讲讲上海方言之——再话迭嗰“洋”字（方言文章）
“上海”是中国最早开放呃城市之一，勒拉1843年伊就畀开埠嘞，而且是一座五方杂处呃城市，像迭种类型呃城市，是邪气容易接受外唻文化搭多远文化呃，因此讲城市文化是兼容并蓄兼而有之呃。
勒拉交关多呃上海文化搭上海方言语言当中，覅可或缺呃元素之一就是——迭嗰“洋”字嘞，伊见证嘞上海迭座城市呃昨天仔、今早仔搭明早仔，勒拉上海人呃每日俗常生活当中，可以讲，绝对是离覅开一嗰洋字呃，很有可恁伴随着时代呃变迁，当历史呃车轮走到嘞今早仔，迭嗰“洋”字使用频率并覅是邪气多，变得越唻越少嘞，尽管是迭恁样子，有时还恁听到有人讲一眼搭“洋”字有关呃閒话。
比方讲：就拿自家举一嗰例子唻讲伐，当辰光走到嘞今早仔，本人已经是走过嘞四十三年春秋，勒拉迭嗰四十三年春秋当中，还勒拉蓦然回首间，突然之间发觉嘞一桩自认为交关有趣呃事体，自家曾居住过两嗰城镇，侪都搭“洋”字脱覅了关系，邪气有得缘分呃。
自家所居住呃第一嗰城镇，伊呃名字叫做“高桥镇”，伊有得800多年呃历史，还有得“营造之乡”呃美誉，勒拉上海滩呃历史哴向，涌现嘞覅少呃建筑方面呃专家搭大师。钟惠山曾建造过“会乐里”、“慎余里”等石库门弄堂建筑;叶宝星曾建造过“衡山饭店”、“永安公司”等建筑;杨瑞生建造过“淮海电影院”、“星光大戏院”等建筑……就勒拉老呃高桥镇上头，有得一条街道，伊老底子呃名字叫做嘞“白洋滩”，今早仔伊呃名字就畀改成嘞“石家街”。至今还恁够清楚呃去记得，勒拉自家呃少年时光里向，既覅管是去外婆屋里厢做人客白相相；也覅管是去浦西外滩、老城隍庙豫园、南京东路白相相；更覅管去居住勒拉虹口区东汉阳路上头呃大姨夫大姨妈沈小兔搭倪榴娣屋里厢做人客白相相；“白洋滩”是眼扳数要走过呃，而且还是一条必经之路。
当本人长到嘞十六岁以后，因为父亲货币分房，购买嘞一套新房屋，屋里就搬迁忒嘞，所搬迁居住呃第尼嗰城镇，伊原先呃名字叫做“洋泾镇”，伊是拥有700多年历史呃古镇搭老镇，因为政府行政规划区域合并呃原因，就并畀嘞“花木镇”，今早仔呃名称畀改成嘞“花木镇洋泾地区”，伊所属呃街道名称叫做“洋泾街道（社区）”。就勒拉老镇上头，还有得一条河浜，伊呃名字叫做“洋泾港”，迭条河浜，北面直通黄浦江，南面一直可以通到张家浜，搭张家浜连接勒拉一道，伊呃全长大约摸有得六七公里，途径洋泾镇桥、南洋泾桥等地方。
勒拉中华民国时期呃上海滩哴向，有得一条河浜，伊呃长度只畀过有得十几米罢嘞，伊呃名字叫做“洋泾浜”，伊所在呃地理位置就是今早仔呃黄浦区延安东路。就勒拉中华民国时期里向，迭条河浜呃北岸是“英租界”，勒拉河浜呃南岸为“法租界”，就勒拉掰搿辰光里向，迭呃两块地方是属于“华洋杂处”呃，即：华人搭洋人是居住勒拉一道呃，所以迭嗰两块地方呃语言是邪气混杂呃，凡是勒拉迭嗰两块地方“讨生活”呃人，既覅管是土身土长呃上海人；还覅管是其他城市唻到上海滩哴向呃“新上海人”；更覅管是身处在阿里一嗰阶层里向呃人；伊拉多多少少侪都会得去讲一眼眼外语呃，还恁搭老外做一些交关简单呃交流，主要所讲呃外语，侪是英语为主呃，但畀过，所讲呃英文既覅是老正宗呃，也覅是一口邪气标准呃英语口语，伊拉勒拉讲英文呃辰光，往往会得去套用一些发音比较相近呃国语、或地方方言閒话唻讲讲，因此讲，迭种英语口语一律畀叫做“洋泾浜英语”。
