她们为啥更加愿意讲普通话 / 四六文摘

沪语朗读：杨子春

朗读者

她们为啥更加愿意讲普通话

作者、朗读：杨子春

沪语改写：丁迪蒙

在职个辰光，因为工作需要，经常到郊区去，发现一个蛮奇怪个现象：勿少女性干部勒谈工作个辰光，几乎侪用普通话讲个。开始辰光，我还勿以为然，时间长了，也看出了一些端倪。

我理解，伊拉之所以勿愿讲沪语，是因为沪语搭仔市郊个口音同属于吴语系统。同一语系个口音难免要“穿混”，葛就容易漏出当地个口音。只有是勿同语系个、以北京语音为标准音个普通话，再可以掩饰迭种尴尬。

相对来讲，女干部爱面子，伊拉勿愿意露出自家个当地口音，拨人留下来是“乡下人”个印象，伊拉认为搿个会得影响仕途个。毕竟，现在勒郊区工作个勿少领导是从市区下去个，沪语口音是主流。当然咾，伊拉个普通话讲得也老好个，搿说明：介许多年数，推广普通话个成果实在是惊人。

相对来讲，男性干部个语言学习能力稍微推板一眼了，伊拉个表现应该是更加真实一点，伊拉也好像无所谓，要去刻意个掩饰点啥，当然咾，也难免要出现点问题个。有一趟，我到市郊个某个大镇去参加一只会议，镇领导勒讲闲话了，开始辰光，伊还勒用官方语言——普通话表达，没多少辰光就自然个滑到了本地方言，讲发讲发，一些勿大雅个“标点符号”就勒句子里出现了，伊个形象马上就受到了损害。

因为地方浪个人普通话是通过语文课本来学习个，比较具有规范性，骂人个词语几乎三呒没个；而地方方言则是覆盖了公众个搭仔私人个空间，出现一些勿大雅、勿大好听个词语也是勿足为奇个。

有位朋友，平常一直只讲普通话个，我曾经认为伊是从北方来个。后来再晓得伊是属于姑苏地域之人，之所以勿讲沪语也是担心，担心露出同一语系个吴语口音。随便哪能讲，吴侬软语从男性个嘴巴里向出来，多少有点让人产生“娘娘腔”个联想，呒没了阳刚之气，搿对伊应该也是邪气勿利个。

看来，勒现在个社会里向，人讲啥、哪能讲，还包括用啥个语言来讲，侪勿可能是随随便便个。从迭个意义浪讲，对语言以及口音个研究好像勿能只是停留勒语言学个范畴，搿搭还有交交关关社会影响因素个考量。也许，搿正是语言社会学所需要研究个问题。