晒霉（一）
沪语朗读：张萍
朗读者
晒霉（一）
来源：解放日报
作者：陈建兴
改编：郭莉
朗读：张萍
邪气漫长、到处粘答答个黄梅天终于过去了，大伏天也马上就来了，空气干燥得像是拨海绵吸干了水分一样。乃末，搿也就是一年里向个一段邪气重要个日脚，弄堂里向个阿姨姆妈，侪拿自家屋里个衣裳从箱子里翻出来，放到太阳下头去晒，迭个就叫“晒霉”。
小辰光，多数人家是住石库门或者平房个，房间个地面还可能是“电石糊”铺个，湿气邪气重。一到黄梅天，外头嗒嗒渧，里向粘嗒嗒，有交关霉菌生出来，箱子里向个衣裳、床底下个鞋子咾啥，侪有一股霉哄哄个味道，有辰光，还会得长出夹绿带黄个小毛毛，米缸里个米也会发霉，结块生虫，叫人心里真勿晓得有几化个烦！
晒霉个日脚，太阳一出来，大家侪会拿各种樟木箱、帆布箱、藤条箱搬出来。有种人家还拿藤椅、竹椅搭仔骨牌凳搬出来，摊开花花绿绿个衣裳。还有人家撑起竹头，拿棉袄、棉裤穿到竹头浪向，叉到屋头顶浪去㫰晒。
阿拉屋里呢，姆妈搭阿姐搬出两只已经褪色个箱子，靠牢墙头打开，用藤拍撑牢仔箱盖，有股樟脑丸个味道就冲出来了。我阿哥勒门口头搭起铺板床，一件件衣裳从箱子里拿出来晒。阿姐拿绒线领圈、假领头、围巾咾啥晒到竹节架上，连得箱子边浪向也搭满了一只只个袜子。……晒个物事是勿值啥铜钿个，但姆妈觉着侪是宝贝，搿眼是一家人家过日脚个全部家当。就算暂时不用，伊也是勿舍得厾脱个。每年晒霉，姆妈总归会得发现，有两件衣裳浪向有霉点了，伊老殟塞个，但是，伊也有办法，用干布头拿霉点轻轻叫揩脱，再拿到太阳下头去晒……
晒霉，可以看出一份人家个“家底”。有种晒出来是着过个西装、海虎绒大衣、羊毛毯、丝绵棉袄，更多人家晒个是棉袄棉裤、棉帽子、棉花胎、棉鞋，还有勿少是打补丁个卫生衫、卫生裤，欸歇辰光，是“新三年，旧三年，缝缝补补又三年”。
晒霉，也会得透露出人家屋里是做啥生活个。有晒劳动布工装、厚笃笃个白帆布工装，一看就晓得是工人家庭；有个晒白大褂，胸口一行小红字写了啥啥医院；还有晒两件军装、军大衣，葛末一定是屋里向有人勒部队里了。阿拉屋里晒个衣裳里向有件邮绿色个棉大衣，搿是我阿姐勒邮局个制服。
精彩回顾：
图片来自网络