沪上已故两位滑稽大师姚慕双搭周柏春，有嗰滑稽戏经典段子叫“学英文”，而且还有得好几嗰版本唻，勒拉各种版本当中、勒拉其中共有呃一段内容是讲：宁波人是哪恁样子唻学习英文呃，伊拉所讲呃英文口语，就是属于“洋泾浜英语”，曰：“一块洋钿么温道罗（one dollar）!廿四呃铜钿么小店佛（twenty-four）。大大轮船史汀婆（steamboat）,阴三谢堂（inside sit down）么里向…坐。”……
当时光迭辆列车开往到嘞1916年时，“洋泾浜”畀填平变成嘞一条马路，“英租界”搭“法租界”一道变成嘞“公共租界”，但畀过，“洋泾浜”搭“洋泾浜英语”迭嗰两组词语（汇）却畀保留嘞下唻，一直沿用到嘞今早仔，虽然今早仔讲呃人唻得邪气少嘞，勒拉有些辰光里向，还是会得听到有人勒拉讲迭嗰两句閒话呃。但凡是做起各种事体唻覅够正宗，或者讲，看上去是属于有一眼眼喇叭腔、覅像腔呃咪道勒拉里向，还或者讲，讲起各种方言俚语搭外语覅是邪气正宗呃、还覅是邪气流利呃人，眼扳数要畀大家说道一番呃，开口唻讲道：“迭嗰人做起各种事体蛮洋泾浜呃嘛！”、“伊讲是洋泾浜英语！”……
既是因为上海畀开埠嘞，还因为出现嘞“英租界”搭“法租界”，因此讲，勒拉上海滩哴向，又滋生出嘞一种新型呃行当，名字就叫“洋行”，“洋行”是外国商人勒拉中国设立呃商行商号，中国最最早呃洋行是勒拉1715年由英国东印度公司开设勒拉广州呃商馆。自从有嘞“洋行”以后，加之交关多呃外国人覅懂得中国国情、地方方言搭中国人呃人情世故，为嘞便于搭中国人做各式各样呃生意，因此勒拉“洋行”里向，又聘请嘞覅少头脑邪气活络、懂得各地方言、人情世故、还会得讲一眼眼英文呃中国人，到洋行里向去做一嗰买办，凡是做迭种行当呃人，一律畀上海老百姓称之为“洋行买办”。假使讲，勒拉掰搿辰光，屋里厢有人勒拉洋行里向做买办，勿单单是邪气洋气呃一桩事体，而且还会得畀亲朋好友们称赞道：“哦呦喂，侬今早仔覅得了嘞嘛，竟然也畀侬混格拉斯混到洋行里向去做嘞一嗰买办啦！”……
勒拉中华民国时期呃上海滩哴向，洋人聚集勒拉一道做各种生意呃地方，一律畀叫做嘞“洋场”，因此讲，勒拉掰搿辰光呃上海滩哴向，就有得“十里洋场”搭“十里夷场”迭嗰两种讲法。勒拉通常情况下头唻讲，老百姓讲“十里洋场”唻得交关多一眼眼，讲“十里夷场”迭四嗰字，基本哴向侪都是一些文人墨客，虽然中国已经是落伍嘞，搭全世界比较起唻，差距是变得邪气大呃，还被动呃畀打开开放嘞国门，但畀过，一些文人墨客，多多少少侪都是对老外看大覅起呃，总觉着老外呒中国人唻得好，所以就用一嗰“夷”字唻贬低伊拉。
自从中国国门畀东西方列强打开唻嘞以后，还自从大力开办嘞各类洋行之后，因此就覅得覅被动呃输入嘞交关多呃舶唻商品，尤其是勒拉上海滩哴向，凡是由外国唻呃各种商品，侪都要勒拉商品名字呃前头去添加一嗰“洋”字，之所以要去添加一嗰“洋”字，侪是因为勒拉掰搿辰光里向，基本哴向，各式各样呃商品，侪都是要依靠外国引进唻，自家是制造覅出唻呃，本人就举一些例子唻说明情况。
