新旧裁缝师傅
沪语朗读：高仁
朗读者
作者：裴天蓉
刊登：新民晚报
推荐：丁迪蒙
上世纪八十年代上海裁缝师傅开始吃香起来，南京路浪交关可以定制服装个有名服装店重新开了起来，譬如培罗蒙、鸿翔……名店里个裁缝师傅基本浪侪是老师傅了。侪是有祖传手艺嗰，就是人家讲个红帮裁缝，做出来个衣裳裤子老精到了，大家对里面个裁缝师傅也侪是恭恭敬敬嗰。当然埃歇辰光一般人家平常不大会进名店，普通人家顶多辣橱窗外面看看白相相。一部分讲究人家等小人结婚了或者亲眷有喜事，就去做一件或者做一套，辣正规场面穿穿。
开了南京路个名店价钿高，一般人家是承担勿起嗰，想做新衣裳就去小马路，请小裁缝做，勿但价钿亲民，还可以讨价还价。小马路浪向有交关夫妻老婆店，男人裁剪，女人踏缝纫机，定做一件衣裳或一条裤子二三天就可以了。埃歇辰光港台电视剧辣电视里放了，有人从电视里看到新潮服装就叫小裁缝做，小裁缝也会做出来嗰。
要做衣裳总归要买布料，南京路就有交关布店，譬如：老介福、协大祥……埃歇辰光布店生意老好嗰，一般人家屋里侪是去买布料做衣裳，勿大去买现成衣裳嗰，因为成衣价钿相对高，大家手里勿宽裕，侪是能省则省。当然埃歇辰光还有布票好用。
阿拉屋里楼上有一个阿姐辣布店工作，阿拉老眼热伊嗰，经常到伊布店去白相。呒没顾客个辰光，伊就会跟阿拉谈点三海经，有辰光还透露点消息。有处理个便宜布料，阿拉就会叫伊帮忙剪一块，伊会帮阿拉计算做衣裳或者裤子需要个布料长度，尺寸邪气精确。有辰光我呒没带钞票，经她一介绍，就决定买了，再回去拿钞票。买好布料就直接送到小裁缝搿搭。
上世纪九十年代，上海人个生活丰富起来，经济水平提高了，衣裳样式越来越多，屋里老早衣裳侪要淘汰了，一年四季侪要换了，就有人家请裁缝师傅到屋里来做衣裳。阿拉也通过熟人介绍请了一对外地小夫妻到屋里做衣裳。阿拉自家屋里有一台缝纫机，再问隔壁邻居借了一台缝纫机。一对小裁缝本事蛮大嗰，侬得伊讲啥式样，伊拉就帮侬做啥式样，做出来就搭外面买来差勿多，不是内行看不出区别。裁缝师傅早上来屋里，一直做到夜里回去，连做一两个礼拜，基本浪屋里个四季服装侪搞定了。再后来，老百姓生活水平侪提高老快，服装店一爿一爿开出来，服装侪是工厂里做出来嗰。做工精到，价钿也能接受，大家就不高兴请裁缝做衣裳了，要想换新衣裳就到店里去试穿，满意了就买下来。
大家不做衣裳了，就不会去布店里买布，布店生意不好，一爿一爿店开始关脱。一部分名店虽然呒没关脱，但是也从大马路转移到小马路去了，门面也小了。交关小裁缝也转行了。
近年来，新潮个裁缝师傅又开始出现，有个还从外国留学回来，搞设计，开工作室，开了上海高档地段。拿服装做出个性化，艺术化。有做西装、中装。不过，大家也不叫伊拉裁缝师傅了，伊拉名片浪印个是：形象设计师。有嗰还是老板本人兼职，反正又朝新个高大上发展了。
图片来自网络
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号