刻花样（上）
作者：张国淼
改写：周红缨
讲述：王幼兰
阿拉小辰光，白相个物事搭现在比差别大得勿得了，现在回想起来，仍旧邪气有趣。我此地就讲一桩事体。虽然已经过了交关年数，但是现在回忆起来，我记忆犹新，回味无穷。搿就是勒男女同学之间、勿同年级之间流行个“刻花样”。
啥叫啥“刻花样”？就是看到一些纸质镂空花样个图案，想办法转变成自家个物事。“花样”一般是拿同学有个“小人书”以及“连环画”浪个图案，比方《铁道游击队》《地道战》《苦菜花》里向个一些人物个形象刻成个“花样”，借到屋里向翻刻，变成自家个“花样”。
哪能介刻花样呢？一般是拿借来个花样摆勒光滑个台子浪向，或者拿块比较大个铁皮“垫板”，拿借来个“花样”摆勒“垫板”浪，勒“花样”上头盖张白纸头，拿铅笔或者蜡笔，沿牢仔“花样”印一遍。完成以后，白纸头浪会有原来“花样”清晰个深淡线条。然后用刀片或者薄个“双面剃须刀”、是大人刮胡子个剃须刀片——我记得是“飞鹰牌”，拿涂好个“半成品”——印好个纸头，邪气小心个拿淡部分刻脱，深颜色个、细细个人物或者景色个线条要保留下来。
有辰光，为了突出线条效果，有人会得拿毛笔蘸墨汁上色。拿线条仔细涂一遍，晾干之后，假使觉着黑颜色有得深淡，就再拿毛笔蘸墨汁涂一遍，晾干之后夹勒书里。过一夜天，黑线条个花样就会得老平整个“睏”了书里向。第二天去读书，就好拿迭个“成果”展示拨同学看了。
假使搿张图案邪气精美或者“刀工”老细致，大家就会得伸大拇指表示“侬来三”，甚至还会有同学借得去印，去刻。第二天再拿来还拨侬。
葛末，侬是否肯借呢？迭个也有讲究个。
一般侪是关系好个同学再肯让伊借转去，或者，要借个同学也要拨侬看伊个“精品”，来作为交换。
迭能，一段辰光下来，有搿个爱好个同学，就会积起交关，数量繁多、题材丰富个“花样”，成为了埃个辰光学生时代个一道亮丽个风景线。
屋里向经济条件好眼个，会得去买眼勿同颜色个“蜡光纸”来翻刻。“蜡光纸”正面颜色鲜艳，亮丽，有各种颜色，反面是白个。印“花样”辰光，拿“蜡光纸”正面覆盖勒“样品”浪向，搿能拿铅笔涂比较便当。“蜡光纸”刻个“花样”的确勿同，让人看了“啧啧”称奇，交关眼痒。为了刻好“花样”，我做过一些刻“花样”个尝试。
我小学读过两只学堂。杨浦区控江五村小学，我读两年级，就开始刻“花样”了。开始辰光，“刀功”勿熟练，只好刻些线条粗个，弄得勿好还会得拿刻断脱。四年级，我转到长白一村小学读书，“刻功”已经比较结棍了，好用刀片刻比较细个线条图案了。
我欢喜写毛笔字，因此，“花样”刻好之后侪会用墨汁涂黑，同学侪晓得，我个“花样”基本浪侪是黑颜色个，迭个几乎成为了我个“花样”特色。拿黑颜色个花样摆勒白纸头浪，白纸头衬托黑线条，黑白分明，效果蛮好。
我曾经刻过张“孙悟空三打白骨精”个“花样”，惊动勿少同学。我拿“孙悟空”身浪个猴毛也刻得“一丝不苟”“毛发毕现”。伊拉侪讲：“侬哪能刻得介仔细啦？”
搭做好任何一桩事体一样，基本功邪气重要。刻花样个基本功主要就是掌握刻刀刻纸头个功夫。
印好花样个纸头，垫勒铁皮垫板浪向，刀勒纸头浪一面刻一面走，要根据线条个粗细去走刀、转折，该快个要快，该慢个地方要慢，勒细微个地方，还需要屏牢呼吸走刀。
搿些体会，现在写写蛮便当，勒当时的确要多刻多练，再好逐渐驾驭刀片，得出搿些经验，同时，又培养了做事体认真仔细个好习惯。
（未完待续）
往期回顾：
图：网络 | 编辑：渺渺