花好稻好
沪语朗读：沈珊明
朗读者
花好稻好
作者：郑自华
沪语改写：丁迪蒙
朗读：沈珊明
搿一日天，几个老朋友聚会。大家讲起了社会浪剩女多个现象，A君正好现场当起了红娘，伊推荐一个女青年，讲伊除脱仔面孔漂亮，还有得“三高”，就是重点大学，文凭高，身高有得1米68，职务高，是单位经理。
勿对呀，A君讲个人我也有眼晓得个，讲是重点大学，其实是大专生，目前勒一只重点高校读夜大学，勿是全日制大学个！说伊身高168，其实，伊次派对活动，着了8公分个高跟鞋，正常也就1米6。讲伊职务高，更加是无厘头个事体。事实是家规模邪气小个公司，每个具体工种侪叫经理，搿种经理其实就是光杆司令一个，手下头没兵个，名片浪向个经理头衔，是拉旗帜做虎皮，为做生意方便，勿好当真个。我搭A君开玩笑，勒侬个嘴巴里，伊个小姑娘是花好稻好样样好。
花好稻好，是上海言话当中形容讲言话夸大其词，有哗众取宠之心，无实事求是之意。以A君来讲，确实是个热心肠，但红娘做成功个几率邪气低个，原因就是伊勒介绍个辰光只拣好个讲，拣大个讲，呒没有做实事求是个介绍，以至于听个一方期望值邪气高，啥人晓得一看见，一搭脉，根本勿是搿能桩事体，弄得双方勿开心，扫了兴致，回过头来还拿A君辣辣叫讲脱一顿！伊实际浪也邪气火个，自家辛辛苦苦勿算，还倒贴电话费、交通费，最后呢，弄得里外勿是人！
除脱像A君搿能讲得花好稻好，出发点还是好个人以外，社会浪向确实有另外一种人，为了达到某种目的，口吐莲花，讲言话勿留余地，勿负责任，信口开河，信口雌黄，拿死个讲成活个。
一日天，我勒朋友伊面做客，正好碰着某家保险公司个一个业务员勒勒邪气卖力个推销保险，伊拿某个险种讲得是花好稻好，像煞是世界浪向最完美无缺个险种了，可以解决一切问题，而对于免赔事项是只字勿提呀。当朋友表示，资金浪有点困难，搿个业务员为了完成业绩，提出了违规操作个办法。我拿保险合同拿过来仔细研究研究，觉着保险合同个交关条款侪晦涩、拗口，我还算学过大学中文的，看到一眼免责条款，觉着比阅读文言文还要难交关。事实讲拨阿拉听，凡是讲得邪气完美个，侪要留个心眼。投保个辰光讲得花好稻好,到理赔个辰光却是千难万阻个教训并勿少。从朋友个实际情况来看，并勿适合迭个险种，我就叫伊拒绝了。后首来听讲迭个业务员挪用客户个保险款去赌博，最后到提篮桥去了。
行文至搿搭，电视里向传来那英个“雾里看花”：你知哪句是真，哪句是假，借我借我一双慧眼吧，让我把这纷扰，看得清清楚楚明明白白真真切切。我个眼门前像煞蒙太奇一样出现了交关花好稻好个镜头：某股票上市个辰光，穷吹，好像是只优质股，只有一年就沦落为垃圾股，投资者受到交关损失；某明星出演了一部电影，还没公演，就有影评讲可以问鼎大奖，某明星个表演有得国际巨星个风范，但是，凡是看过片子个人侪叫上当，票房惨勿忍睹……现在个公众侪希望能够有双好眼睛！
拿局部讲成整体，拿细节讲成全部，搿就是花好稻好个特征。要记牢：一朵花勿是整个春天，一棵树勿代表整个森林，为人、做事体还是实在点为好！
精彩回放：
起蓬头
宋词赏析 如梦令·常记溪亭日暮
少年游 柳永
拎只猪头好过年
同老相怜
青玉案·元夕
春节，上海人勿吃饺子吃年糕
归彼大荒（下）
归彼大荒（上）
图片来自网络