江南春色如许 苏中早茶飘香 ——苏中如皋游记
江南春色如许 苏中早茶飘香
作者：王建运
沪语改写:丁迪蒙
今年因为疫情个阻挠，大家失脱了到户外去欣赏大好春光个时机，不过，随牢战胜疫情个搿一天个即将到来，大家侪会得重新回到远足游览春色个日脚。
两年前头，也就是勒搿个季节，尽管还是春寒料峭，江南个旷野却已经是春色如许，我参加了一个民间协会组织个踏青活动，到南通如皋去度过了邪气愉快个两日天。
“狗吠深巷中，鸡鸣桑树巅，榆柳荫后檐，桃李罗堂前，暖暖远人村，依依嘘里烟”。
搿是到此地来度假个人形容当地农家庄园个景色。农庄里向甚至还有得大灶头供游客自家去上灶、还有魚塘，让人去钓鱼…… 搿搭真个让人有得世外桃源个感觉。我去过勿少各种各样个农家乐，但搿一趟是让我感到观光、休闲、餐饮融合得最最完美个。
游览如皋市区个水绘园，是搿趟度假个好地方。“绘者，会也”。水绘园以水为贵、倒影为佳，既秀且雅，伊融合了诗、文、琴、棋、书、画、博古，曲艺于一园个特色，足以说明伊原来是一座邪气有书卷气个文人庄园。著名园林学家陈从周教授誉其为“天下名园”，除脱仔园内水网交织，桥堤相连，具有浓郁个水乡特色之外，还因为该园是明末才子冒辟疆搭仔秦淮佳丽董小宛相恋、相爱之地，伊拉充满传奇个爱情故事，让人平添了勿少想像个空间。秀丽个庭院楼阁、弯弯曲曲个小桥流水，加上真实个人文故事，让到此地来游览个四方客人交口称赞，真勿愧为江海平原浪个一颗璀璨个明珠啊。
安排大家品尝一顿如皋早茶。搿又是个精心独到个安排。第二天早浪，大家到如皋个早点名馆品尝早茶。只看见店里向人流熙熙攘攘，大清老早竟然像酒店夜宴一样个热闹非凡……大家到预订好个座席浪坐下来，点好早点，一吃，哦哟，搿能介个美食啊，果然是名符其实呀，大家拼命个称赞，胃口大开。有些人是“勿吃勿吃一大碗，饱了饱了又来一大碗”。也有人惊叹“如皋早点，勿是扬州胜似扬州”。丰富多彩个特色早餐，搭闻名全国个“长寿之乡”融为了一体。勒搿搭简单表述一下：
烧饼加豆腐脑。搿是如皋人最欢喜吃个早茶了：一只圆个炉子，有夫妻两家头开个，也有兄妹佮伙个，一个做饼，一个勒邪气烫个炉堂内壁贴饼，烧饼有葱油、酥油、蜂蜜糖拌个，根据季节，还有老卜丝、野菜咾啥。面榔头敲打勒砧板浪个声音邪气有节奏，刚刚出炉个烧饼黄澄澄，邪气香。一口咬下去，满嘴巴个香、胃口大开。而如皋个豆腐脑，搿是搭烧饼绝配个汤湿点心。豆腐脑一片片雪雪白，就像白玉，芡了薄薄叫个邪气鲜美个羹汁，撒眼香油葱花、紫菜搭仔少许当地特产“萝卜皮”，真是让人馋吐水嗒嗒渧呀。一两只烧饼加碗豆腐脑，真是别有风味，吃得大家摇头晃脑，穷讲好吃、过念头了……
盘水拌面。搿又是如皋个特色早点。特制个面条勒开水里烧脱一歇就捞起来，摆勒只冷水盆里过一记，捞起来再摆到有开水个镬子里汆个两三记、沥脱水，搿个过程称为“过桥”。搿种面吃起来滑爽、勿粘勿糊，面浪向个浇头也邪气丰富个，有韭菜肉丝，雪菜肉丝，芹菜肉丝，青椒肉丝咾啥。吃拌面自然要来碗汤，搿个汤呢，多数是猪猡个大骨头熬个，汤白又勿腻，摆眼葱花或者蒜叶，香味扑鼻。
蟹黄包。也是邪气有特色个。包子勿大，但是馅多皮薄，以蟹黄、蟹肉、猪腿板肉丁、笋丁咾啥做成芯子，再拿肉皮熬成个胶冻拌勒里向。皮子要擀得邪气薄，要经过好几道工序之后，一只包子再好出笼。刚刚出笼个辰光，黄颜色个蟹油浸透包子皮，热气腾腾，香气直冒，看看也是种享受，马上就食欲大开了。搿个辰光，再拿配好姜丝个镇江醋蘸一蘸，一口咬上去，喔唷！用当地闲话来讲，是“打嘴巴子也不松口……”
著名个世界刑事鉴定专家、美籍华人李昌钰，是如皋个名人，当地还专门设立了“李昌钰刑事侦察博物馆”。伊功名成就之后，勿忘记自家是炎黄子孙，要报效祖国，每次回故乡少勿脱做一桩事体，品尝家乡个早点，伊曾经动情个讲“在海外闯荡几十年，始终惦念家乡早点的风味……”，搿也是伊挥之勿去个乡愁呀！
如皋两天行邪气短暂，匆匆而过，但是感触老深，尤其是参观“水绘园”，听才子佳人故事，令人心潮荡漾，回到上海以后，心里默默叫个随牢仔园子里播放个丝竹余音，伏案，写了以下个诗句：
狼山下，碧水旁，千古绝唱。
会芳园，心语哽，忧伤绵长。
丽人情，郎君长，世传文章。
别离去，泪涌淌，秋草苍茫。
留世名，传佳话，水绘咏唱……
往期回顾：
图：网络 / 编辑：渺渺如胭