罪过了，我个大麻鸭 / 四六文摘

沪语朗读：李群

朗读者

罪过了，我个大麻鸭

作者：胡展奋

改写与朗读：李群

推荐与指导：丁迪蒙

讲到大麻鸭，搿并勿是对某一类人个暗喻，是只实实在在个鸭子。

故事发生勒交关年数前头，是1979年个春节。伊个辰光，阿拉工厂附近只有山货，想吃鸡鸭、鱼肉，板数要到40公里外个宣城或者湾沚去买。到伊面搭去要有百把公里个路程，已经到芜湖地块了。

海斌是我采购农副产品个老搭档，搿趟去采购，是因为我阿爸来信关照我买一只四、五斤重个大麻鸭，伊勒帮我搞借调，要派用场个。手握大权个迭位处长个丈人生肺结核钙化，医生建议伊用5斤个老鸭炖芋艿，可以滋阴补元气。但是上海阿里搭弄得到介大个鸭子呢？希望也就只有落到我身浪了。

伊日天老清早4点钟，阿拉就出发，到宣城，寻遍市场也呒没看见有大麻鸭。老乡讲，搿地方好鸭子侪只有二、三斤，侬要介大个“鸭王”，只有湾沚有。但是，到伊面搭去，要乘一种绿皮车过去个，慢是慢得唻来像“老牛拉车”，呒没闲话好讲。

等到了湾沚，已经到中浪向了，连根鸭毛也呒没看到。后首来，大约摸一个礼拜以后伐，海斌搞定了一辆但芜湖去个货车。阿拉两家头凌晨三点钟就就出发了，简直比鸡起得还早个节奏呀。

路浪颠了将近3个钟头，到湾沚正好赶上了6点钟个早市，阿拉早饭也否勿吃就抓紧去寻大麻鸭。

鹅倒是有交关，鸭呢，侪是3斤以下个，看见了只4斤重个，勿称心呒没要伊，等兜脱仔一圈回来居然拨人家买脱了。

正勒勒懊恼个辰光，一个当地个小鬼头跑来报信，讲有一只大麻鸭，伊晓得勒阿里个，但是要求拨伊1角洋佃个“报信费”。我呆脱了，伊个辰光居然有迭能个小鬼，简直是天才呀，我快点跟牢仔伊走。路浪向七里转八弯，我倒有点怀疑了：真个假个？只听到一阵邪气洪响亮个鸭子叫，从一个勿大个院子里传出来了，推开门一看，喔唷，介大个鸭子啊！一问，有得5斤半哦！我故作镇静，淡淡个问主人：卖伐？主人有眼犹豫了，讲：勿卖！

海斌拖了我就走，轻轻叫搭我讲：越是求伊，伊越搭架子勿卖个！果然，刚刚出街口，伊就追上来叫了：哎，侬拨只价钱呀！海斌成心慢慢叫介转过身来讲，鸭子忒大了，肉忒老唻。鸭主人马上讲：勿老个！勿老个呀！迭能个大麻鸭，整个芜湖也寻勿着个。后首来，谈下来个价钿是八角一斤。伊个辰光鸭子卖猪肉价，猪肉七角两分一斤。临到付钞票了，看主人一副样子，像煞是啥勿得，我干脆拨了伊5元，乃么总算抱了只肥鸭子回来了。迭只鸭子因为羽毛个颜色像麻雀，通常称为“麻鸭”，品种老多个：广西大麻鸭、江苏“昆山麻鸭”、高邮鸭、浙江“绍鸭”、福建“金定鸭”搭仔安徽“巢湖麻鸭”咾啥。

鸭主人讲我买个迭只是正宗“广西大麻鸭”，属于肉蛋兼用型。仔细看哦，迭只鸭子身体是方个，大尾巴，细长个头颈，亮得像绸缎一样，一对小眼睛邪气邪气亮，偏仔头看人，戆海海个样子倒老好白相个。因为模子大、长得邪气肥，一对红颜色个肉掌像双老大个塑料拖鞋。想想等回上海，还有半个多号头，我拿伊养勒后窗个小夹弄里。迭只鸭子也老怪个，看见陌生人就逃，只有看见我，折转仔头嘎嘎叫，讨物事吃。砻糠拌饭胃口瞎大，吃头势结棍，比我个饭量还要大。为防备伊逃脱，我一直用根绳子牵牢伊个脚。后窗是邪气高个篱笆，我早浪头搭伊放放风，让伊勒窗门后头空地兜两圈。我搿根绳子可以放得老老长，一上班就拿伊收进房间里向，落班乘太阳落山前头再放伊一歇，天黑了再收进来。勿晓得有一天上班前头忘记脱收了。大概过了3个钟头再突然介想起来，已经是快吃中饭辰光了，急匆匆赶回去。

完结！鸭子呒没了！倒闻着隔壁一阵阵烧鸭子个喷喷香味。我推开门进去，只看见一台子个人围勒海吃鸭子，看到我面色也变脱了。我问：㑚迭个鸭子阿里来个？！一台子个人侪勿出声，眼神全部朝牢一个厂里起重组个三角眼“小矮子”看，搿家伙坐勒台子头浪，面勿改色，反问我：侬迭个问题问得忒“刮散”，勿是买来个，还是偷得来个？我看到地浪有一大堆个鸭毛，台子浪大块大块个鸭肉，勿是我个大麻鸭，哪能会有介大个体量？

作孽啊，罪过啊！鸭子已经勿会讲闲话唻。伊辰光又呒没啥个探头个，更加呒没人肯为我作证，捉贼捉赃，侬凭啥吃准是人家偷侬个鸭子呢？只好自家吃瘪，邪气胸闷个退了出来，背后是一阵一阵个狂笑声。

大麻鸭啊，我心痛我个大麻鸭。“一对小眼睛贼贼亮，偏仔头看人，一副样子憨海海个好白相”。

后首来，“小矮子”每趟拨我碰着，总让我觉得伊面孔浪永远是一副怪来兮个神抖抖个笑，赛过勒直接搭我讲：就我吃了侬个鸭，侬有啥证据伐？嘿嘿嘿嘿……

有辰光想想，鸭子总有得一死个，早晏要拨吃脱，只可惜是中了魔道，化成了坏蛋身浪个部分。

伊只鸭子假使还活勒海，也应该有毛四十岁了。