上海闲话面临生存危机（上）
沪语朗读：宋宝权
朗读者
上海闲话面临生存危机（上）
作者：宋宝权
文字修正：丁迪蒙
朗读：宋宝权
我是一个七十岁朝外个人了，爷娘侪是从浙江绍兴移民过来个，自家末生勒养勒上海，也是一个老上海了。最近听了沪语朗读《我个上海》，眼面前侪是老早仔勒了马路浪厢、弄堂里厢、屋里厢一道讲上海闲话的画面，觉着邪气亲切，葛末自然而然就想到了上海闲话个将来，心里向马上就有点搭搭动，觉着搿桩事体忒重要啦，邪气有必要借助网络平台搭大家一道来探讨。
开头呢，让我先讲一桩老底子个事体，大概三十年前头，我到美国去读研究生，介大年纪去读书，上海人讲有点现世。搿个地方华人特别少，我英文末又老推板，交关孤独。我个导师是个犹太人，特意通过当地教会帮我寻着一个华人，让伊来关心关心我。伊是个女的，碰巧也是上海人，解放前就到美国，在当地做钢琴家教。人家主动跑来寻着我，邪气客气、邪气热心，大家侪叫伊May。第二趟碰头末我照道理带样小礼物送拨伊意思意思，伊开口第一句闲话就是“介客气做啥啦？我伲侪是自家人呀，勿作兴个！”
“勿作兴”阿拉平常已经勿大讲了。勒勒三四十年代个上海，“我伲”是社会上层比较通用个，下层通用个是“阿拉”，现在末，老早就合两为一了。侬假使搭May讲“摆噱头”、“掼派头”、“触霉头”搿种上海闲话，伊句句听得懂，伊也会得讲，但是假使侬讲啥个“茄三胡”、“扎台型”、“吃老酸”，“老吃老做”, 伊就呆脱了。原来介许多年数以来，May平常是勿讲上海闲话个，也勿接触上海人，所以伊个一口上海闲话，就好像是老底子原生态个上海闲话速冻起来了，一解冻末，完全原汁原味。搿是我第一趟晓得，噢，原来伊讲个是过去上海闲话，我讲个呢，是现在个上海闲话，迭样子看起来，还会有得将来个上海闲话。讲句老实闲话，迭个辰光，真是杀头也想勿着，仅仅三十年以后，上海闲话就已经面临生存危机。
据上海方言专家钱乃荣老师介绍：1291年个辰光，上海已经是一个滨海大港，一个有别于松江方言个上海闲话开始形成了。上海有80% 以上个人当年侪是移民，迁来个人主要是江浙人口，还有比较多个安徽人，迭些人到了上海以后，搭本地人一道，拿上海闲话全面翻新。上海人最早接触到近代现代文明，交关物事侪是上海人先看见，先摸着，啥个“电车，汽车，卡车，火车”，啥个“马路、洋房、自来水、电灯泡”，啥个“笔记簿、雪花膏、花露水、水果糖”，亨八冷打侪是勒勒上海闲话里先产生，再拨普通话吸收个。连得普通话里大量个外来语，啥个“色拉，咖啡，啤酒，凡士林”，多得数也数勿清爽，侪是从上海闲话里批发过去个。上海后来成为一个发达个商业城市，所以，上海闲话里向迭方面个痕迹特别明显。连得日常生活用语也带有一眼做生意的味道，像“饭碗头”，“吃饭家生”，“吃萝卜干饭”，“卷铺盖”；像“买账、卖样、讲斤头，打回票”，实在忒多了，迭个就是发达个商业社会带来个。上海闲话介有力道，所以末，当听讲啥个上海闲话以后就越来越勿来三了，最后要翘辫子个，真个是魂灵头也吓出来了。钱老师讲：假使上海闲话消灭了，再回过来是勿可能个，像人死脱一样。
当然也有一种观点，讲语言本身个生存机制就是自行选择，意思是优胜劣汰，自生自灭，当然也有伊个道理。但是我认为，迭个恐怕只是道理个一个方面，还有另外一个方面也老重要，否则，生物界侪是优胜劣汰个，做啥要花介许多钞票去保护熊猫呢？艺术界也侪是优胜劣汰个，做啥一直勒勒呼吁保护和弘扬京剧，勿让伊自生自灭呢？迭个至少说明只要主观上努力，结果就会得勿一样。同样个道理，关键还是要看上海闲话是勿是已经面临生存危机？到底有勿有保护个价值？侬讲对伐？
上海闲话当然也有缺点，首先是要学到一口标准个上海闲话勿大容易，上海闲话相对侪比较平，外地人要完全克服原来各地方言个乡音痕迹有点吃力。其次，上海闲话是典型个口头语言，绝大部分上海人根本用勿着晓得字哪能写法，所以交关字侪写勿来，字典上查勿着，汉语拼音也拼勿出，有个要借助声音相近个字顶替，只好硬上，葛外地人就更加衰瘏了。普通话所具有个通用性优势，再加上仔上海闲话又比较难学，造成现在新上海人当中能讲够一口流利个上海闲话个真是凤毛麟角。新上海人侪勿大肯学，迭个当然是上海闲话面临生存危机个一个重要原因。
精彩回顾：
图片来自网络