踏老坦克个贵族
沪语朗读：王浩峰
踏老坦克个贵族
作者：马尚龙
上海话改写：丁迪蒙
诵读：王浩峰
1980年，已经相当相当遥远，勒记忆当中，好像是幸福指数最高个辰光。有闲话可以讲了，有书可以读了，有衣裳可以着了，有工钿可以加了，有文艺可以欣赏了，有事业可以钻研了，有爱情可以追求了。几乎每一个人侪感觉到自家是生活“在希望的田野上”，大家侪已经拿自家个心愿展望到了下一个世纪四个现代化个实现，“再过二十年，我们来相会，荡起小船儿，暖风轻轻吹”……就勒搿一年，邱岳峰死脱了。自杀，58岁。报纸浪呒没任何个报道，当时个报纸是勿可能报道一个自杀者新闻个。只有小道消息越传越结棍，越传越具有言情小说个滋味。永嘉路浪翻译片厂个门口头——上海人习惯搿能称呼，而勿是称呼伊个学名“上海电影译制厂”，常桩有眼人三五成群，轧轧闹猛，听听小道消息，其中又有业余福尔摩斯对案情个推理。有些生产组阿姨妈妈叫勿出邱岳峰个名字，就直接讲是“《简爱》里向个男个配音”。
直到将近30年之后，电视浪向正好勒播一档翻译片厂个节目，邪气突然个，就有一个人讲，搿个辰光搭邱岳峰，就是伊呀；就是伊啊！倒是呒没啥评判，话语一转，邱岳峰可惜可惜，介好个配音。1989 年，淳子，当时伊还勒《上海文化艺术报》也就是后来个《上海一周》做记者，一定是出于一个上海女人对邱岳峰个崇敬搭仔伊个人对邱岳峰配音个极其欢喜，编辑了一盒磁带《邱岳峰绝版》，由中国唱片公司出版。
一个人亡故了交关年数以后，大家还记牢伊，还为伊可惜，实在是搿个人过早离世个不幸，也是体现了搿个人个价值。邱岳峰毕竟是死脱了，再伟大个荣誉也搭以个生命无关。后来人家侪讲，假使邱岳峰能够再忍一忍，再过了一两年，伊或许就呒没自杀个理由了。问题是伊忍勿下去了。
深究过个是邱岳峰知识分子个性格悲剧，而搿个悲剧，恰恰因为伊是一个上海男人而更加难以摆脱。拿邱岳峰界定为上海人，好像有点牵强，伊个父亲是福州人，母亲是白俄女子。但是，自1949年到1980年去世个31年，也就是伊生命当中个27岁至58岁最最重要个阶段，侪勒上海度过，尤其是作为第四个进翻译片厂个第一代配音演员，邱岳峰当然是上海人。勿仅邱岳峰是上海人，尚华、毕克侪是上海人，而伊拉个头头、翻译片厂厂长陈叙一，出生于资产阶级买办家庭，屋里形形色色个外国人来来往往，搭伊后来作为译制片厂个奠基人，奠定了外国风情个基础。
勒上海译制片成为中国个绝响之后，所有人侪勒称颂搿家特殊工厂个工人，但是，从来也呒没人追问一下，为啥电影译制厂独独诞生勒上海？全中国就呒没一家分店，充其量也就是长影有个译制片组。事实浪，长影勒1947年已经有译制片组，配过《蝴蝶梦》，也有过向隽姝搿能介配音明星，但是长影个译制片组一直呒没转正为译制片厂，而上影个译制片组勒1957年就升格为译制片厂，独领了中国电影配音个风骚。
答案好像又勿言自明。
上海是中国最早、最广泛看到好莱坞电影个城市，1929年勒夏令配克影戏院——就是后来个新华电影院第一趟公映美国有声电影《飞行将军》。上海也是最早最广泛勒自家个城市里接触到外国人、领略欧美生活个城市，上海还是中国最闪现出欧美风情个城市，上海还有中国第一代个电影搭仔电影明星。还有阿里一个城市，会得比上海更加有资质担纲起翻译片个中外交流？
由此，交关人以为，翻译片厂个搿些老明星，一定是家境丰厚，养尊处优个。实际浪，伊拉并勿富裕，譬如邱岳峰，每日天一辆邪气旧个脚踏车，驮一只黑颜色个皮包，车就靠勒弄堂口；尚华、毕克侪是踏“老坦克”上下班个。伊拉侪勒80年代初退休，甚至就呒没享受到职称评定，甚至就呒没享受到福利分房，甚至就呒没享受到过加工钿。搿一切个福利侪是伊拉退休以后再发生个，伊拉退休辰光个工钿就是一百多块洋钿。
勒知晓了伊拉个俗常市井之后，有个北京观众在电视浪向发问：“上译厂伊帮人，也买大白菜，踏脚踏车，公交月票上下班，开小组会，读报纸，伊拉活得搭每个中国人一样，伊拉读过个小说，其实大家侪读过。为啥伊拉能够进入《简·爱》个空间、《战争与和平》个空间、《悲惨世界》个空间？伊帮人脚跟立勒中国土地浪，但另外又勒勒过属于云上个日脚？”
往期回顾：
图片来自网络
欢迎关注本公众号