故里春秋（十五）
作者：朱海洪
沪语改写：边秦翌
沪语讲述：周恋云
我个启蒙来自于小人书摊头。
小人书也就是连环画，看连环画个大部分人侪是一眼小小朋友，所以连环画又拨叫做小人书。
有人专门做小人书个生意，往马路上街沿一摆，就是一只小摊头。一般来讲，小人书主要是画，配一眼文字，一本本插勒书架浪。假使有得小朋友要借了看，就要交钞票：1分洋钿1本；薄一眼个1分2本；厚个好看个2分1本。迭种小人书摊头有眼眼流动图书馆个味道，差勿多算是儿童个启蒙场所伐，也是老底子上海街头个一道风景。
我常庄去个摊头，就勒勒两条“三德里”弄堂之间个空地浪。摆摊个是一对五十几岁个夫妻，男个有眼象鲁智深，女个看上去模子也老结棍个。我一直还以为伊拉是山东人，后首来再晓得人家是南人北相，其实是常州人。
每天老清老早，“鲁智深”揹勒折叠个书架从“三德里”出来，“鲁大妈” 手里拎勒海小矮凳跟勒后头，两个人一前一后来到上街沿个空地浪。“鲁智深”拿书架往墙壁浪一靠，打开、插书。伊大概有得三、四只排门板一样个木头书架，亨八冷打可以插一千本小人书。书架还呒没插满，就有小朋友围上来了，叽叽喳喳，东抽一本、西翻一本，乱哄哄个。“鲁智深”从来勿嫌避伊拉，照样插伊个书。有辰光有小人看勿清爽书架高头个书，伊会得拿迭个小人抱起来，让伊看个够，选勿选中无所谓，开心就好。
小朋友坐勒小矮凳浪低头看书，“鲁智深”就勒旁边走来走去。吃力了，伊就一屁股坐到小竹椅浪看看街景望望野眼。中浪向，“鲁大妈”拎一只三层抽屉式个饭篮来送饭，两个人一道吃，好像也勿大讲闲话。吃好之后，“鲁大妈”收作好饭篮，自家走回去。“鲁智深”揩揩嘴巴，端起茶缸吃口水，又开始勒勒书摊前头走来走去。
书架浪个小人书真个是五花八门：有四大名著，还有《七侠五义》、《说岳》、《十五贯》、《西厢记》咾啥；当然现代当代个故事书也是有个，像《红旗谱》、《朝阳沟》、《刘胡兰》、《柳堡个故事》、《小二黑结婚》咾啥。
小朋友往书架前头一立，就眼花缭乱了，脚生了根，移勿动了。男小囡最最欢喜《三国演义》，深蓝色个边框，衬出跨马疆场个精美画面，特别撩人。
我第一趟看小人书，是搭仔我个两个同学一道去个，三个人勾肩搭背坐勒小矮凳高头看《桃园结义》。搿两个同学也是我个邻居，一个叫王双林，住勒我楼下头；还有一个叫沈震威，住勒阿拉屋里贴隔壁个“华安”理发店楼浪向。想勿起来勾肩搭背个辰光啥人坐勒当中，反正勿是我，当中个人肯定是出钞票个。我小辰光囊中羞涩，勿大可能居中而坐。三只头凑勒一道，一面看一面还要问来问去：啥人是好人啊？啥人是坏人啊？打起来到底啥人狠啊？真个，小朋友看世界邪气单纯，好人坏人帮侬辨是非，啥人狠为侬提供偶像。
罗贯中“扬刘贬曹”，小朋友个思维就跟牢伊想：刘、关、张是好人，曹操是坏人，孙权算好人还是坏人蛮难讲个，必过，总归要比曹操好。等到长大了，见多识广之后再开始奇怪，为啥“好人”刘备哪能介倒霉个啦？伊除脱逃来逃去，好象也呒没做啥个事体；伊个“宁可我负天下人，休教天下人负我”个坏人反倒是顺风顺水，跟勒伊打天下个人也邪气多，好像还蛮人多势众个样子。想来想去想勿明白。
至于啥人狠，比较简单。“三英”战吕布侪打勿赢，吕布顶狠呒没啥问题个。但是吕布人品差，勿值得崇拜。我小辰光欢喜关云长，伊除脱有眼骄傲自大，优点也是蛮多个：本事大、人品好、讲义气，再加上一把美髯飘拂，偶像就是伊了。
书摊浪个小人书常庄翻新，当然要归功于“鲁智深”个辛苦。连环画兴旺个辰光，上海大概有得3000只书摊，分布勒市井弄堂个角角落落。一到下半日五、六点钟，书摊主就翁到书局，争先恐后个调新书。“鲁智深”三日两头就跑一趟书局，轧勒人群里向，调交关新出版个小人书回来。第二天早浪向一开张，小朋友侪看到了，叫起来：“哇！介许多新书，灵个，灵个！”
坐勒书摊浪看小人书特别享受，看看路浪个风光也蛮开眼界个。
朗读者
往期回顾：
图：网络 / 编辑：渺渺