里、弄、坊、村，上海弄堂个区别 / 四六文摘

沪语朗读：王浩峰

里、弄、坊、村，上海弄堂个区别

原创：沈嘉禄

来源：老有上海味道

上海话改写：郭莉

朗讀：王浩峰

推薦：丁迪蒙

上海弄堂，勒外地人眼睛里，好像侪一样整齐，一样拥挤，一样精巧，一样破落，或者讲侪是一样个别有洞天。窗口伸出来个竹头，乌漆大门旁边刚刚倒好准备阴干个马桶，正勒勒生起来个煤球炉，也侪是一样个市井烟火。

阿拉当然勿好要求每一个匆匆过客，望一眼就可以拿上海拎得煞煞清，其实，就像勿会有两片相同个树叶一样，上海，也并呒没两条相同个弄堂。

往大里讲，上海弄堂是分等级个。

草根性最强、数量最多、历史最悠久个当然是老式石库门里弄。迭个里向是蚂蚁蜜蜂一样密密猛猛，各色人等擦肩而过，彼此打量，各种方言也侪是相互轧勒一道个。

弄堂里生态也是鲜活又杂乱个：老虎灶、馄饨店、烟纸店、印刷所、白铁间、竹木坊、裁缝铺、剃头店、街道工厂、民办学堂、私人诊所、里弄食堂……哦哟哟，是七嘴搭八侪迓勒弄堂个角角落落，人来人往，弄出交关动静。

呵呵，弄堂口还有一只皮匠摊，看弄堂老头子住勒过街楼下头，一间勿到两平方个木板房里，伊对每份人家事体侪“煞辣丝清”。当然，别人倒是也并勿晓得，迭只老头子当年还是钟表店小开唻，是因为跑马输光仔钞票，乃末再落魄到搿步田地。

再从小里向看，具体到同一条弄堂里个石库门房子，也是有精粗优劣之分个。

外头人看得到个前排几幢房子，门框做得精致眼，楼浪楼下厢房，朝外一边个窗门也会装上百叶，有眼花园洋房腔调，房子有前后客堂，有单边或者两边厢房；但是靠弄堂里向个几排，就只有前后客堂，呒没厢房了。当然，大家侪是要倒马桶，生煤球炉个。

每日天老清老早，“粪车是我们的报晓鸡，多少市声由此起。”金嗓子周璇勒勒上世纪四十年代就迭能唱了。家家户户煤炉同时也拎到弄堂里向生起来了，烟雾升腾。周璇个歌声是为上海弄堂生活抒情，伊是上海市民个代言人啊！

搿种格局个弄堂，一般侪叫做“里”，譬如益诚里、树德里、渔阳里、久耕里、永安里咾啥。住勒海个大多数侪是工人、店员、教师、小业主、小老板，还有舞女、包打听、算命先生咾啥，大老板、大知识分子、大艺术家，一般勿会勒搿搭，跟草根阶层混勒一道个。

比“里”稍许高档一眼个弄堂叫做“坊”，譬如锦绣坊、华宝坊、春平坊咾啥。条件更加好个有淮海路附近个淮海坊、梅兰坊、万宜坊咾啥，迭眼弄堂有煤卫、有小花园，公共区域交关宽敞，小汽车勒里向开进开出。

新式里弄或者公寓式里弄，一般侪叫“啥啥邨”，譬如愚谷邨、歧山邨、陕南邨，房子建筑各個方面当然也更胜一筹。还有啥啥别业或者啥啥别墅，迭个一般就勿是老城厢了。

比“里”更推板眼个弄堂，一般就叫做“弄”，狭窄个小弄堂曲曲弯弯无穷无尽，低矮个屋檐真叫人走过辰光勿得勿低头，甚至还有竹篱笆個矮墙。几十户人家佮用一只给水站，电线拉得横七竖八。譬如番瓜弄、药水弄咾啥。搿搭基本侪是体力劳动者个大本营，无产阶级個根据地。伊拉性格直爽，文化修养虽然勿高，但是也自有规矩，对外头人邪气警觉。勒伊拉一贯热情直爽个背后，可能埋伏了一贯个勿信任、勿合作搭仔勿服帖。

勿同个弄堂，勿同个风景，勿同个居民阶层，也就造成了勿同个判断方式；勿同个文化层次、勿同个语言系统搭仔勿同个生活习惯，讨进门个新妇也就勿一样了。搿种环境深刻个影响了居民，也影响了伊拉个下一代。乃末形成了阶层、阶级之间个差异搭仔隔阂。

不过，上海市中心留存个石库门房子已经勿多了，剩下来大约摸是三十年前个十分之一勿到。现在大家常庄还要回想、还要怀念个弄堂生活，实质浪就是集中勒最底层个伊眼鲜活场景。

搿搭也看出上海人个厚道，当然也是上海人对自家出身个坦荡。