勒拉掰搿辰光里向，上海滩哴向呃老百姓，就勒拉每日呃俗常生活当中，有得交关多呃事体搭么事，侪都是搭“洋”字搭界呃。
就勒拉最初呃中国，是呒得啥呃电灯呃，一到夜快头，天就会得变得邪气暗戳戳嘞，照明所使用呃么事，覅是照明用油，就是去使用蜡烛，迭嗰两样么事，就畀上海人叫做嘞“洋油”搭“洋蜡烛”。自从有嘞“洋蜡烛”迭嗰词语（汇）以后，长辈勒拉教育自家屋里厢小辈呃辰光，或者讲，一方要好好较去教育另外一方呃辰光，去发明嘞一句上海方言閒话，曰：“侬迭嗰人啊，真是一嗰标标准准呃洋蜡烛，覅点覅亮，只有点过嘞以后，侪会得亮一眼眼！”……迭句閒话呃意思是勒拉讲，只有当一嗰人喫过嘞各种苦头、栽过嘞各种跟头以后，自家侪会得晓得到底错勒拉啥地方，只有喫过亏呃人，侪会得有长进，还只有自家受到嘞各种惩罚呃辰光，侪会得去改正错误覅再去犯。
勒拉上海滩哴向，有得两种邪气特殊呃房子，一种叫做“石库门”，伊融汇嘞西方文化搭中国传统民居特点呃新式里弄建筑，是用石头唻做门框呃，以乌漆实心厚木做门扇，是具有中国特色呃上海居民住宅。另外一种，是模仿欧美房子呃式样，独门独户，并且勒拉房子里厢还带有花园搭池塘，伊呃层数覅是老高呃，最最高呃高度到四层楼就封顶嘞，占地面积有得覅覅少少，通风搭阳光侪都是邪气好呃，迭嗰两种房子，覅是畀上海人叫做嘞“洋房”，就是畀叫做嘞“花园洋房”。就勒拉掰搿辰光里向，恁够住得起“花园洋房”呃人家，覅是邪气搛铜钿做各种生意呃大老板，就是勒拉政府部门里向做高官呃人。
因为勒拉房顶上头是要铺垫一层或几层瓦爿呃，伊嗰大小勒拉七八寸大小呃叫做“本瓦”，长度勒拉40公分，宽度勒拉20公分，有棱条纹呃或黄颜色、或灰颜色呃瓦爿，上海人就叫做“洋瓦”。
上海（家庭）妇女缝缝补补勿单单是一把好手，而且是覅可缺少呃，勒拉每一嗰家庭、勒拉房间里厢，眼扳数是要去配备一台“洋机”呃，今早仔呃上海年轻人，就覅一定晓得迭嗰到底会得是啥嗰么事嘞，伊又畀上海人叫做嘞“铁车”。实际哴向所谓呃“洋机”就是今早仔大家口中所讲呃缝纫机，勒拉本人呃屋里厢母亲曾购买过一台“蝴蝶牌”缝纫机。有嘞“洋机”以后，眼扳数是要有得“洋线团”呃，勒拉老底子，“洋线团”侪是要凭票供应呃，票子就叫做“民用线券”。
凡是勒拉“铁皮”呃上头去“镀上嘞一层或多层‘锡’”，或者讲，去“镀上嘞一层或多层‘锌’”，上海人一律侪叫做“洋铅皮”搭“洋铁皮”。勒拉上海方言俚语閒话当中，但凡是覅值一眼眼铜钿呃废弃物品，侪都畀叫做嘞“洋铅皮”。还凡是用洋铁皮做呃、扫地所使用呃物品——“畚箕”，自然而然呃叫做“洋铁畚箕”搭“洋畚箕”哦！
就连钉各种么事呃钉子，勒拉最初呃辰光，中国人是制造覅出唻呃，只好问外国去进口得唻，所以就取名字为“洋钉”。因此交关聪明呃上海人，去发明嘞一句方言歇后语，叫做：“叉袋里厢掼洋钉——‘里戳出’！”其中“掼洋钉”迭嗰词语（汇），伊呃意思是勒拉讲，叉袋里厢装嘞洋钉背勒拉自家呃肩膀上头，歇后语“里戳出”迭嗰词语（汇），伊呃意思是勒拉讲，钉尖从袋子里厢戳出唻、戳破忒嘞，刺痛嘞自家呃身体，迭句歇后语所要比喻呃就是讲——内部有小人专门勒拉作祟，侪是要帮着外头人唻攻击、讲各种坏閒话、并欺负自家屋里厢。
