一个上海男小囝个品牌意识 / 四六文摘

沪语吟诵：渺渺如胭

朗读者

一个上海男小囝个品牌意识

原创： 沈嘉禄

来源：老有上海味道

上海话改写：郭莉

朗读：渺渺如胭

推荐：丁迪蒙

勒我读书以前，一眼呒没啥“品牌意识”，爷娘拨侬吃啥就吃啥，拨侬用啥就用啥，只要饿勿着肚皮，冻勿着身体，就阿弥陀佛了。不过，到底也会得有眼勿一样个物事，譬如弄堂里有人叫“光明牌奶油雪糕棒冰——”乃末晓得棒冰是“光明牌”顶好，冰砖、紫雪糕也是迭只牌子奶油味道最浓。当然，大热天小囡有棒冰吃，随便啥牌子侪是好个。

读书以后就慢慢较晓得品牌比较了。铅笔，长城牌可以平常做做作业，我加入美术兴趣小组，老师要求用专门个中华牌4B铅笔画图，迭个就贵交关了，一角洋钿一支。伊比长城牌铅笔更浓更黑，画素描顶好。中华牌个2H普通铅笔，邪气经用，勿会断，考试用伊最保险。我爸爸是工人作家，六十年代为了科普需要，伊写过《铅笔的故事》《橡皮的故事》，乃末我懂得了一支铅笔一块橡皮，侪要经过几十道工序，所以要珍惜，勿好浪费。现在中华牌铅笔还是好品牌，全国两会、国务院会议、外交部会议，甚至跟外国人多边会谈介大个场面，伊侪当仁不让，大大方方摆勒会议桌上。1992年邓小平南巡到上海，勒勒市百一店还买了中华牌铅笔带回去，当作礼物送拨屋里个孙辈。

阿拉读书辰光，功课是勿多个，勒勒学堂里就好做脱了。当时庄则栋、徐寅生咾啥一批乒乓球运动员“为国争光”，先进事迹鼓舞人心，差勿多所有中小学侪开展了乒乓球活动，放学了就拿几张课桌一拼，几个人一组打乒乓球。乒乓球搭仔乒乓球拍，也是有各种牌子个，红双喜当然是最好个，但是小学生一般买勿起红双喜，只好买买两角洋钿一只个盾牌、蝴蝶牌、连环牌乒乓球。最低档个等外品乒乓球，只要六分七分一只。但是质量实在勿来事，一抽一削，乒乓球勿是瘪脱就是裂脱。迭个辰光，校乒乓队个同学是有机会用红双喜参加比赛个，我也体验过一把，红双喜弹性足，球勒勒飞个辰光会得下沉，有利于运动员完成各种战术动作。迭个印象也加深了大家个品牌意识，心里侪想，要是我有钞票了，一定要买只红双喜乒乓球来抽抽。

再长大一眼，对科学知识产生了兴趣，开始动手做小实验，就发现白象牌电池是顶顶经用个。美术小组要画水彩画，乃末又晓得了水彩颜料最好是马利牌，商标是两只马头，一黑一白。我爸爸讲：“搿只牌子有殖民地色彩，马利，勿就是外国人名字吗？”现在还有马利牌颜料，是勿是外国人名字我到现在也勿清爽。伊歇辰光扑克牌、象棋、跳棋咾啥娱乐用品，侪是有牌子个，牌子名气越响，价钿越贵，质量当然也越好。一分价格一分货呀。

阿拉搿辰光有机会接触个品牌应该还有正广和汽水、米老鼠奶糖，后来听说米老鼠代表了美国文化，就改成大白兔奶糖了，还有五福牌乐口福、光明牌奶粉。

日用品方面有一只固齿灵牙膏，黄颜色个包装壳子浪写个是三个绿颜色繁体字，笔划多得吓煞人，结果刺激我记牢了伊。汏衣裳要用固本肥皂，用半透明又有香味道个扇牌肥皂就有眼嗲了。还有三星牌蚊香、龙虎牌人丹、龙虎牌清凉油、双妹牌花露水，侪是大热天屋里向常备个。冬天么，友谊牌雪花膏或者雅霜、蝶霜、百雀羚，还有一种蛤蜊油，上海人勿关字那能写，侪叫伊“哈利油”，也是有牌子个，不过我记勿起来了。

等我进中学了，又晓得了英雄牌铱金笔书写流利，用起来得心应手，同样档次个永生牌也勿错。阿拉屋里有两支博士牌金笔，大包头，粗笔杆，别勒中山装上插袋里，简直就是新知识分子个标志，但是我大阿哥讲，搿只牌子是旧中国留下来个，体现了成名成家思想，应该淘汰。原来品牌还有阶级性啊！所以后来我看到商店里交关“红星”“跃进”“战斗”“兴无”“反帝”“群众”等等印上时代烙印个品牌，就勿会奇怪了。

看来阿拉交关商品，物事蛮好，但是品牌做勿大，做勿强，跟名字起得好勿好，是有老大关系个。当然，市场经济启动以后，知名品牌受到假冒伪劣侵权，对迭个打击力度勿大，企业自身品牌培育勿够，自我保护意识勿强，也造成交关民族品牌一直处于弱势地位。

啥辰光，会得有更多个民族品牌，能够再一次风光起来呢？