阿娘
沪语朗读：王维杰
阿 娘
作者：王维杰
改编：郭莉
修正：丁迪蒙
朗读：王维杰
“阿娘”是宁波人对祖母个称呼，阿拉屋里向并勿是宁波人，只是因为小辰光，我个阿娘还呒没退休，父母亲日里向就拿我交拨一对宁波老夫妻照看，宁波人让我叫伊拉为“阿爷、阿娘”。结果呢，我对自家个祖父祖母也叫起“阿爷、阿娘”了。
阿爷、阿娘是生活勒苏州个，苏州人觉着迭能个叫法邪气特别，乃末索介一条弄堂里向个人家，侪叫伊“阿娘”了。阿娘讲迭个言话个辰光显得老开心个。
小辰光，母亲对我比较严厉，我是勿敢出去闯祸个，只有勒阿娘面前我再敢发发嗲、想哪能就哪能。但是呢，阿娘住勒苏州，我只好等到放暑假了，再好到阿娘身边去过两个号头个“随心所欲”个快乐个日脚。当然咾，我个阿娘也盼勒海，希望暑假快点来。学堂放假个前头一天，阿娘必定到上海来领我了，第二天就带我乘火车到苏州去。每一年个搿个一日天是我一年里向顶顶开心个日脚。
到了苏州，葛就是我个“天下”了：可以睏睏懒觉，想吃啥可以随便点，勿管我提出啥个要求，阿娘侪会得满足我个。我忘记勿脱个，还有门前头个一片树阴，搿是阿拉乘风凉、休息个地方。热天介个夜快头，，蚊子邪气多，还有，蝙蝠也老多个，横冲直撞个蝙蝠有辰光飞得老老低，有辰光差眼撞到我个耳朵浪，我“哇”个叫起来了。勒房间里向烧饭个阿娘要紧勿煞探出头来，问我哪能了，我回答伊“没事体”，阿娘就继续去烧菜了。我邪气调皮个，又故意“哇”个一声，阿娘马上再探出头来看，我个表情仍旧是搭刚刚一样个紧张。阿娘晓得，我是故意勒搭伊捣蛋，就“教训”我了：“小鬼！覅瞎叫！”口气虽然是责怪个，但我一眼也听勿出有得生气个意思。我迭个勿听言话个“小鬼”觉着搿只游戏蛮有意思个，接下来就歇勿歇个叫一声，每一趟，阿娘侪会得探出头来看。我邪气开心，勒阿娘探头看我了，我还勒哈哈大笑。但是，阿娘却呒没像“狼来了”故事里个农民搿能，拨“弄松”以后再也勿睬我，而是反反复复个拿手里向个事体停下来，来看我，每次侪勿会漏脱个。
搿片树阴下头，是我跟阿娘勒一道个辰光最多个地方。阿娘手里勒搭我做冷天介个棉鞋，我呢，抱了半只西瓜挖来吃。就搿能，阿娘断断续续讲了伊自家个故事。
阿娘生勒民国年间，屋里向邪气穷，从小伊就帮人家做生活，右手个食指尖是鼓出来个，像根自来火，搿是小辰光拨东家用鞋子打，受伤发炎，又呒没钞票去看医生，弄成了迭副样子个。伊拿东家小囡吃下个西瓜皮偷偷叫收起来，拿红瓤啃清爽，再削成西瓜翠衣，腌好西瓜皮，可以做成后几日天个小菜，阿娘有得三个弟弟、妹妹，伊要经常帮爷娘照顾屋里向个。后首来，即使是勒勒物资邪气紧缺个年代，阿娘也从来勿会让我爸爸搭仔孃孃伊拉饿肚皮、着勿暖，伊自家呢，一整天能够吃到个，就只有一碗泡饭了。
其实，每一次搿眼言话侪是从我个好奇心开始个。开头，我总归是听得邪气认真，脑子里向侪是伊当年受苦受难个样子，心里痛得勿得了，眼泪水也要流出来了，为了勿让阿娘发现，我就存心打岔或者做出心勿在焉个样子，让伊勿好再讲下去。所以，阿娘个故事总归是听勿完整个，现在再想听，却已经勿可能了。
阿爷先走脱。一走脱我就开始担心阿娘了。担心伊一家头会得厌气，担心伊舍勿得吃，舍勿得着，担心伊掼倒爬勿起来。开始辰光，我拿几百元洋钿孝敬伊，但是，我老快就发现，伊根本勿缺钞票。她勿要用冰箱，空调，只吃一眼眼蔬菜。每个号头有两千块退休工资，伊侪存勒海，碰到小辈结婚、生小囡了，伊就几千上万个送。假使有人去望望伊，伊倒要准备好一桌邪气丰盛个菜来招待，伊自家吃得老少个，欢喜看阿拉吃。后来，我再去苏州看伊个辰光，就索性勿讲拨伊听了，怕伊忙得吃力。阿娘晓得我欢喜吃面，就硬劲拉要我到楼下头最有名个苏州面馆去吃面，只买一碗，讲伊已经吃过了，然后呢，就开开心心个看牢我吃。等到我个面侪撩光了，伊再端起面碗拿剩下个汤侪吃得精光，还搭我讲，勿好浪费个啊！
阿娘是越来越老了，行动也越来越木觉觉，走到阿里侪离勿开拐杖。孃孃经常要接伊去屋里住脱一枪，但，住勿了多少辰光伊就吵勒要回转去，伊是怕麻烦别人，哪怕是自家个子女。
一个阴丝呱嗒，雨水勿断个清早，我觉着阿娘个呼吸开始越来越弱了，晓得将要发生啥事体了，心里吓得要命。搿个一天，我是从来也勿敢去想个，终于还是来了。我拉牢阿娘个手，想让阿娘慢一点离开！但是，我终究没能够留牢阿娘，虽然讲，阿娘已经高龄95岁了，但我还是希望伊永远活勒海！
我相信，伊一定到天堂里去了，勒天堂里，阿娘一定勿会得再受苦！
本公众号最近发布的原创链接：
图片来自网络