再谈上海人称谓密码（上）
朗读者
再谈上海人称谓密码（上）
作者：李大伟
改编：郭莉
朗读：徐佑琮
推荐:丁迪蒙
上海文化属于市井文化，勿是衙门文化，迭个一点跟北方是完全勿一样个。
从前仔个上海，属于工厂个上海，经济个上海，但勿是金融个上海。路浪向大家见面，问个路、借个火，抬手打招呼：“师傅”，迭个是尊称，也是开场白。“师傅”是传授拨侬吃饭家生个，搿只家生让侬有了养家活口个底气。民以食为天，师傅就是比地大的老天爷。上海人信奉“荒年饿勿煞烧饭个”，手艺比文凭金贵，师傅比老师吃香。技工凭手艺吃饭，技术就是铁饭碗。老师吃个是开口饭，风吹草动就失业，所以教师职业是只泥塑饭碗，经勿起落雨天个。相比十三级高干，八级钳工更值铜钿，一个八级钳工，跑出来是人人钦佩个。当官呢，赛过瓷饭碗，属于易碎品。文革辰光，当官个简直跟“一切反动派”一样个倒霉腔调，说倒就倒，侪成了纸老虎。现在尽管是文明得多了，但是侬一旦退居二线，“黄老”就变成“老黄”了。黄老是尊称，老黄是俗称。但是“老师傅”个老，勿是老黄个老、老朽个老、老棺材个老，搿是“老头子”个老。啥叫老头子？伊场面浪向是可以摆言话个，就是人家讲个“一锤定音”，又叫“一句言话”。老师傅敢跟老板光火、撞腔：“我讲勿来事就是勿来事！”要是当官个，敢搿能朝上头光火撞腔掼言话伐？
改革开放之后，上海从经济中心升华到了金融中心，传统制造业勒勒上海撑勿下去了。先是从劳动密集型个纺织厂开始，挨下来就是轻工、电子咾啥整个制造业，车、钳、刨侪勿需要了，老师傅也勿需要了，乃末“师傅”搿只称谓也就跟牢社会发展一道淡淡叫退出去了。代替“师傅”叫出声个，是“朋友”。“朋友”两个字，就是一碗水个水平面，呒没高低贵贱个。“吃上风头”个，要低调待人；低端草根个，不卑不亢。朋友之间，香烟嘛，勿论好坏，侬敬我、我敬侬，有来有去。“朋友朋友，碰碰揩油”，尽管是寻开心言话，但是透露出来个是平等意识。一直到上世纪九十年代，上海人看见仔熟人，还是勿分地位高低，拍拍肩胛，说明平等个意识还呒没变化。
后首来勿晓得哪能好像复古了，赛过回到旧时代了。男人是称兄道弟，女人是姐妹相称。不过迭个称呼里向倒仍旧暗藏一眼上海人亲、疏、远、近个密码：老伯伯是辈分尊称，大伯伯再是血缘敬称；阿哥是辈分，大阿哥再是骨肉；老阿姐是客气，大阿姐再是屋里向排行。凡是称呼里向带了大小数码个，侪是血缘性个称呼。迭个，好算是上海人个称呼密码。
假使称呼女性为小姐，葛末侬肯定勿是熟人，也勿是上海人，倒也勿是外地人，是啥呢？是只“书踱头”！“小姐”两个字，过去是尊称、嫩称，现在是“开黄腔”，是勿正经个地方“行话”。上海女人听到小姐两个字，会得回侬一句：“{亻那}娘再是小姐！”但是假使是姓氏加“小姐”，葛末搿位小姐是客户，但勿一定是年轻“小姐”。葛末陌生人见面，又勿晓得姓啥叫啥，哪能称呼呢？呶，同性之间，阿姐阿妹；男女之间，齐巧又是同样姓氏，上海人个老法称呼：“本家妹妹”，听起来亲切得来让侬推也推勿开。
点以下文字即有精彩回放：
图片来自网络