勒拉交关长呃一段辰光里向，中国人所使用呃瓶子，绝大多数是用瓷土制作而成呃，所以就叫做嘞“瓷瓶”。自从清朝呃国门畀东西方列强打开唻嘞以后，引进嘞由玻璃去制作呃瓶子，勒拉最初呃辰光里向，一律侪畀叫做嘞“洋瓶”。勒拉掰搿辰光唻讲伐，假使有人去戴嘞一副度数邪气深、镜片交关厚实呃眼镜，覅是畀周遭呃人讲：“伊戴嘞一副‘洋瓶底砣’。”就是讲：“伊戴嘞一副‘洋瓶砣底’。”今早仔呃上海人，恐怕就覅大晓得迭句閒话嘞，只会得用“架梁”搭“梁兄”唻替换之，讲道：“侬戴呃迭副‘架梁’度数还是蛮深呃嘛，镜片像啤酒瓶底一样厚实哦。”或者讲道：“侬去看呀，伊呃人是一嗰梁兄。”
对于某些态度覅是交关好呃人，脾气性格有眼古怪，而且伊本人还覅大合群，有一眼眼阴阳怪气呃咪道勒拉里向，上海人侪都会得开口唻讲道：“迭嗰人忒西洋怪气嘞，搭伊轧朋友交关沙度！”……
勒拉上海方言俚语閒话当中，有得两组带有“洋”字呃老词语（汇），一定要放勒拉一道唻讲一讲，只有迭恁样子去做一嗰比较，侪恁够品味出意思搭咪道唻。伊拉分别就是“洋腔”搭“洋相”，迭嗰两组词语（汇）呃意思搭含义是勒拉讲，外国人所拥有呃腔调搭样子到底是哪恁呃。勒拉老底子呃中国人，搭外国人是覅大一样呃，中国人呃规矩是啥么事呢？！有俩嗰认得呃人，覅管是亲朋好友，还是一道共事呃同事，相互之间勒拉马路哴向碰着嘞，平辈之间，勒拉一般情况下头，侪都是打躬作揖，假使讲是碰着嘞长辈，则先要半下跪磕一嗰头，然后再去问一声好。洋人（外国人）就覅一样嘞，是覅大讲究啥呃大小搭辈分呃，见面碰到嘞以后，相互之间先是握嗰手，然后就是相互之间还要左右各去相相面孔、打一记kiss（接吻）。就算辰光走到嘞今早仔，还有得交关多呃人，还是覅大习惯外国人迭种做法呃。对于老底子呃上海人唻讲伐，“洋腔”搭“洋相”侪都是指一种丑态，所以勒拉迭嗰两组词语（汇）呃前头，侪都要去添加一嗰“出”字，以此唻表示某些人，现在多多少少有一眼眼出丑嘞，显得丑态毕露嘞！
勒拉上海方言俚语词语（汇）当中，还有得两组词语（汇）同样是指出丑，可以讲是属于前面两组词语（汇）呃比较级，恁更进一步说明嘞出丑搭丑态毕露哦。伊拉分别就是：“洋（像）勿洋（像），三分洋（像）”搭“洋勿洋，腔勿腔”。前面一嗰词语（汇）呃意思搭含义就是勒拉讲，既覅管是啥呃人，也覅管去做啥呃事体，一定要有三分样子，假使事体做得覅对路子、覅对头、做大覅唻呃，就是属于“洋勿洋，腔勿腔”嘞，自然而然就露出嘞丑态，显得丑态毕露嘞。有关于迭方面呃例子，还是拿自家唻举一嗰例伐，记得有一趟仔去参加家父好友小囡呃婚礼，其中有一道小菜名字叫做嘞“鱼翅羹”，因为自家是第一趟喫迭种小菜，就脱口而出唻讲道：“迭碗汤盅里向呃线粉倒是蛮好喫呃唻！”就引起嘞一桌子人哄堂大笑起唻，家父就开口训斥道：“侬覅晓得情况，覅认得迭样么事，是覅好瞎讲八讲点啥呃，迭嗰么也是难怪、覅好唻怪侬呃，侬今早仔是第一趟喫迭道小菜，迭道小菜是‘鱼翅’，而覅是啥呃‘线粉’，记记牢，从今以后就覅要再搞错忒嘞！”……迭嗰辰光吾真呃好讲是“洋勿洋，腔勿腔”啊！【备注：勒拉上海方言俚语当中，畀欢喜喫呃食物“粉丝”叫做“线粉”。】
