊个儿子关平，黑面孔个癞带胡子是专门搭关公拿青龙偃月刀个周仓。塑像两旁边还有一副对联，高头写勒海：
孔夫子关夫子二位夫子
作春秋看春秋一部春秋
关公塑像前头摆了只台子，台子浪有眼零零星星个水果糕点，蜡烛台搭仔香炉里向个烟火烊勒海。我勿大看得到有香客来烧香祭拜，实际浪向，搿只关帝庙一日到夜空落落个。
原来，搿搭只必过是一个守寡个女人个屋里。迭个女人是个国民党军官个外室，后来军官勿要伊了。可能是因为伊实在忒寂寞了，精神浪呒没地方可以依靠，就索性拿屋里弄成功了庙堂。外头供勒海关老爷，里向摆好观世音，一门心思吃斋念佛，成为了带发修行个女居士。呒没人能够讲得清爽女居士为啥要供奉关老爷，直到后来，我读了《三国演义》，再稍微有眼眼明白伊个落寞、哀怨。
《三国演义》里向有得一出“关云长千里走单骑”，讲曹操攻下了徐州、下邳，刘备去投奔袁绍，就拿自家个老婆、儿子侪厾拨关云长；当时关公驻守下邳，只好带勒刘备个老婆儿子逃到一只小山浪。同乡张辽上山去劝关公投降，谈定了三只条件：1、降汉勿降曹；2、用刘备个俸禄养两位阿嫂；3、一旦晓得刘备下落，就立马三刻要去寻伊。
关公降操之后，保护刘备个家小跟牢仔曹操到许都去。半路浪向，曹操存心让关公搭仔两位阿嫂住勒一间房间里向。关公只好一只手拿蜡烛，一只手拿刀，通宵立勒门外头。最后，曹操佩服关公个忠义，只好拿伊放脱。当然咾，关公也是过五关斩六将，一垯路里邪气勿容易个去寻刘备。
像关公搿能介傲上怜下，义薄云天，曹操佩服，女人当然是更加欢喜个。勿要讲骑赤兔，舞青龙偃月刀，过五关斩六将个勇武，单单就讲伊忠心护嫂，坐怀勿乱个情操，就配得上“圣”字。所以儒家拿关公搭仔孔子并称为“文圣”、“武圣”。孔夫子彰“仁”，关夫子显“义”，标示儒家学说个“仁义”个核心，演绎千年古国个历史春秋。
青灯古佛、木鱼声声，女居士勒勒潜心佛事当中聊度余生。但是，勿晓得从啥个辰光开始，伊孤独个身影旁边突然之间多出来一个小姑娘，迭个小姑娘就是我后来看到个埃个小尼姑。
香火袅袅，烛影重重，小小个“关帝家庙”又散发开来了一眼温暖个人间气息。
关帝庙里个小姑娘是女居士收养个浙江小老乡，搿是1948年后头个事体了。
1948年12月3号下半日4点钟，一部客轮从上海十六铺3号码头出发，朝宁波方向开。呒没想到，刚刚开出吴淞口，船就勒邪气明显个摇摆了。到6点45分，“咣”一记，像炸雷一样个声音从船个右舷后头传过来。十几分钟之后，船就开始往下头没，一共死脱了3000多个人，其中。就有得小尼姑个爷娘。
搿就是解放前夕让人震惊个“江亚”轮沉没事件。
朗读者
往期回顾：
图：网络 / 编辑：渺渺