晒霉（二）
沪语朗读：童蓉莲
朗读者
晒霉（二）
来源：解放日报
作者：陈建兴
改编：郭莉
朗读：童蓉莲
姆妈晒个多数是子女个衣裳，整整齐齐个，伊自家搭我爷倒是呒没啥像样个衣裳个，有眼打过补丁个老棉袄、老棉裤，有两件绒线衫是姆妈自家结个，已经有眼年头了，上头有几只虫眼。
也有让姆妈开心个物事，搿是一对绣花枕套，是姆妈结婚以后留下来个唯一个嫁妆，平常是囥勒箱子底底下，勿随便拨人家看个，晒霉个辰光，总算好露一露。雪白个棉布上头绣了两只鸳鸯勒嬉水，姆妈总归盯牢仔枕套呆脱一歇，就拿伊收回去了。
弄堂里向有人家晒出过一件像“龙袍”一样大红大绿个衣裳，上头还绣勒交关花花绿绿个图案，我稀奇煞了，心里想，伊拉屋里哪能介有钞票啊！趁人家勿注意，我去拿伊披到自家个身浪，手舞足蹈。姆妈气煞了，一把头拿衣裳剥脱，拎牢我领头回来：“搿是寿衣，是死人着个！”我拎勿清：“死人还着介好看个衣裳啊？”姆妈“啪”一记，耳光揎了过来，警告我：“侬再去碰寿衣，打断脱侬个手呶！”
一歇歇，又听到邻居隔壁吵起来了，原来啊，是女主人勒晒先生棉袄个辰光，摸到了有几块洋钿。一口咬定是囥起来个“私房钿”要充公，伊拿钞票捏勒手里，常怕拨抢脱，借口要淘米、烧饭“滑脚”了，先生立勒海邪气个尴尬……
一帮小八腊子迓勒被头、毯子遮出来个阴凉头里白相“跘野猫猫”，撩开被头屏障，勒空档里钻过来钻过去。“啪”一声，㫰衣裳个绳子断脱了，地浪向侪是落下来个被头、毯子，闯祸坯快点逃脱，隔壁好婆气得要死，只好勒太阳下头收作。
太阳快落山了。“衣裳好收唻！”有人喊了一声，大家侪从房间里跑出来，收㫰晒个物事，弄堂里向一片嘈杂声。
姆妈手里向拿好藤拍，勒棉花胎浪“噼啪、噼啪”穷拍百拍，拍清爽了再收进去。伊让我当下手，一叠叠衣裳抱到床浪向去，姆妈讲：“晒过个衣裳要㫰一㫰，热气散脱，要勿然，热气也会变成潮气个。”
几日天晒霉，姆妈实在是吃力煞了，但是，看到松噗噗个被头、邪气干爽个衣裳，闻闻空气当中淡淡个太阳香味，伊还是邪气开心个。黄梅天留下来个霉气侪没了，天也热得清爽了交关。
直到上个世纪九十年代初，原来住个弄堂侪拆迁了，阿拉搬进了高楼，爷娘也侪走脱了。梅雨天气还是年年会得来，晒霉，倒是已经成了历史。
当然，有个辰光也会得拿点啥物事出来晒一晒个。葛末，有眼画面就又会鲜活起来，心里向就变得潮乎乎个了。
精彩回顾：
图片来自渺渺