勒拉上海方言俚语閒话当中，还有得一些邪气有趣、交关有意思呃词语（汇），侪都是搭“洋”字有得关系、侪都是搭界呃。继续比方讲下去，“洋盘”迭嗰词语（汇）就是属于一嗰趣词。有覅少呃人总归会得去认为，“洋盘”迭嗰词语，就是上海人独有呃一种方言閒话哦，实际哴向，当笔者专门去寻找“洋盘”迭嗰词语（汇）呃历史脉络时发觉嘞，除忒上海人会得去使用“洋盘”迭嗰词语（汇）以外，身处勒拉其他地方呃人，也同样会得去使用迭嗰词语（汇）呃。对于四川人搭重庆人唻讲伐，勒拉伊拉呃方言俚语当中，“洋盘”专门是指：“洋气”搭“拉风”。勒拉石家庄矿区一带，“洋盘”迭嗰词语（汇）专门是指：扫地所要使用呃簸箕，簸箕是用“白铁皮”制作而成呃。
既勒拉中华民国时期呃上海滩哴向，还勒拉掰搿辰光呃上海文学作品当中，同样是去采用嘞“洋盘”迭嗰词语（汇）。勒拉掰搿辰光里向，有得一位笔名叫做“蘧园”呃作家，伊呃本名叫做嘞“欧阳巨源”，伊本人呃生卒年月日是呒得啥呃办法去晓得、并去考证呃，伊本人撰写有《负曝闲谈》一书，《负曝闲谈》迭本书籍是《廿载繁华梦》搭《负曝闲谈》两部谴责小说呃合集。就勒拉第九回当中，伊是迭恁样子唻写到呃，曰：“且说京城里有个阔公子，姓孙，排行老六，正是北边人所谓‘冤桶’，南边人所谓‘洋盘’。”著名作家、文学评论家茅盾先生，勒拉《第一段的故事》六中，去撰写过迭恁一句閒话唻，曰“我才不来呕这口闲气，花这路冤钱，让那只寡老背地里笑我是洋盘。”
勒拉上海方言俚语閒话当中，对于“洋盘”迭嗰词语（汇）是有得两种含义搭解释呃，而且还侪都是带有贬义色彩勒拉里向呃。
第一层含义搭意思是勒拉讲：某一些人是属于覅懂装懂类型呃，明明自家是一眼眼也覅懂得呃，偏偏要伪装成为一嗰邪气懂经呃人，以外行人唻冒充内行人。上海人就会得去认为，像迭种人就是属于“硬装斧头柄”、并“冒嘞大蒜”。第尼层含义搭意思是勒拉讲：某些人，因为自家覅懂装懂去出嘞洋相，并因此而去喫嘞（大）亏呃人。
比方讲：有得某一样么事（物品），实际哴向顶多只要去支付廿块洋钿就好去购买下唻嘞，因为覅晓得市场行情、覅领市面呃缘故，伊本人去花忒嘞一百廿只洋购买嘞下唻，迭种人就是一嗰标准呃洋盘。某些欢喜搞搞收藏呃爱好者们，欢喜去收藏一眼各式各样呃收藏品，伊本人满心欢喜呃去购买嘞一件赝品回唻，拿所购买呃赝品收藏品，去当作嘞一件真品收藏品，伊拉同样也可以畀叫做“洋盘”哦。
噶末，“洋盘”迭嗰词语（汇），伊呃出处又是从啥地方唻呃呢？！伊到底会得有啥呃讲法呢？！伊呃出处侪都是有得两种讲法呃。
第一种讲法是讲：“洋盘”主要针对呃就是——勒拉中华民国时期【备注：旧社会里向。】嘲讽、讽刺那些洋大人呃。【备注：勒拉掰搿辰光，上海人或者其他地区呃中国人，对于从外国唻到中国呃人，一律畀叫做嘞“洋大人”，而且还侪都是以男性为主。】虽然迭些唻到中国呃外国洋大人，勒拉平常呃日脚里向，作威作福可以讲是习惯成自然嘞，但畀过，每趟仔到嘞茶馆店里厢，因为覅懂得当地人呃规矩，经常性会得畀戏弄一番。比方讲：要喫茶，门资就要去加倍，起码要去翻一只跟头，就喫覅着原本可以免费呃茶水，勿单单是迭恁样子，虽然是花忒嘞高于规定价钿呃门资，却得到嘞顶顶推板呃服务。
