故里春秋（十六）
作者：朱海洪
沪语改写：边秦翌
沪语讲述：金丽萍
有一日，小路浪突然开过来一部“乌龟壳”小轿车，搿是从来呒没看到过个。半个多世纪之前，轿车只有大官再可以坐。啥个是大官呢？大官个标准是正局级，也就是行政11级以上，坐了搿只“乌龟壳”里向个起码是个局长。
“乌龟壳”开过来个辰光，从“三德里”正好走出来一个男人，伊酒气冲天，拿“乌龟壳”挡牢了。迭个男人看上去四十几岁，黑发背头，鼻梁浪戴副黑框眼镜，面孔血血红，指牢仔“乌龟壳”，讲：“有啥个好神气个啊，老子勿吃搿一套”。
“乌龟壳”一记头停下来，静静叫停勒马路当中。
醉汉挡道，路人侧目。
“鲁智深”意味深长个讲了一句闲话：“㑚晓得伊是啥人伐？伊就是画《三国演义》小人书个画家呀。”
“乌龟壳”勿好动，男人嘴巴勿清勿爽，走过路过个人就看闹猛。最后，有热心人实在看勿下去了，上去拉男人：“老徐老徐，有闲话好好叫讲！”
“乌龟壳”终于脱困，慢慢叫朝牢仔北京路方向开脱了。男人勒勒大家个劝说之下，照样勿肯罢休，指勒“乌龟壳”个背影子骂发骂发。
迭个老徐，大名徐一鸣，的确是《三国演义》连环画画家。
连环画算得上是中华国粹，发端于上世纪初个上海滩。二、三十年代，连环画成为一种产业。一开始，上海人拿连环画叫做小人书。1927年，上海世界书局出版了一套《连环画三国志》，“小人书”再有了正式个“连环画”迭个名字。伊个辰光画小人书比较出名个画家有朱润斋、周云舫、赵宏本、钱笑呆、陈光镒、颜梅华、徐宏达、丰子恺、张乐平、董天野咾啥。徐一鸣个名气呒没伊拉响，但是也算得上是相当勿错个老上海连环画家。
徐一鸣是上海人，就住勒新昌路个“三德里”。伊从小受到街头艺人个启发而欢喜画画。17岁个辰光，徐一鸣自编自画了一本小人书作品，寄拨一家私营书局，呒没想到顺利出版。伊开心得勿得了，决定终身画小人书来谋生。
画小人书勒勒解放之前人家是看勿起个，就算是名家，实际浪收入并勿高，生计邪气勿容易。高头讲到个名家朱润斋，住勒成都路热河路一带，以画小人书养活一家门七个人。伊一开始为宏泰书局供稿，老板邪气苛刻，每一页（即两幅）只拨伊4角洋钿。后首来，志成书局出一页6角洋钿个代价拨伊挖过去。可惜，物价上涨，生计维艰，朱润斋只好搭老板借钞票，也就是靠预支稿费来过日脚。结果积劳成疾生肺病了，因为一直是寅吃卯粮，实际浪屋里向也呒没钞票让伊去看毛病，还要带病继续画画，朱润斋46岁就不治身亡。伊死个辰光，屋里穷得连一口薄棺材也买勿起。朱润斋个经历是解放前交关小人书画家艰辛生活个缩影。
解放之后，连环画业出现了转机。特别是五十年代，上海连环画进入黄金时期，涌现出一批邪气有名个画家搭仔优秀作品：
像贺友直个《山乡巨变》，刘继卣个《大闹天宫》，王叔晖个《梁山伯与祝英台》，华三川个《白毛女》，戴敦邦个《逼上梁山》，赵宏本个《孙悟空三打白骨精》，钱笑呆个《红楼梦》，顾炳鑫个《渡江侦察记》，任率英个《桃花扇》，丁斌曾搭仔韩和平合作个《铁道游击队》，张乐平个《三毛流浪记》咾啥，数也数勿过来。
1957年，上海人民美术出版社准备出大型系列连环画套书，就邀请徐一鸣搭仔其他众多名家，共同创作60本一套个《三国演义》。徐一鸣参与完成了其中个三本：《跨江击刘表》（徐一鸣、屠全枫）、《铁笼山》（徐一鸣、屠全枫）、《小霸王孙策》（蒋萍、徐一鸣、屠全枫）。
搿大概是徐一鸣最最开心个一段辰光。
可惜，连环画业个阵痛不期而至。
1955年，中央开始加强“私营文化事业搭仔企业个管理搭改造”，上海市委成立了“处理反动、淫秽、荒诞书刊办公室”。1956年底，上海处理脱旧小说、旧连环画150多万册。新陈代谢使得旧连环画基本退出了市场，交关从业人员要么蹲勒屋里，要么回乡当农民。
徐一鸣个怨气由此而生。
往期回顾：
图：网络 / 编辑：渺渺