“文革”忆旧
沪语朗读：俞镝
作者：鲍国海
改写、朗读：俞镝
“文革”辰光，阿拉买食品侪要凭发放个票证，每年年底前发下一年个，分为12个号头。当月粮票只能当月使用，过期作废。一般来讲，老人，小人，女人，学生子，知识分子个粮食定量比较低。
我中学毕业后去了海丰农场，后来参加电厂培训个辰光，每个号头个粮食定量达到了创纪录个43斤。因为我从事个体力劳动是冷作工。当时荤菜吃得少，因此每顿饭，我至少要吃四两白米饭，白馒头也可以吃3到4只。
到国营粮店买米，除了要带粮票外，还需要凭购粮证，由粮店勒上头记录购买粮食个数量。比方大米几斤或是梗米、面粉、面条几斤。上海市个粮票只能勒上海使用。假使到外地去出差，就要凭单位证明到粮管所用上海粮票按照出差天数，调换成全国粮票。但假使侬勒外地使用全国粮票，当地商店营业员拿侬呒没用光个粮票找拔侬个辰光，拔个是全国粮票搿还可以勒全国各地使用，假使是当地粮票，就只能勒当地使用。回到上海搿点粮票就成了废纸头。
除脱粮票外，发个票证还包括油票搭糖票。可以买豆油或菜油。麻油呢，是老稀缺个，只有勒节假日按户供应。发票证要分大户搭小户。我屋里向5个人，正好属于大户。
现在，山芋作为健康食品，勒小菜场，一年四季侪能买到。但”文革”辰光，只有勒每年个固定辰光（好像是下半年某个号头）才能勒国营粮店按户供应，年糕也是搿能。粮店卖个精白面条是为了庆祝毛主席12月26日生日才按户供应，平常辰光老难买到个。
还有发个糖票，可以到食品店买白砂糖或赤砂糖。作为零食个大白兔奶糖搭椰子糖，牛轧糖平常辰光也老难买到个。
夏天个西瓜也是紧俏商品之一，伊只有勒水果店才能买到，而且需要排队购买。现在，西瓜一年四季侪可以买到。记得文革有一段辰光，水果店只供应西瓜肉，据说瓜皮另有用场，是否运到厂里做成酱瓜，就勿晓得了。
当时，水果店装水果个是纸头袋袋，有黄颜色个牛皮纸，也有用旧报纸做个。还有一种竹编镂空个水果篮，勒盖头下头放了一张印有商店名称个红纸头，再用绳子扎牢，拎勒手浪向，成为送礼佳品，现在也看勿到了，取而代之个是满世界侪可见个塑料马甲袋，伊正勒勒对地球环境造成危害。
每年个春节前，国家按居民大、小户发放春节食品劵。每家每户可以分别到国营小菜场买到平日难得一见个食品，像带鱼，黄鱼，豆制品，还有金针菜，黑木耳，瓜子咾啥。因此，春节里向个老百姓屋里比平常辰光个菜要丰富。当然，买肉要凭肉票个。当时，有些菜需要事先排队，小人就被大人叫去小菜场排队。于是，有些人拿菜篮头或砖头代替排队，自然，免不了吵相骂。当时，去小菜场买菜，顾客们侪拎了竹头或着用扎箱子个尼龙带子编成个篮头，搭现在个布袋袋搭马甲袋勿一样个。
伊个辰光，农村勒割资本主义个尾巴，搞个是集体经济。生产队个农作物由国家实行统购统销。因此，有些现在小菜场买得到个蔬菜水果，当年侪难得一见。
唯一值得一提个是，”文革”辰光，全国老百姓个收入普遍低，因此物价也低。大饼3分洋钿一只，油条4分洋钿一根。现在侪涨到3、4元了。
记得有一趟，我搭仔阿爸去看望老爹，勒唐山路近大连路口个一爿水果店买水果。当时阿爸勒付钞票，我勒旁边等伊。我看到一个小青年，年龄比我大眼，趁营业员不注意个辰光，偷偷叫拿了一只苹果闶勒长袖衬衫个袖子管里，若无其事个走了。后首来，我搭阿爸讲起搿桩事体，拨伊狠狠叫批评了几句。主要还是因为我有眼吓伊报复而不敢声张。我一直侪缺乏当年提倡个革命小将个”五敢精神”（敢想敢做敢革命……）
总之，”文革”辰光老百姓吃个物事侪是计划供应个，搿搭改革开放后食品丰富多彩并敞开供应形成了鲜明个对比。
上海言话叙身边事体
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号