第妮种讲法是讲：“洋盘”迭嗰词语（汇）原本是写作“佯盘”，就是假装勒拉拨弄算盘，老板算出唻呃价钿并覅是实际呃价钿。顾客就按照老板计算出唻呃价钿支付铜钿，肯定是要喫亏嘞。原唻呃欺诈行为，到嘞后末唻，就引申为覅懂计算而邪气容易畀欺骗呃人。
比方讲：做各种生意呃老板，最最欢喜、最最愿意碰着一些缺乏主见、覅晓得行情、覅领市面呃顾客嘞。勒拉迭嗰辰光，价钿就好由老板唻随意开价嘞，老板还会得暗戳戳对伙计唻讲道：“迭嗰外地人是只洋盘、洋冲（葱）头，吾伲要狠狠较去斩伊一刀，伊嗰老外也同样是只洋冲（葱）头，也好畀吾伲斩一刀呃，迭嗰嘛就叫做，走过路过覅要错过嘞，还有呃就是，有斩覅斩，就是一只猪头三哦！”……
勒拉各种上海方言俚语閒话当中，上海人还邪气欢喜去讲“卖洋三千”，迭嗰词语（汇）伊呃意思搭含义是讲：某人是交关爱炫耀呃。比方讲：老张搭老李俩嗰人是要好朋友，某一天勒拉马路上头碰着嘞，俩嗰人勒拉一道谈山海经嘎讪胡呃辰光，老李时覅时呃看看带嘞手哴向呃世界名牌手表劳力士，还讲手表是伊呃女婿买畀嘞伊呃，就是因为女婿晓得老李欢喜带手表。老张就开口去讲道：“算侬搛着一嗰好女婿嘞，忒侬买嘞只好手表嘞，啊覅晓得卖洋三千点啥么事！”……
自从上海被动呃畀开埠以后，但凡是从外国进口得唻呃各类么事（商品），畀上海人一律叫做嘞“洋货”，迭嗰还覅算啥哦，“洋货”还要畀区分为“东洋货”搭“西洋货”，勒拉通常情况下头唻讲伐，“东洋货”主要是指“日本洋车”，“西洋货”主要是指“西洋镜”嘞。
“日本洋车”简称叫“东洋车”，最最正确呃讲法就是叫“人力车”，就是作家老舍笔下骆驼祥子所拉呃车子，因为是从日本引进到中国唻呃，所以就取名字叫做嘞“东洋车”，是上海滩继轿子以后，最最常见呃交通工具，后唻么，迭种车辆呃颜色多畀油漆成为嘞“黄颜色”，勒拉大多数情况下头，是作为包车唻用，又畀改名叫做“黄包车”。
今早仔有得交关多呃上海人，覅一定会得晓得并认得“西洋镜”是啥呃么事嘞。“西洋镜”迭嗰词语（汇）是上海人呃叫法，还畀上海人叫做嘞“西洋景”，勒拉北方地区，尤其是北京人，则欢喜叫做“拉洋片”，洋人欢喜叫做“peep show”。伊是由欧美传入到吾伲国家呃一种逗乐装置游戏，伊是依靠一只大箱子，勒拉正面就有得三只孔洞，孔洞面积覅是老大呃，只好容纳一嗰人去看看。勒拉里厢有类似于幻灯片呃图像，勒拉摊主手里向有得一根绳子，每趟仔去拉动一下，就会得去调换一张图像，摊主还会得根据图像呃画面去自编自唱，因为迭些图片侪都是从外国引进到中国唻呃，所以就叫做“拉洋片”。
“拉洋片”或“西洋镜”，伊呃原理侪都是依靠“光学原理”、侪是需要人去暗箱操作呃，所以多多少少就显得有一眼眼神秘感，一旦大箱子畀打开唻嘞以后，里厢就只畀过有几张图片而已，是呒得其他啥呃花露水好讲呃，是一眼眼也覅稀奇呃。因为箱子里厢有得各种新奇呃故事，因此勒拉上海滩哴向，“看西洋镜”就演变成为嘞方言俚语俗语。勒拉上海方言俚语閒话当中，但凡是畀人家看破忒嘞门道搭机关，露嘞陷、事体败露，就叫做嘞“拆（戳）穿嘞西洋镜”……
文章撰写到嘞此地块，也至文末，就此搁笔就好结束忒嘞，但畀过，要是再好好较去寻找搭“洋”字搭界呃上海方言閒话，还是有得交关多呃，吾伲只要是用心去寻找，总归是恁够去寻得着呃……