弄堂里向个回味 / 四六文摘

沪语朗读：俞镝

朗读者

弄堂里向个回味

原创： 章慧敏

来源：夜光杯

沪语改写、朗读：俞镝

指导、推荐：丁迪蒙

弄堂里向个味道是有仪式感个，伊包含勒某种象征意义，像乡愁一样，甜蜜而回味无穷。

又到了夏天。热天介有交关值得留念个物事，我个记忆常庄会停留勒弄堂里向传出个味道，几十年过去了，伊种五味杂陈到现在还忘记勿脱。

当年，我屋里向住个弄堂是新式里弄，弄堂蛮长也蛮阔个，弄堂到底还有口井。下半天4点多钟，井旁边就开始闹猛起来了，“噗通”“噗通”个声音就呒没停过，搿是夜到乘风凉个前奏曲，住勒底楼个人家大多数会得多冲几桶井水浇灭脱地浪向个热气，等到太阳落山了，勿少人家就端出简易台子围坐勒一道吃夜饭，弄堂里向个宴席就开张了。

伊个辰光呒没空调，再有钞票个人家也是开窗通风，清风带来了凉意，也拿灶披间个味道带了出来。隔壁人家今朝是吃葱烤大排还是油煎咸带鱼，鼻头好个是闻得清清爽爽呀。

我最喜欢勒夜快头到弄堂里向走一圈，像馋痨坯一样盯牢仔人家屋里向个台子看。勿管是西瓜皮炒毛豆还是炒辣酱、糟素鸡，我看侪是好吃个。我跑得最勤快个是隔壁头个美丽屋里。美丽是我个好朋友，阿爸姆妈管搭伊老紧个，勿许伊端牢饭碗跑出房门口。伊勿出门，我就上门，而且老是喜欢吃夜饭个辰光到伊拉屋里去。

美丽个姆妈从一楼个厨房间拿仔冬瓜汤端到二楼房间，一面顺牢扶梯上去，一面哇啦哇啦叫：“当心点，‘白笃肉汤’来唻！”砂锅盖勒海，勒期待中开开来，明明只有冬瓜，阿里得有肉啊？美丽个姆妈揩揩鼻头浪搭仔嘴巴浪个汗，笑嘻嘻个讲：“冬瓜雪白粉嫩，像肉伐？”我明白了。不过，搿镬子汤的确吓鲜，美丽个姆妈用小葱爆香了虾米，汤里向还加了扁尖，最后，从围袋袋里拿出瓶味精，邪气小心个撒了点勒勒汤里。搿一撒是带有灵魂个，使得现在我烧冬瓜汤个辰光，还会再现当年个情景。

我个阿爸每日天上班前吃个一碗面，也有飘得出窗外个香气。买切面是我个任务，挑最细个，一斤分四盘，然后摆勒大太阳下头晒干。我个阿爸下个阳春面汤头大、一小撮猪油，再就是香葱切成细末，红是红、白是白、绿是绿，加上猪油个香味飘散，色香味俱全。屋里有开洋了，阿爸就熬制葱油开洋，里向再加点鲜酱油；碰巧买到了花生酱，就舀几勺拿面拌透，搿个香味拿楼浪向个王先生也吸引下来了。

王先生是二房东，我屋里个房子就是从伊手里租得来个。叫伊“王小开”好像更加贴切：祖上拥有产业，靠定期利息过日脚。有趣个是我阿爸搭王先生好像勒吃面个问题浪欢喜比较，每日天早浪向7点钟过脱，伊拉就会得准时出现勒公用个灶披间里，侬吃拌个，我吃汤个；侬有葱油，我加蘑菇。有辰光，王先生个囡儿买到点籽虾，就细心个拨出籽，汏清爽，熬制好虾籽酱油，里向少勿了再摆点白糖，馋煞人啊。

有一天“巡视”个辰光，我看到水井前头阿四头一家门准备吃夜饭。阿四头一家门住勒汽车间，开门看见弄堂，只要天勿大冷，弄堂就是伊拉屋里个吃饭间。六碗白米粥老早就晾勒简易个台子浪向，阿四拉姆妈拿出一块方方正正个红乳腐，立时三刻，四双筷子邪气快个伸向乳腐，搿个辰光，阿四姆妈就要大声教训：阿二，粥还没吃就想吃菜？阿三，夹介大一块，人家还要吃勿啦？

搿块乳腐对我来讲，就像天底下最好吃个物事，我也老想去吃一口呀，但是呒没人在意我越靠越近个头。我马上奔到屋里去，哇啦哇啦叫：“姆妈，我要吃乳腐。”搿个要求勿难，我拿了5分洋钿，到一转弯就到个五丰酱园店买了一块红乳腐，回到屋里，姆妈还勒乳腐浪向浇了眼麻油，摆了眼绵白糖。但是，当我急吼拉吼吃个辰光，觉着伊也勿过如此，实际浪，缺少个是气氛作“调料”啊。

弄堂里个味道是有仪式感个，有个精细，有个粗鲁，但勿管哪能，伊包含勒某种象征意义，有一种肌肤之亲，温情而感性。像乡愁一样，甜蜜而回味无穷。