衡山路高安路一带，叫做“圣乔治” / 四六文摘

沪语朗读：渺渺如胭

朗读者

衡山路高安路一带，叫做“圣乔治”

原创： 薛理勇

来源：上海门牌研究所

上海话改写：郭莉

诵读：渺渺如胭

推荐：丁迪蒙

搿句闲话讲起来也是蛮长远了。交关年数以前，广播节目主持人、我个老朋友金亚女士搭我讲，伊勒勒衡山路采访辰光，当地人告诉伊，伊拉从前侪拿衡山路高安路一带叫做“圣乔治”。至于迭个“圣乔治”地名哪能介来个，伊拉自家倒是也勿晓得。乃末，金亚女士就来问我了。

大家侪晓得，勒勒1848年辰光，美国基督教传教士文惠廉就从上海道台手里，弄到了苏州河北岸虹口一带个土地，建立了“虹口美租界”。但是，当时美国政府规定，勿好勒外国建立殖民地，所以美租界就勒1863年搭英租界合并，叫做“英美租界”，搿个也就是后首来个“公共租界”。

美国是后起个资本主义国家，当时经济实力勿算强，勒上海个美国人地位也勿算高，所以伊拉总归要跟好仔英国人。交关国家侨民侪拿上海美国人叫做“半吊子英国人”，美国侨民尽管邪气呴势、殟塞，但也呒没办法。

第一次世界大战辰光，美国远离欧洲战场，所以伊拉勿但呒没受到战争破坏，反而成为欧洲战场军火以及战争物资供应商，发大财了。战争结束以后，美国终于排进了世界强国之列，迭个足以激发起美国人民个公民意识搭仔爱国主义热情。

美国政府跟勒上海个美国人，希望而且实质性计划了，要勒上海建立一个“美国人社区”，迭个计划包括建立一个可以搭英国人、法国人媲美个美国总会，一个美国乡村俱乐部，一个美国人学堂，还有一个美国社交会堂。搿眼地方调只名字大家侪晓得个：美国总会，就是现在个福州路209号，后来曾经是上海市高级人民法院所在地；美国乡村俱乐部也叫哥伦比亚总会，就是近抢巴时髦得勿得了个上生新所；美国人学堂就是现在衡山路10号个上海船舶设备研究所迭个地方；美国社交会堂呢，就是现在衡山路浪向个基督教国际礼拜堂呀。

其中，美国人学堂搭仔国际礼拜堂侪建勒贝当路个北端，自然而然就勒勒贝当路、贾尔业爱路一带形成了一个美国人社区，迭块地方就是现在衡山路东平路一带，当时美商中国营业公司还投资建造了交关花园洋房搭仔公寓住宅。

现在衡山路303—307号个西湖公寓，原名“华盛顿公寓”，当然是以美国首都华盛顿命名个；衡山路311—331号个集雅公寓，英文名称叫做Georgia Apartments，就是以美国佐治亚州命名个，按照现在通用个翻译应该叫做“佐治亚公寓”。当然，迭个里向个住户基本侪是清一色个美国人。

问题就出勒Georgia身浪。Georgia勒英文里也蛮多用于女人个名字，中文一般翻译成“乔治亚”，搿只发音跟英国男人个名字George（乔治）邪气接近，而基督教里向个“圣乔治”（St.George）名气就更加大了。乃末好，Georgia Apartments拨上海人用“洋泾浜闲话”一讲，就叫做“圣乔治公寓”了。有眼自以为“老克勒”，实质浪又勿晓得集雅公寓真正个英文名称个朋友，索介就拿集雅公寓叫做“圣乔治公寓”。葛末所谓“圣乔治公寓”附近个一带，自然也就拨大家叫做“圣乔治”了。

集雅公寓是美商中国营业公司勒1930年投资建造个，属于近现代主义个建筑风格，当时委托泰利公司经租，是上海个高档公寓。现在阿拉还寻得着集雅公寓1937年个住户登记记录，从迭个里向可以晓得，集雅公寓个住户以美国人为主，房间基本上侪是外国驻上海个商事机构使用个。

最后，还要补一句，现在集雅公寓门口头挂了一块“优秀历史建筑”铭牌，不过侬要注意，伊记录个信息并勿是老准确个哦！