上海滩个“拆二代” 作者
诵读：张黎明
作者，诵读：张黎明
上海滩个“官二代”勿是忒多个，比起北京来搿个恐怕就是小巫见大巫了，勿过，如今，上海滩浪个“拆二代”却是勿勿少少。拆来早个就勿必要讲了，现在居住还是比较困难个，尤其近几年来，特别是农村私房拆迁政策较为宽松，使得勿少家庭基本浪向侪能分到大、中、小三套动迁安置房。基本浪向每家每户侪有多余个一到二套安置房，搿个就自然而然个形成了一个新个社会群体，我伲叫伊拉是“拆二代”。
许多“拆二代”个童年也是比较艰苦个，父母亲一般呒没啥非常体面个职业，有个还勒拉田里务农，有个稍微好一点个勒拉镇或村个集体企业里讨生活。一般也呒没啥个保障，因为我晓得老早个乡镇企业是从来也勿加“四金”个，因此，就等于是呒没工龄个，只有勿值铜钿个农龄，直到拆队后再结算到一眼钞票。因而，农村养老金是绝对勿能搭城市比个，大概一半甚至三分之一也勿到。其实，我伲勿必要去眼热伊拉，许多我伲上一代个农村老人一辈子吃苦耐劳，还没住上新房，就归西天了，真是呜呼哀哉！
但是，搿眼被称为“拆二代”个小囡，还是比较幸运个，因为伊拉一般侪是独生子女，从小大多数勿必要到农田做苦生活，也呒没饿过啥肚皮，真气个小囡就拿书读读好，侪有一份稳定体面个职业，搿个是上一辈人最为欢喜个后生。一般性个呢，侪进了企业做个工人，巴巴结结，娶妻生子，小日子过得当然是勿错个。但是，确实也出了勿少捣蛋鬼、败家精，常庄拨社会浪个恶势力瞄牢了，勿是教侬赌，就是教侬吸毒，一开始常庄以大哥自居，拨侬吃拨侬用，还陪侬白相，伊拉有句行话叫“养只羊”，等侬莫知莫觉离勿开伊拉个辰光已经晚了，侬老早已赌博上瘾，或者吸了毒，伊拉借拨侬个赌资搭买毒品个钞票，侪变成了侬签下来个借条，并逼侬老早交出了房产证或者动迁协议唠啥。真是作孽啊！搿种事体前两年真正勿勿少少勒拉我伲身边发生。
搿两年，由于政府部门重拳出击，已基本得到遏制。搿眼“拆二代”也就几乎彻底毁忒了。比伊拉更惨个是伊拉个爷娘呀！勿少是倾家荡产，一身疾病缠身啊！
所以，我觉得现在个拆迁对于大多数家庭来讲，勿尽提高了生活品质，而且，使伊拉个物质世界变得更加富有了。尽管搿能，勿过精神浪个富有，勿是一趟动迁能所带来，记得巴尔扎克讲过：“培养一个贵族，需要三代人个努力”。搿句闲话勿正是勒拉针对我伲讲吗？
要让伊拉明白：除了麻将、毒品以外，还有文学、美术、音乐、戏曲搿眼精神财富，才是现在吃穿勿愁个我伲搭“拆二代”所应该追求个。搿个也是我伲大多数上一辈人所向往，而勿办法实现个。最后，我想用鲁迅先生个一句话，我伲勿要一勿小心，露出毛皮大衣里个“小”来，搿个“小”，我认为勒拉现在就是呒没文化。
往期回顾：
图：网络 / 编辑：渺渺