故里春秋（三十）
作者：朱海洪
沪语改写：边秦翌
沪语讲述：刘引烽
香烟个叫法是哪能介来个呢？原来啊，是起源于皇宫个熏烟。
熏烟是用一种香草摆勒熏炉里向烧，烟就从熏炉盖头浪个小洞洞里向飘出来，搿能可以拿房间里向个怪味道弄弄清爽，闻闻是蛮香个，所以就叫做香烟。
用纸头拿香草裹成功卷烟是后首来个事体；最先变成功产品个是欧美国家；十九世纪末再传到中国。我小辰光曾经勒勒烟纸店里向看到过“老刀牌”、“哈德门”、“美丽牌”咾啥一眼老牌子个香烟。
“老刀牌”个香烟壳子浪印仔一个外国武士，带勒一顶武士帽，右手扠腰，左手抵马刀于地，威风凛凛个样子，下头还标勒“国营上海烟草公司制造”个字样。“老刀牌”勒文艺界邪气风行，鲁迅就常庄吃“老刀牌”，但是伊最最欢喜吃个香烟还是“哈德门”。搿是民国时期家喻户晓个老牌子了。
哈德门是紫金城当中个一扇门。迭扇门曾经是皇城里向运酒个专用通道，拨称之为“酒门”或者“酒道”，官方叫伊“崇文门”。科举考试个辰光又是读书人赶考个必经之路，所以也可以叫做是“幸运之门”。明、清个辰光，朝廷还勒勒此地设税务司，又拨人家叫做“财富之门”。就是因为有得介许多个讲法，商家看中了搿扇门个价值，乃末就开发出“哈德门”香烟了呀。
“哈德门”壳子浪有得两个搭牢仔肩胛笑咪咪个美女，旁白是：“吃来吃去，还是伊好”；报纸浪个广告还来轧闹猛，讲“无人勿吃哈德门，是人侪吃哈德门”。弄得来勿吃“哈德门”个烟鬼侪勿好意思讲自家会得吃香烟了。必过，“哈德门”香烟画片里向个古典人物栩栩如生，诱人眼球，倒是邪气有得收藏价值个。
“美丽牌”香烟壳子浪是各式各样个时髦女郎，其中最最流行个古典式美女温文尔雅，气质高贵。广告词讲：有美皆備，无丽不臻。用美女来作香烟广告，拿本来勿是啥个好个物事，包装得看上去邪气漂亮，迭个是民国辰光商家个常用手法。闲话再讲转来，搿能介个手法勿但吸引男人个眼球，还培养出勿少女性烟客。当时辰光个一眼上层名媛搭仔电影明星，像陆小曼、阮玲玉咾啥，侪欢喜吃香烟个，必过，伊拉吃个是“仙女牌”香烟。
我白相香烟牌子个辰光，“老刀牌”、“哈德门”、“美丽牌”搿眼老牌子香烟已经开始慢慢叫个销声匿迹，看勿着了。经常看到个是“大中华”、“大联珠”、“大前门”、“飞马”、“光荣”、“劳动”、“勇士”咾啥。香烟壳子里向也没啥画片了，小朋友白相香烟牌子只好到小摊头去买。
伊个辰光，我搜罗了眼《水浒》、《三国》咾啥个人物画片摆勒书包里，用来欣赏，有辰光也拿仔画片搭同学飞片白相。
放学之后，常庄搭同学勒弄堂里向飞香烟牌子。先要勒墙壁高头画根长线，挨下来同学轮流上阵，手里捏张香烟牌子去贴勒线个位置，勿可以超过搿根线个高度，看准位置再松手，画片就邪气轻巧个飞下来了，飞得最远个可以拿地浪向所有勿及伊远个香烟牌子侪收归囊中。香烟牌子也可以两个人白相。两个人勒勒地浪向画只圈，圈里向摆张画片。用自家手浪向个香烟牌子拿对方个画片刮翻或者是刮出圈，就算赢了。
白相香烟牌子勿但有趣，还増加了勿少古典文化个知识。像我小学还呒没毕业个辰光，《水浒》里向个108将，连名带号，已经背得来滚瓜烂熟了。
往期回顾：
图：网络 / 编辑：渺渺